Прафесіяналы новага пакалення
Маладыя спецыялісты – гэта новае пакаленне таленавітых прафесіяналаў, гатовых унесці свежыя ідэі і інавацыйныя падыходы ў розныя галіны народнай гаспадаркі краіны. У Кіраўскі раён на першае працоўнае месца ў 2024 годзе прыбыў 71 малады спецыяліст.
На мінулым тыдні ў раёне прайшоў конкурс “Лепшы малады спецыяліст-2024”, які сабраў прадстаўнікоў розных прафесій, што пачынаюць сваю прафесійную кар’еру на Кіраўшчыне.
Гэта падзея стала сапраўдным святам для ўсіх, хто імкнецца праявіць сябе ў сваёй сферы
і атрымаць прызнанне за свае прафесійныя якасці і дасягненні. Удзельнікі, якія прадстаўляюць розныя галіны, спаборнічалі ў майстэрстве і інавацыйным падыходзе да выканання конкурсных заданняў.
Аліна Таранава, выхавальнік групы падоўжанага дня СШ №2 імя К.П.Арлоўскага, ураджэнка Кіраўшчыны. Лічыць, што ўдзел у конкурсе даў ёй магчымасць раскрыцца, праявіць сябе, рэалізаваць свой творчы патэнцыял. Праніклівае чытанне верша “Любоў маці!” нікога не пакінула абыякавым. Вельмі любіць дзяцей. На яе думку, педагог – гэта не прафесія, а прызванне. Гатова да змен і адкрыццяў. Калі на рабоце ўзнікаюць пытанні, раіцца з калегамі і сама можа параіць ім нешта інавацыйнае. Малады спецыяліст упэўнена, што яе прафесійная гісторыя толькі пачынаецца…
Лада Траўнікава, ветэрынарны ўрач ААТ “Рассвет імя К.П.Арлоўскага”. Мінчанка, але праца ў сельскай гаспадарцы яе не палохае. Свой прафесійны выбар яна зрабіла яшчэ ў дзяцінстве. Пасля прагляду фільма “Мухтар” зразумела, што будзе лячыць жывёлу. Лада прызналася, што яе ўразілі маштабы шматпрофільнай гаспадаркі, з цікавасцю ішла ў такі вялікі калектыў. Працуе дзяўчына на новай ферме ў Мышкавічах, хоць і нялёгка, але ёй падабаецца. Плануе развівацца ў сваёй прафесіі. “Любіце навакольную прыроду, любіце жывёлу, а я, калі што, вам дапамагу”, – звярнулася Лада да гледачоў.
Карына Янчанка, бухгалтар Жыліцкага дзяржаўнага сельскагаспадарчага каледжа. З дзяцінства любіць матэматыку, заўсёды захапляла тэма фінансаў. Працу бухгалтара лічыць даволі цікавай, яна развівае матэматычныя здольнасці, логіку, паляпшае памяць, фарміруе арганізаванасць і патрабуе вялікай адказнасці. “Мне пашанцавала, што я бухгалтар, – дзеліцца меркаваннем малады спецыяліст. – Спадзяюся, што стану паспяховым бухгалтарам, і мая кар’ера будзе ўдалай”. А яшчэ Карына добра чытае вершы. “Спадчына” Янкі Купалы ў яе выкананні прагучала вельмі пранікліва.
Анастасія Іванова, бухгалтар Жыліцкага дзяржаўнага сельскагаспадарчага каледжа. Лічыць выбар прафесіі важным крокам у жыцці кожнага чалавека: “Каб стаць па-сапраўднаму шчаслівым чалавекам, неабходна прайсці немалы шлях, пачынаючы ад прадумвання адказу на пытанне “кім быць?” да атрымання ведаў і вопыту для працы. Бухгалтар у лічбах бачыць і ўчора, і сёння, і заўтра”. Анастасія таксама добра чытае. “Варварства” Мусы Джаліля было выканана з глыбокім пачуццём і выразнасцю.
Таццяна Сямёнава, бухгалтар КСУП “Чырвоны баец”. Вельмі актыўная творчая асоба. Не ўпэўнена, што на першых кроках у прафесію кожны можа назваць яе любімай, ды і калі наогул прыходзіць гэтая любоў. “Магчыма, я не прыйшла ў сваю прафесію з любоўю, – адкрыта гаворыць Таццяна, – але набыла яе паступова”. Што ж, значыць любоў ужо ўсвядомленая, якая наступіла пасля практычнага знаёмства з прафесіяй. Нават танцавальны нумар, які дзяўчына выканала з такім майстэрствам і душой, быў пад музыку “Бухгалтар”.
Вікторыя Мітраховіч, спецыяліст па аказанні рознічных банкаўскіх паслуг ЦБУ №709 у г.Кіраўску ААТ “Беларусбанк”. Ураджэнка Кіраўшчыны. Пражыўшы ў Мінску 2 гады, зразумела, што лепш за наш раён нічога няма. Вікторыя задаволена сваім першым працоўным месцам: “Калектыў мяне прыняў добра. Усе дапамагаюць і тлумачаць тонкасці працы”. На конкурс дзяўчына прыйшла, каб паказаць, што банкаўскія работнікі не толькі працуюць з грашыма, яны адкрытыя, творчыя і шматгранныя асобы. І пацвердзіла гэтыя словы, прачытаўшы “Пакуль мы жывыя” Асадава.
Мікіта Гунаеў, трэнер-выкладчык Кіраўскай ДЮСШ. Малады чалавек упэўнены, што нарадзіўся ў цудоўнай краіне, у самым прыгожым і ўтульным горадзе Кіраўску. Прафесію трэнера лічыць адной з самых патрэбных і складаных. “Трэнер – гэта лад жыцця, – кажа спецыяліст. – Ад таго, што і як раблю я, будзе залежаць будучыня маіх выхаванцаў. Мая любімая работа спрыяе жаданню і магчымасці рэалізаваць сябе ў любімай справе”. Работа для Мікіты з’яўляецца і яго хобі, ён прадэманстраваў на сцэне свае спартыўныя здольнасці.
Анастасія Бяржаніна, настаўнік Мышкавіцкай СШ, выказала вялікую падзяку арганізатарам мерапрыемства і журы за прадстаўленую магчымасць праявіць сябе. Яна адзначыла, што ўдзел у конкурсе стаў для яе каштоўным вопытам, які
дазволіў не толькі прадэманстраваць свае навыкі, але і атрымаць новыя веды і знаёмствы. “Гэты конкурс натхніў мяне на далейшае прафесійнае развіццё і даў упэўненасць у сваіх сілах,” – дадала пераможца, выказваючы надзею, што і ў будучым такія мерапрыемствы будуць спрыяць росту маладых прафесіяналаў.
Настаўнікам жа Анастасія марыла быць з дзяцінства. Маладому спецыялісту падабаецца яе першае працоўнае месца. “Я рада, што вярнулася працаваць на сваю малую радзіму, бо я яе люблю, тут нарадзілася і вырасла. А прафесія настаўніка –
адна з самых складаных у свеце, – упэўнена дзяўчына. – Гэта не проста прафесія, а нешта большае, бо за партамі сядзіць будучыня нашай краіны. І якой будзе гэтая будучыня, залежыць у тым ліку і ад мяне”. Музычная кампазіцыя “Скажыце дзецям” у выкананні Анастасіі прагучала з неверагоднай пачуццёвасцю і нікога не пакінула абыякавым. Дзяўчына ўдзячна сваім дзецям (вучням), сям’і, калегам, усім родным, без дапамогі і падтрымкі якіх не было б перамогі.
У конкурсе, дзе так шмат таленавітых і амбіцыйных маладых спецыялістаў, перамагчы можа толькі адзін, і гэта патрабуе не толькі выдатных навыкаў і ведаў, але і здольнасці вылучыцца, прапанаваць нешта асаблівае. Лепш за ўсіх гэта атрымалася ў Анастасіі Бяржанінай. Другое месца заваявала Аліна Таранава. Трэцяе –
у Вікторыі Мітраховіч. Прыз сімпатый гледачоў дастаўся Таццяне Сямёнавай.
