Работы па ўборцы збожжавых культур у арганізацыях аграпрамысловага комплексу з’яўляюцца аднымі з самых адказных і напружаных у вытворчым календары. І з упэўненасцю можна сцвярджаць – хлебаробы дастойна вытрымалі свой галоўны экзамен – жніво.
Пераможцамі раённага спаборніцтва на ўборцы збожжавых і зернебабовых культур за 2016 год сталі старшы камбайнер Мікалай Дрозд і камбайнер Дзмітрый Кахновіч з СВК “Рассвет” імя К.П.Арлоўскага, завяршыўшыя сёлетняе жніво з вынікам у 1686 тон намалочанага збожжа.
Убраць вырашчаны хлеб – справа надзвычай адказная. Яе давяраюць самым руплівым і дбайным хлебаробам. І сёлетнія пераможцы – яркае таму пацвярджэнне.
Для Мікалая Дразда гэты працоўны год – юбілейны: тры дзесяцігоддзі назад ён упершыню прыйшоў на працу ў тагачасны калгас “Рассвет” імя К.П.Арлоўскага.
Ураджэнец Мышкавіч, пасля заканчэння школы ён навучаўся ў СПТВ №220 (зараз – ліцэй №15), атрымаў падсвечанне на права кіравання трактарам, потым была служба ў арміі. Пасля вяртання на малую радзіму і пачалася механізатарская праца ў роднай гаспадарцы.
Наступныя гады жыцця Мікалай Мікалаевіч прысвяціў працы на зямлі-карміцельцы. За свой механізатарскі стаж шмат з кім давялося працаваць: як з маладымі, так і з вопытнымі напарнікамі. На яго рахунку нямала дасягненняў.
У 2005 годзе, працуючы з механізатарам Аляксеем Каранкевічам, Мікалай Дрозд стаў лепшым у спаборніцтве сярод старшых камбайнераў сельскагаспадарчых арганізацый Магілёўшчыны і заняў другое месца ў рэспубліцы па выніках уборачнай кампаніі. На рэспубліканскіх “Дажынках” з рук Прэзідэнта Рэспублікі Беларусь Аляксандра Лукашэнкі атрымаў ключы ад новенькага аўтамабіля.
Дзве ўборачныя кампаніі Мікалай Дрозд шчыраваў разам з сынам, які зараз вучыцца на 2-м курсе Беларускай сельскагаспадарчай акадэміі і пасля яе заканчэння плануе прыйсці на работу ў “Рассвет”.
Першы сезон працуе Мікалай Дрозд у тандэме з не менш вопытным напарнікам – Дзмітрыем Кахновічам. Ён у гаспадарцы – 17 год. Пасля заканчэння мясцовай школы і СПТУ №220, у 1999 годзе малады хлопец прыйшоў на працу ў “Рассвет”. Увесь гэты час старанна і адказна выконвае ён свае абавязкі, таму ў кіраўніцтва гаспадаркі заўсёды на добрым рахунку. Дарэчы, Дзмітрый таксама перадае вопыт свайму сыну, але пакуль тэарэтычна. І да практыкі наўрад ці дойдзе справа, бо васьмікласнік марыць атрымаць дыплом іншай важнай прафесіі – пажарнага.
Як адзначаюць абодва механізатары, перамога ў раённым спаборніцтве стала для іх нечаканасцю. Нязначная колькасць паломак і прыпынкаў, надзейная падрыхтоўка тэхнікі, нядрэннае надвор’е — усё гэта дапамагло хлебаробам дасягнуць такога выніку.
“Быць першымі не толькі ў гаспадарцы, але і ў раёне, вядома, прыемна, — з усмешкай заўважыў Мікалай Дрозд. — Цяпер будзем працаваць з яшчэ большай стараннасцю і руплівасцю”.
А клопатаў у сяльчан не змяншаецца. Зараз героі жніва займаюцца сяўбой азімых збожжавых. І з гэтай механізатарскай справай Мікалай Дрозд і Дзмітрый Кахновіч справяцца. У гэтым упэўнены і кіраўніцтва “Рассвета”, і калегі па працы. Сельскагаспадарчыя “залікі” яны здаюць толькі на “выдатна”, бо па-іншаму – не ўмеюць.
Настасся ЛОГВІНАВА.