Горача зараз на сельгаспалетках буйнейшай гаспадаркі раёна — СВК «Рассвет» імя К.П. Арлоўскага: трэба якасна, а, галоўнае, у належныя агратэхнічныя тэрміны правесці восеньскія палявыя работы. Акрамя таго, што гаспадарка мае самыя вялікія ў раёне пасяўныя і ўборачныя плошчы, тут яшчэ спецыялізуюцца на вырошчванні агародніны і пладова-ягадных культур. 

З раніцы і да змяркання не змаўкае гул сельгастэхнікі на палетках, шчыруюць руплівыя працаўнікі, клапоцяцца аб вырашчаным ураджаі. А, як вядома, дзе старанная праца, там і добрыя вынікі. Пацвярджэннем таму — сёлетняя ўборачная кампанія збожжавых і зернебабовых культур: рассветацы намалацілі 12887 т збожжа (на 11% больш узроўню мінулага года). На круг атрымалася па 47,2 ц/га. У разрэзе культур найбольшую ўраджайнасць дала азімая пшаніца — 54 ц/га. Само ж жніво прайшло без надзвычайных сітуацый, зладжана і арганізавана. А старанная праца перадавікоў неаднойчы была адзначана заслужанымі ўзнагародамі. 8 экіпажаў камбайнераў намалацілі больш, чым па 1000 т збожжа, столькі ж вадзіцеляў перавезлі больш, чым па 1000 т на ачышчальна-сушыльныя комплексы і камбінаты хлебапрадуктаў.
Зараз рассветаўцы заняты ўборкай бульбы, цукровых буракоў, цыбулі, кукурузы на сілас, зборам яблыкаў, апрацоўваюць глебу і ўносяць арганічныя ўгнаенні пад ураджай будучага года, вядуць сяўбу азімых культур і іншае.
Па-ранейшаму актуальным застаецца назапашванне кармоў для грамадскага пагалоўя. Актыўна вядзецца закладка сіласу з кукурузы: ужо нарыхтавана 23700 т з неабходных 85000 т.
Радуюць сёлета ўраджайнасцю палеткі з канюшынай, частка якіх убіраецца на падкормку грамадскаму статку. Звяно механізатараў убірае канюшыну на полі за в.Цяса плошчай у 164 га. Пасля касілкі, якой кіруе вопытны механізатар Мікалай Белакурскі, застаюцца густыя пракосы травастою.
Неўзабаве прыдзе час убіраць кукурузу на зерне: яна цяпер знаходзіцца ў стадыі васкавой спеласці. Каб сабраць вырашчаны ўраджай без страт, трэба як след падрыхтаваць тэхніку, наладзіць і адрэгуляваць прыстаўкі. Усяго ж “каралеву палёў” неабходна ўбраць з плошчы звыш 3247 га.
Прыступілі ў гаспадарцы і да ўборкі “другога хлеба”. Бульбяныя палеткі сёлета займаюць 300 га. Для ўборкі бульбы маецца 5 камбайнаў. Частка сабранага ўраджаю пасля сартыроўкі будзе закладзена на захоўванне, штосьці адправіцца ў гандлёвыя кропкі сельгаскааператыву.
У ліку першых прыступілі рассветаўцы да ўборкі цукровых буракоў. Усяго ў гаспадарцы пад гэтую культуру адведзена 200 га. З кожнага гектара тут у сярэднім накопваюць па 420 ц. Убраныя караняплоды адпраўляюць на Асіповіцкі буракапрыёмны пункт Слуцкага цукроварафінаднага камбіната. Буракаўборачны камбайн даверылі адказным механізатарам Івану Кавалеўскаму і Юрыю Каранкевічу, якія працуюць на агрэгаце пазменна.
Кіпіць работа ў яблыневым садзе: паміж радамі рухаецца спецыяльны камбайн для збору сакавітай прадукцыі, куды працаўнікі акуратна складваюць спелыя плады. Увесь сабраны ўраджай знаходзіць свайго пакупніка: частка яго ідзе на экспарт і рэалізацыю праз магазіны, пэўная колькасць будзе за-кладзена ў агароднінасховішча.
Паралельна з іншымі работамі ўбіраецца цыбуля. Сёлета пад гэтую культуру адведзена плошча ў 40 га. Увесь працэс механізаваны. Вопытны механізатар Валерый Юркавец капае цыбулю з дапамогай спецыяльна прыстасаванага агрэгата. Па яго словах, сёлетні ўраджай лепш мінулагодняга.
Свайго часу чакаюць і іншыя сельгаскультуры — морква, капуста, сталовыя буракі.
У лепшыя агратэхнічныя тэрміны імкнуцца правесці рассветаўцы сяўбу азімых культур. У бягучым годзе яны зоймуць плошчу ў 2550 га. Па стане на ўчарашні дзень азімыя ў гаспадарцы пасеяны на 284 га.
Як бачна, работы ў рассветаўскіх працаўнікоў шмат. І вельмі важна правесці ўвесь іх комплекс якасна і своечасова, бо ад гэтага будзе залежаць паляпшэнне фінансавага стану гаспадаркі, і дабрабыту яе працаўнікоў.
Людміла СЯМЁНАВА.
Фота
Максіма МІКЕШЫНА.