Вучні сярэдняй школы №2 г.Кіраўска імя К.П.Арлоўскага наведалі знакавыя месцы Беларусі, якія пакінулі глыбокія ўражанні і дапамаглі атрымаць новыя веды.

Спорт, гісторыя, памяць

Рабяты пабывалі ў Раўбічах, наведалі музейную экспазіцыю зімовых відаў спорту, дзе пазнаёміліся з гісторыяй Рэспубліканскага цэнтра алімпійскай падрыхтоўкі па зімовых відах спорту і дасягненнямі нашых біятланістаў, фрыстайлістаў, хакеістаў, канькабежцаў, фігурыстаў. Незвычайным было ўбачыць вядомых спартсменаў і трэнераў. Адзінаццацікласнікам пашчасціла нават сфатаграфавацца са шматразовай чэмпіёнкай свету па біятлоне Аленай Зубрылавай (на фота у сярэдзіне). А як цікава было на свае вочы назіраць за трэніроўкай фрыстайлістаў. Майстэрства спартсменаў, дакладнасць рухаў, смелыя скачкі выклікалі ў рабят яркія эмоцыі.

Далей маршрут прывёў вучняў да Кургана Славы – сімвала гераізму і мужнасці абаронцаў Радзімы. І хоць яны прыйшлі сюды як турысты, знаходзячыся каля падножжа велічнага помніка, яны задумаліся пра мінулае, адчулі сувязь з тымі, хто аддаў сваё жыццё дзеля будучыні.

Завяршылася экскурсія ў мемарыяльным комплексе “Трасцянец” – месцы памяці, якое прымушае задумацца аб трагедыях вайны і каштоўнасці міру. Аповед настаўніка Валянціны Яскевіч, помнікі і сімволіка комплексу зрабілі глыбокае эмацыянальнае ўражанне.

Мемарыяльны комплекс “Трасцянец” – найбуйнейшы на тэрыторыі СССР і чацвёрты ў свеце лагер смерці (пасля Асвенцыма, Трэблінкі і Майданека). Ахвярамі фашысцкага канвеера смерці ў Трасцянцы сталі звыш паўмільёна чалавек – дарослых і дзяцей, савецкіх ваеннапалонных і грамадзянскіх асоб, людзей розных прафесій, веравызнанняў і нацыянальнасцяў.

– Экскурсія атрымалася насычанай, пазнавальнай і вельмі значнай, – падзялілася разважаннямі адзінаццацікласніца Кіра Еўдакімава. – Яна падарыла нам не толькі новыя веды, але і моцныя эмоцыі, прымусіла задумацца пра мінулае, сучаснасць і будучыню нашай краіны. Дапамагла адчуць яшчэ большы гонар за яе дасягненні і задумацца пра асабістую адказнасць за захаванне памяці і нацыянальных каштоўнасцяў.

Галіна РУСЕЦКАЯ.