Дзень аўтамабіліста і дарожніка – гэта нагода ў чарговы раз задумацца пра важнасць камфортных і бяспечных дарог, якія з’яўляюцца неад’емнай часткай нашага жыцця. Якасная дарога – не проста добрае асфальтавае пакрыццё, гэта магчымасць бесперашкодна дабірацца да месца працы, вучобы, адпачынку, ствараць сувязі і развіваць эканоміку. Кожны дзень мы карыстаемся вынікам намаганняў дарожнікаў, практычна не задумваючыся пра тое, колькі сіл прыкладваецца для стварэння і падтрымкі транспартных артэрый.
У Кіраўскім раёне стан вуліц і аўтамабільных дарог застаецца ў прыярытэце. Штодня дарожнікі працуюць без стомы, забяспечваючы надзейны і бяспечны дарожны рух у кожным кутку рэгіёну.
Калектыў філіяла КУП «Магілёўаблдарбуд»
ДРБУ-197, які ў гэтым годзе адзначыў 60-годдзе з дня стварэння арганізацыі, унёс значны ўклад у развіццё раёна і вобласці і працягвае сумленна працаваць над выкананнем пастаўленых задач. На сёння ў арганізацыі працуе крыху больш за 70 чалавек. Яны забяспечваюць тэхнічнае абслугоўванне і ўтрыманне 454,4 кіламетра аўтамабільных дарог, уключаючы асфальтаваныя, гравійныя і грунтовыя ўчасткі.

Адзін з аб’ектаў, над якім зараз працуе ДРБУ-197, – бягучы рамонт аўтамабільнай дарогі Лёўкавічы – Няптун. Мы наведалі будаўнічы ўчастак, дзе ідуць актыўныя работы па кладцы асфальтабетону. Прараб Віктар Кульша расказаў пра задачы на дадзеным этапе: «Нам трэба ўкласці 830 метраў асфальтабетону. Ужо зроблена аснова пад дарожнае адзенне. Застаецца пакласці 80 тон, а потым будзе ўкладвацца верхні слой».
На ўчастку работ мы сустрэлі машыніста катка самаходнага Дзмітрыя Гушчына, які працуе ў арганізацыі каля шасці гадоў. Спачатку ён быў дарожным рабочым, а потым вырашыў паспрабаваць сябе ў ролі машыніста. «Мне адразу спадабалася кіраваць катком, атрымалася – і я застаўся», – падзяліўся разважаннямі Дзмітрый Міхайлавіч. Як машыніст катка, ён адказвае за якаснае ўшчыльненне асфальта. Гэта адзін з ключавых этапаў для забеспячэння як мага большай працягласці эксплуатацыі дарожнага пакрыцця. За нядоўгі час Дзмітрый Гушчын змог зарэкамендаваць сябе надзейным работнікам, якога цэняць і кіраўніцтва, і калегі. За сваю сумленную працу напярэдадні прафесійнага свята ён узнагароджаны Ганаровай граматай КУП «Магілёўаблдарбуд». Такія ўзнагароды атрымалі і іншыя работнікі: трактарыст Павел Лапацінскі, дарожны рабочы Аляксандр Ставер, вадзіцель аўтамабіля Валерый Лук’янаў і машыніст аўтагрэйдзера Уладзімір Костка, які ўжо 12 гадоў працуе ў арганізацыі. Уладзімір Сяргеевіч займаецца грэйдзіраваннем дарог. Два гады таму ён перасеў за руль новага аўтагрэйдзера. «Вядома, на сучаснай дарожнай тэхніцы працаваць камфортна. Акрамя вялікай кабіны з добрым аглядам гэты аўтагрэйдзер мае і шэраг іншых пераваг, а галоўнае – работа выконваецца больш якасна», – расказаў машыніст.
Шэраг работнікаў ДРБУ-197 ушанаваны Падзячнымі лістамі КУП «Магілёўаблдарбуд»: інжынер па ахове працы Дзмітрый Юрчанка і дарожныя рабочыя Генадзь Міхалап, які працуе тут 9 гадоў, і Андрэй Каранкевіч, чый працоўны стаж у арганізацыі складае 23 гады. Андрэй Мікалаевіч з’яўляецца адным з найбольш вопытных работнікаў арганізацыі.
Работа дарожнікаў – карпатлівая, патрабуе фізічнай вытрымкі, прафесійных ведаў. Менавіта дзякуючы намаганням калектыву ДРБУ-197 і яго адданасці справе ў нашым раёне камфортныя і бяспечныя дарогі. Няхай яны заўсёды вядуць нас да новых поспехаў і магчымасцяў!
Яўгенія БЯЛЬКО.
Фота Алесі ПРЫГАЖАЕВАЙ.