“Зялёнае жніво”, як называюць у народзе перыяд нарыхтоўкі кармоў для грамадскага статка, — той час, калі закладваецца падмурак пад будучае малако і мяса. Актыўна праходзіць гэтая кампанія ў сельгасарганізацыях раёна, у тым ліку і ў СВК “Добасна-агра”, дзе мы пазаўчора пабывалі.
Работы ў гаспадарцы вядуцца зладжана і адразу на некалькіх участках, чаму садзейнічае належная арганізацыя працы на ўсіх этапах. Радуе сяльчан той факт, што сёлета травы значна лепшыя, чым летась. Таму і настрой ёсць працаваць. Пра клапатлівыя адносіны да замацаванай за механізатарамі тэхнікі і гаварыць не прыходзіцца — гэта норма іх жыцця. Яны ведаюць, што ад яе спраўнасці, своечасовага і якаснага правядзення палявых работ, колькасці назапашаных кармоў залежыць эканамічная стабільнасць гаспадаркі. Зразумела, і іх заработная плата, якая, дарэчы, адчувальная. Расцэнкі высокія, кожны іх ведае. Усё разам узятае надае ўпэўненасці, абавязвае не спыняцца на дасягнутым. І што немалаважна: гэта ім па сілах.
Сёлета ў гаспадарцы плануюць нарыхтаваць 10300 т сенажу, 1250 т сена, прычым з першага ўкосу адпаведна — 7000 т і 600 т, закласці 5 сянажных траншэй. Па стане на 15 чэрвеня тут ужо маецца больш паловы запланаванага.
Трэба адзначыць, што ў параўнанні з мінулым годам травастой тут выдаўся добры, сенажаці неабходна ўбраць своечасова, каб назапасіць пад патрэбу сакавітых кармоў. А таму на “зялёнае жніво” кінута вялікая “армія” магутнай тэхнікі і механізатараў, якія кіруюць ёй. У пераважнай большасці гэта вопытныя “байцы”, загартаваныя на палявых работах.
На касьбе траў лідарства трымаюць механізатары Міхаіл Галомзік і Уладзімір Казлоўскі. Зграбае і варушыць валкі на трактары з граблямі Канстанцін Бязумаў, а ўжо потым правяленая маса здрабняецца падборшчыкамі. На іх старанна працуюць Фёдар Петрусёў і Канстанцін Калаткоў, Іван Панталонаў. Імкліва дастаўляюць зялёную масу да сянажных траншэй Аляксандр Міхлюк і Рыгор Шэлегаў, Станіслаў Хвясько, Яўген Кавалёў, Алег Бычкоў. Вынікова прасуе сена Віталь Палякоў.
Пабывалі мы і на малочна-таварнай ферме в.Пясцова, каб паназіраць за канчатковым працэсам нарыхтоўкі сенажу — закладкай яго ў траншэю. Тут стаяў гул рухавіка “Кіраўца”, якім кіруе яшчэ адзін “аксакал” сярод механізатараў гаспадаркі Уладзімір Скрыганаў. Умела трамбуе ён прывезеную з палёў зялёную масу. За правільнасцю выканання гэтай работы, захаваннем тэхналагічнага працэсу ўважліва сочаць адказныя асобы.
Як падкрэсліў галоўны аграном Андрэй Голубеў, усе, хто ўдзельнічае ў нарыхтоўцы, — сумленныя, нікога ўгаворваць на працу не даводзіцца. Могуць затрымацца на полі і звыш даведзенага часу. З такімі людзьмі прыемна працаваць.
…Хочаш не хочаш, а даводзіцца кіраўніцтву і спецыялістам сельгасарганізацыі паглядаць на неба ды прыслухоўвацца да прагнозаў сіноптыкаў. Але ні ў якім разе дабаснянцы не збіраюцца спасылацца на надвор’е, ды і час не чакае: кармоў неабходна нарыхтаваць пад поўную патрэбу, і астатнія палявыя работы трэба выканаць своечасова.
Таццяна
БАРАДЗІНА.
Фота
Максіма
МІКЕШЫНА.