У раёне наладжваецца акцыя “Альтэрнатыва”, мэта якой — высветліць, з якімі жыццёвымі цяжкасцямі сутыкаюцца грамадзяне, што вярнуліся з месцаў пазбаўлення волі, па магчымасці, дапамагчы ім рэабілітавацца ў грамадстве, стаць на шлях выпраўлення.
Правядзенне акцыі было ініцыіравана супрацоўнікамі крымінальна-выканаўчай інспекцыі РАУС яшчэ мінулага года, калі ў раёне пачасціліся выпадкі рэцыдыўнай злачыннасці. З таго часу для судзімых асоб рэгулярна наладжваюцца сустрэчы, гутаркі, “круглыя сталы” з удзелам прадстаўнікоў раённай улады, зацікаўленых стурктур, супрацоўнікаў райаддзела ўнутраных спраў.
Чарговая сустрэча ў рамках акцыі “Альтэрнатыва” адбылася нядаўна ў зале пасяджэнняў РАУС. Кіраўнік сектара занятасці ўпраўлення па працы, занятасці і сацыяльнай абароне райвыканкама Наталля Хахол расказала аб магчымых шляхах праца-ўладкавання судзімых грамадзян. З пачатку бягучага года за дапамогай у вырашэнні гэтага пытання ў сектар занятасці звярнулася 14 чалавек, 5 з іх былі працаўладкаваны.
Па словах Наталлі Анатольеўны, большасць раней асуджаных асоб проста не мае жадання працаваць і сумленным шляхам зарабляць сабе на жыццё. А між тым, зарэгістраваўшыся ў сектары занятасці, як беспрацоўныя, яны маюць магчымасць, пры небаходнасці, прайсці прафесійныю падрыхтоўку па розных рабочых спецыяльнасцях за дзяржаўны кошт на базе ліцэя №15 . Летась такой магчымасцю скарысталіся два чалавекі, сёлета — толькі адзін.
Можна штодзень прымаць удзел у аплачваемых грамадскіх работах, якія наладжваюцца на сельскагаспадарчых палетках раёна. Аднак з 14 раней асуджаных такім чынам зарабіць на жыццё выказалі жаданне толькі 5.
Запрошаныя на сустрэчу асуджаныя ж адзначылі, што жаданне працаваць у іх ёсць, аднак заробак часцей за ўсё не задавальняе жыццёвыя патрэбы. Як выствелілася ў працэсе гутаркі, многія з іх карыстаюцца выпадковымі заробкамі, разавымі падпрацоўкамі, некаторыя жывуць за кошт родных, у асноўным бацькоў…
Пасільную дапамогу ў вырашэнні жыццёвых праблем прапанавала псіхолаг раённага цэнтра сацыяльнага абслугоў-вання насельніцтва Таццяна Пугачова. Дарэчы, ва ўстанове можна атрымаць не толькі псіхалагічную, але і гуманітарную дапамогу, юрыдычную кансультацыю, высветліць, якім чынам можна аформіць дакументы на атрыманне дзяржаўнай адраснай дапамогі і інш.
Напрыканцы сустрэчы да запрошаных звярнуўся намеснік пракурора раёна Вячаслаў Чучулін: “Часта на падобных сустрэчах сутыкаешся з неразуменнем з боку запрошаных судзімых асоб. Хочацца адзначыць, што гэтую акцыю мы праводзім не для таго, каб вучыць кагосьці жыццю, а з мэтай пачуць і зразумець хвалюючыя праблемы, па магчымасці пасадзейнічаць іх вырашэнню. Аднак гэта зусім не значыць, што хтосьці будзе шукаць, куды працаўладкавацца судзімай асобе, дзе і як жыць, усё залежыць ад самаго чалавека, як гаворыцца, пад ляжачы камень вада не цячэ. Так, у жыццёвай біяграфіі маецца пункт “судзімы”, але гэта зусім не азначае, што гэты чалавек горшы за іншых, права на шанц выправіцца мае кожны, было б толькі жаданне”.
Яўгенія КАРАНКЕВІЧ.