У мінулую суботу свой працяг знайшлі работы па навядзенні санітарнага парадку і добраўпарадкаванні нашага горада: на ўчастку ля вядомай усім крынічкі па вул.Арлоўскага, які ў апошні час дзякуючы ўкладу работнікаў раёна газазабеспячэння, іншых калектываў набыў новае аблічча, была наладжана пасадка саджанцаў рабіны і каліны.
У суботніку дзеля прыгажосці і ўтульнасці гэтага папулярнага ў кіраўчан месца прынялі ўдзел члены раённага выканаўчага камітэта, прэзідыума раённага Савета дэпутатаў, кіраўнікі працоўных калектываў райцэнтра і вучні гарадской гімназіі.
Старшыня райвыканкама У.У.Піскіжаў прыйшоў на суботнік разам з усёй сям’ёй: жонкай і двума сынамі. Пасадкай рабінава-калінавай кампазіцыі побач са старажытным Качэрыцкім паркам, адзначыў кіраўнік раённай вертыкалі ўлады, звяртаючыся да прысутных і, у першую чаргу, да прадстаўнікоў моладзі, працягваецца добраўпарадкаванне гэтага наведваемага жыхарамі месца, пачатае дзесятак гадоў таму. Задумка кампазіцыі з рабін па перыметры ўчастка і кустоў каліны ля новых альтанак — у тым, каб увосень, калі паспеюць ягады, яны чырванню сярод зеляніны радавалі вока, прыцягвалі ўвагу праязджаючых, і каб прыемна было адпачыць тут у вольныя хвіліны. А вучні, якія ўдзельнічаюць у работах, пакінуць аб сабе добрую памяць у выглядзе гэтых дрэў. У.У. Піскіжаў адзначыў, што яны са старшым сынам калісьці каля Буйніч пасадзілі дуб, і дрэва расце дагэтуль і будзе расці не адну сотню гадоў. Прыемна, калі аб чалавеку застаецца такая памяць. І гімназісты ўнясуць свой уклад у добраўпарадкаванне роднага горада: тое, куды ўкладзена ўласная праца, больш цэніцца і зберагаецца.
З прыўзнятым настроем і энтузіязмам і моладзь, і дарослыя капалі лункі, акуратна ўладкоўвалі ў іх саджанцы, затым падвязвалі да калочкаў. Няхай жа дрэўцы і кусты прымуцца і ўпрыгожаць гэты куточак нашага горада!