Пасля снежнай і марознай зімы вясна адразу ж уступіла ў свае правы, радуе сонечнымі спрыяльнымі для работы ў полі дзянькамі.

Снег хутка растаў, вызваліўшы глебу, гатовую прыняць сейбітаў. Аграрыі Кіраўскага раёна прыступілі да новага сельскагаспадарчага сезона, і гэта прыкметна: па палях шпарка бегае сельскагаспадарчая тэхніка, яе гул змешваецца з вясёлым шчабятаннем птушак, якія лётаюць туды-сюды па чыстым ясным небе – у кожнага свае клопаты.

З мінулага тыдня комплекс вяснова-палявых работ стартаваў у філіяле СВК «Бераснёўскі» ААТ «Кіруючая кампанія холдынгу «Бабруйскаграмаш». У пятніцу, 20 сакавіка, рэдакцыйны аўтамабіль прыбыў на месца падзей: на полі каля Хаміч механізтар са шматгадовым працоўным стажам Віктар Скрыпуноў (на фота) закрываў вільгаць. «За дзень я апрацоўваю каля 40 гектараў глебы», – падзяліўся трактарыст-машыніст, паказваючы на друзлую зямлю, якая нібы дыхае пасля культывацыі.

Галоўны аграном «Бераснёўскага» Сяргей Ласенка расказаў, што гэта адзін з ключавых агратэхнічных прыёмаў у пачатку сяўбы, які дазваляе захаваць вільгаць у глебе і прадухіліць яе выпарэнне. Ужо ў суботу, 21 сакавіка, на гэтым участку стартавала сяўба. Пачаўлі з аўса, які зойме 50 гектараў.

Паралельна з работамі па закрыцці вільгаці ў гэты дзень у сельгасфіліяле актыўна вялася падкормка шматгадовых траў і азімых збожжавых культур. Сяргей Дрэнь лоўка кіраваў самаходным апырсквальнікам «Раса». «Гэтую тэхніку мы набылі летась, – расказаў ён. – Наогул, за пошнія пару гадоў машынна-трактарны парк у нас добра абнавіўся. На новай тэхніцы, вядома ж, працаваць адно задавальненне, дзякуючы яе высокай манеўранасці і прадуктыўнасці». Алег Грынфельд падвозіў напарніку ўгнаенні, своечасова забяспечваючы працоўны працэс неабходнымі рэсурсамі».

Работа кіпела і на іншых участках. Мехатрад у саставе Яўгена Міхалапа і Аляксандра Іванова ўносіў калійныя ўгнаенні на пасевы шматгадовых траў на полі каля Баравіцы. Адначасова рыхтаваўся насенны матэрыял, каб будучыя ўсходы былі здаровымі і моцнымі. За апрацоўку насення ад хвароб адказвае Мікалай Скрыпуноў.

Усяго ў СВК «Бераснёўскі» каля паўтары тысячы пасяўных плошчаў, з якіх 1160 гектараў займаюць азімыя культуры на збожжа, 100 гектараў – азімы рапс, 150 – азімае жыта на збожжа, 50 – свірэпіца на зялёны корм. Вытворчыя ўчасткі размешчаны ў Хамічах, Баравіцы, Негаўле, Ахоцічах, Гарадцы. Снег сышоў практычна з усіх палёў, засталіся толькі невялікія яго рэшткі на землях каля лесу.
Вясна ідзе, работа на палях кіпіць, Сяўба-2026 стартавала!

Яўгенія БЯЛЬКО.
Фота аўтара.