У чарговы Дзень медыцынскага работніка, які адзначаецца ў гэтую нядзелю, ва ўсіх ёсць магчымасць яшчэ раз выказаць шчырыя, удзячныя словы ў адрас прадстаўнікоў самай гуманнай прафесіі на зямлі, якія стаяць на варце нашага здароўя, а часам выратоўваюць жыцці.
Напярэдадні прафесійнага свята медыкаў — наша размова з галоўным урачом цэнтральнай раённай бальніцы Аленай КРУЦЬКО, якая з’яўляецца членам Савета Рэспублікі Нацыянальнага сходу Рэспублікі Беларусь і працуе ў Пастаяннай камісіі па адукацыі, культуры і сацыяльным развіцці.
Алена Аляксееўна пачала гутарку з кадравага пытання і з задавальненнем адзначыла, што яно ў апошні час стаіць не так востра, як раней, і вырашаецца належным чынам:

— Кадравы састаў урачоў вузкіх спецыялізацый практычна ўкамплектаваны, няма толькі ўрача афтальмолага. На наступны год запланавана размеркаванне ў наш раён медработніка дадзенай спецыялізацыі. Працуе лор-урач, яго адсутнасць працяглы час была балючай праблемай.
Сёлета ў нашу ЦРБ размеркавана два ўрачы-тэрапеўты і педыятр, а таксама 13 сярэдніх медыцынскіх работнікаў — такой колькасці маладога папаўнення ў маёй практыцы яшчэ не было.
Хачу адзначыць, што асноўны касцяк калектыву – гэта вопытныя медработнікі, прафесіяналы сваёй справы. Высакароднай прафесіі медыка прысвяцілі жыццё сямейныя пары Латушкіных, Бурванаў, Жук. Прыбыўшы ў свой час пасля размеркавання ў Кіраўскую ЦРБ, шмат гадоў працуе тут А.Р.Дворкін. Граматны спецыяліст, актыўны член нашага калектыву, ветэран працы Т.І.Грыгорчык, яе дапамога ў дыягнастыраванні захворванняў неацэнная.
Адукаваныя, з прагрэсіўным мысленнем нашы маладыя кадры. Гэта сям’я Івана і Таццяны Трубкіных: ён — хірург, яна — гінеколаг (зараз у дэкрэтным водпуску). Педыятрычную службу раёна ўзначальвае Вольга Кішковіч, ураджэнка Кіраўшчыны, пасля заканчэння школы, далейшай вучобы ў медуніверсітэце вярнулася на малую радзіму і плённа працуе. Як і Дзмітрый Варацілкін, загадчык анестэзіёлага-рэаніматалагічнага аддзялення. Яго жонка Таццяна — урач-гінеколаг.
Спадзяюся, што нашы новыя кадры замацуюцца ў раёне, а іх праца стане важкім укладам ва ўмацаванне здароўя яго жыхароў.
Самае галоўнае, калектыў наш стабільны, яму многае па сілах як у прафесійнай дзейнасці, так і грамадскай рабоце, і ў добраўпарадкаванні тэрыторыі райбальніцы — гэта бачаць нашы пацыенты.
За добрасумленную працу з выпадку прафесійнага свята Ганаровай граматай райвыканкама ўзнагароджваецца медсястра Л.Я.Маркевіч, грашовай прэміяй — эканаміст В.А.Тарашкевіч.
Радуе, што паступова працягвае ўмацоўвацца матэрыяльна-тэхнічная база.
На службе медыкаў — новыя электронныя тэхналогіі. Актуальная задача — увядзенне электроннага рэцэпта, асваенне праграмы па выдачы лісткоў часовай непрацаздольнасці.
У сваім сёлетнім Пасланні беларускаму народу і Нацыянальнаму сходу Рэспублікі Беларусь Прэзідэнт А.Р.Лукашэнка падкрэсліў, што ахова здароўя застаецца сацыяльным прыярытэтам беларускай дзяржавы. У сусветным рэйтынгу па ўзроўні даступнасці для насельніцтва медыцынскіх паслуг Беларусь займае першае месца. Немалаважная задача, як адзначыў Кіраўнік дзяржавы, — павышэнне ўвагі да прафілактыкі захворванняў, фарміравання здаровага ладу жыцця.
Актуальнай застаецца дэмаграфічная праблема: на жаль, у нашым раёне сёлета смяротнасць значна перавышае леташні ўзровень.
Я не стамлюся паўтараць, што, у першую чаргу, самі людзі павінны надаваць увагу свайму здароўю, яго захоўванню і прадпрымаць для гэтага ўсе намаганні.
Напярэдадні прафесійнага свята медыцынскіх работнікаў хочацца пажадаць самага галоўнага багацця для чалавека — здароўя — усім, і ў першую чаргу, медыкам, якія стаяць на варце здароўя людзей, каб не гучала знаёмая фраза “сапожник без сапог”. Шчасця і дабрабыту маім калегам!
Размову вяла
Наталля ХАДАКОВА.