Сельскагаспадарчы год блізіцца да завяршэння, але аграрыям пакуль не даводзіцца расслабляцца. Уборка кукурузы на сілас і зерне, завяршэнне азімай сяўбы збожжавых сельгаскультур, уздым зябліва, унясенне арганічных угнаенняў… І гэта мінімальны пералік восеньскіх клопатаў у сельскай гаспадарцы. Аграрыі раёна цяпер імкнуцца зрабіць усё магчымае, каб закласці добрую аснову для будучага ўраджаю і пад поўную патрэбу нарыхтаваць кармоў.

З максімальнай аддачай працуюць спецыялісты і механізатары КСУП “Жылічы”. Вясной яны па-гаспадарску паставіліся да сяўбы кукурузы, своечасова правялі неабходны комплекс работ па хімпраполцы, а таму зараз высокія абшары с кукурузнымі раслінамі радуюць позірк, а духмяная свежаскошаная маса, якая амаль бесперапынна сыплецца з кормакамбайна ў кузавы машын і прычэпы трактароў, дае спадзяванне на сытную зімоўку грамадскага статка.
Як лічыць дырэктар сельгаспрадпрыемства Уладзімір Пятроў, галоўны клопат – не прамарудзіць спрыяльны для кукурузы час, каб нарыхтаваць вітамінны корм, які дазволіць разлічваць на павелічэнне надояў і прываг БРЖ. Адзінае, што непакоіць аграрыяў – спякотнае надвор’е, якое не лепшым чынам адбіваецца на пасевах кукурузы: расліны хутка ўсыхаюць, губляецца
і ўраджайнасць, і якасць масы. Таму тэмпы работ на ўборцы кукурузы актывізавалі, бо ўбраць неабходна каля 600 га.

– Сёлета кукурузныя палеткі на жыліцкіх землях радуюць, з кожнага гектара ў сярэднім атрымліваем па 390 цэнтнераў, – адзначыў Уладзімір Пятроў. –
Усе гатункі насення царыцы палёў беларускай селекцыі. Вядома ж, каб атрымаць добры ўраджай пра гэтую культуру мы клапаціліся на працягу ўсяго сезона. Палеткі былі своечасова апрацаваны ад пустазелля, таму зараз у кармы ідзе кукурузная маса без смецця. Ужо заклалі больш за 3000 тон сіласу.

Кіраўніцтва і механізатары сельгаспрадпрыемства разумеюць важнасць корманарыхтоўчай кампаніі: грамадскі статак у гаспадарцы немалы – больш за 2800 галоў буйной рагатай жывёлы, з якіх 918 кароў, таму тут імкнуцца з максімальнай аддачай выкарыстоўваць кожны гектар. Чакае свайго часу і 140 га маслянічнай рэдзькі, якую плануюць закласці ў сіласную траншэю разам з кукурузай, каб атрымаць пажыўны корм.

Належным чынам падрыхтавалі да прыёму зялёнай масы сянажныя траншэі, без значных паломак працуе тэхніка. Для таго, каб паскорыць тэмпы закладкі сіласу прыцягваюць да палявых работ тэхніку з розных арганізацый. Пэўную дапамогу аказваюць і калегі з іншых сельгаспрадпрыемстваў. Напрыклад, у аўторак на жыліцкіх палях шчыравала механізатарскае звяно з КСУП “Чырвоны баец”.
Задаволена кіраўніцтва сельгаспрадпрыемства добрасумленнымі адносінамі да даручанай справы Рамана Данілова, які на КВК заняты на ўборцы і здрабненні кукурузы. Старанна працуюць на адвозцы Раман Канавалаў і Анатоль Гогалеў. Абодва працуюць ў гаспадарцы шмат гадоў, заўсёды з адказнасцю ставяцца да даручанай справы. Па словах працаўнікоў, сёлета ўборка кукурузнай масы прыносіць задавальненне: ураджайнасць зялёнай масы высокая, таму кармавыя запасы папаўняюцца хутка.

Належную ўвагу надаюць жылічане захаванню тэхналогіі нарыхтоўкі і закладкі кармоў. Увесь працэс на сянажных траншэях кантралююць адказныя спецыялісты, а трамбоўку вядуць вопытныя трактарысты-машыністы – Павел Какоўка і Аляксандр Казека.

Як адзначыў Уладзімір Пятроў, сёлетняя корманарыхтоўчая кампанія праходзіць зладжана і планамерна, у чым значная заслуга надзейных механізатарскіх кадраў, адказных спецыялістаў. Кожны на сваім участку работы імкнецца працаваць добрасумленна. Таму ёсць спадзяванне, што сёлета яны нарыхтуюць кармы з запасам і належнай якасці.

Яшчэ адзін клопат мясцовых аграрыяў – своечасовае правядзенне сяўбы азімых культур. На мясцовых палетках ужо размясцілі 310 га азімага рапсу, правялі яго хімапрацоўку, на 175 га – азімую свірэпіцу. Апошняя з культур стане добрым вітамінным кормам для грамадскага статка вясною. Зараз Сяргей Міхнёў актыўна займаецца ворывам і падрыхтоўкай глебы, а Міхаіл Цітарэнка вывеў свой пасяўны агрэгат на сяўбу азімых збожжавых.

У сваю чаргу, і кіраўніцтва сельгас-прадпрыемства клапоціцца аб працаўніках: прама на палеткі дастаўляюцца смачныя абеды, прымяняюцца меры маральнага і матэрыяльнага заахвочання за своечасовае і якаснае правядзенне корманарыхтоўкі.

З раніцы і да змяркання на жыліцкіх палетках чуецца гул тэхнікі: мясцовыя аграрыі праводзяць комплекс палявых работ, прадпрымаюць пэўныя намаганні па паляпшэнні фінансавага стану сельгасарганізацыі, дабрабыту яе працаўнікоў.

Людміла СЯМЁНАВА. Фота аўтара.