Напярэдадні навагодніх святаў у Кіраўску адбылася яркая падзея ў рамках рэспубліканскай дабрачыннай акцыі “Нашы дзеці”. Традыцыйнае дзіцячае свята прайшло ў раённым Доме культуры пры ўдзеле кіраўніцтва раёна: старшыні райвыканкама Галіны Слабоднікавай, старшыні раённага Савета дэпутатаў Алены Сакадынец, намесніка старшыні райвыканкама Таццяны Бяляўскай. Мерапрыемства падарыла хлопчыкам і дзяўчынкам незабыўныя ўражанні.

Галіна Слабоднікава асабіста павіншавала юных жыхароў раёна з надыходзячымі зімовымі ўрачыстасцямі. Яна адзначыла, што дзеці Кіраўшчыны растуць разумнымі і таленавітымі, паспяхова ўдзельнічаюць у розных конкурсах, спаборніцтвах, алімпіядах, папаўняючы скарбонку дасягненняў раёна заслужанымі ўзнагародамі.
“Вам, дарагія дзеці, пашанцавала нарадзіцца і жыць у нашай цудоўнай Беларусі – мірнай і спакойнай краіне. У вас ёсць усе магчымасці атрымаць добрую адукацыю, займацца творчасцю, спортам, рэалізоўваць свае таленты, – падкрэсліла кіраўнік раёна. – Мы шчыра ганарымся вашымі дасягненнямі, упэўнена, што ў новым годзе іх будзе яшчэ больш!”. Галіна Паўлаўна выказала надзею, што Новы Год прынясе дзецям шмат радасці, шчасця і здзяйснення запаветных жаданняў. Пажадала ім любіць сваю Радзіму, шанаваць блізкіх, мір і згоду.
Да надыходзячага Новага года ад імя вучняў устаноў адукацыі раёна старшыні райвыканкама падарылі саламяныя навагоднія цацкі- абярэгі, зробленыя дзецьмі, як сімвал абароны, сонца, удачы, любві і дастатку. Галіна Паўлаўна адзначыла, што з такімі абярэгамі Кіраўшчына будзе яшчэ больш квітнеючай і паспяховай!
Для маленькіх гасцей быў створаны сапраўдны казачны свет. У цэнтры ўвагі стаяла прыгажуня-ёлка, вакол якой разгарнуліся вясёлыя гульні і танцы. Дзеці сустрэліся з героямі любімых казак, удзельнічалі ў захапляльных конкурсах. Асаблівую атмасферу свята дапамаглі стварыць творчыя калектывы сфер культуры і адукацыі раёна.
Такія мерапрыемствы не толькі дораць дзецям станоўчыя эмоцыі, але і садзейнічаюць умацаванню нацыянальных каштоўнасцяў, развіццю творчасці і выхаванню павагі да традыцый.
Акцыя “Нашы дзеці” ўжо стала неад’емнай часткай жыцця многіх сем’яў нашага раёна, як і ва ўсёй Беларусі, і кожны год яна дорыць радасць і шчасце сотням дзяцей. Гэтай унікальнай дабрачыннай ініцыятыве, якая праходзіць пад патранатам Прэзідэнта Рэспублікі Беларусь Аляксандра Рыгоравіча Лукашэнкі, у наступным годзе споўніцца 30 гадоў. За гэты час яна ператварылася ў сапраўдны марафон дабрыні.
Яўгенія БЯЛЬКО.
Фота аўтара.