На базе СВК “Бераснёўскі” ААТ “Упраўляючая кампанія холдынга “Бабруйскаграмаш” прайшоў штогадовы раённы конкурс тэхнікаў па штучным асемяненні буйной рагатай жывёлы, арганізаваны ўпраўленнем сельскай гаспадаркі і харчавання райвыканкама сумесна з ДУСВП «Магілёўскае дзяржплемпрадпрыемства» і яго Кіраўскім філіялам.
Такі конкурс у раёне стаў традыцыйным. Ён праводзіцца ў мэтах павышэння прафесійнага майстэрства і павелічэння прэстыжу адной з самых запатрабаваных у жывёлагадоўчай галіне прафесій. На малочна-таварных комплексах і фермах раёна працуе 20 тэхнікаў-асемянатараў, удзел у конкурсе прыняло 17.

Звяртаючыся да прысутных, намеснік начальніка райсельгасхарчу па жывёлагадоўлі Іван Грышчанка падзякаваў спецыялістам па ўзнаўленні грамадскага статка за плённую і старанную работу, якая дае станоўчыя вынікі. Так, сельгасарганізацыямі раёна сёлета атрымана 7859 цялят (+673 да адпаведнага ўзроўню мінулага года, альбо 112%). Па гэтым паказчыку раён на працягу апошніх гадоў уваходзіць у лік лідараў сельгасарганізацый вобласці. Па словах Івана Леанідавіча, гэта сведчыць аб захаванні тэхналагічных параметраў і адказнасці спецыялістаў жывёлагадоўчай галіны.
Вітаючы ўдзельнікаў конкурсу, начальнік філіяла па Кіраўскім раёне ДУСВП «Магілёўскае дзяржплемпрадпрыемства» Галіна Шкрабава закцэнтавала ўвагу на значнасці правядзення работы па ўзнаўленні статка, бо ў гэтай справе не павінна быць абыякавасці. Важна не дапускаць ялавасці кароў, пакрываць цялушак і забяспечваць высокі выхад маладняку.
Конкурс складаўся з тэарэтычнай і практычнай частак. Майстэрства ўдзельнікаў члены камісіі ацэньвалі па некалькіх крытэрыях: правяралі веды тэхнікаў-асемянатараў па пытаннях правільнай арганізацыі іх рабочага месца, падрыхтоўкі інструментаў да асемянення, адтайвання і вызначэння якасці семені пад мікраскопам, ацэньвалі правільнасць вядзення журналаў ацёлаў і асемянення буйной рагатай жывёлы. Браліся ў разлік і вынікі практычнай работы тэхнікаў-асемянатараў.
У рабоце тэхніка-асемянатара дробязей не бывае — гэта думка не раз гучала ў ходзе конкурсу. Як даставаць паеты і гранулы з сасуда Дзюара, пры якой тэмпературы кіпіць азот, як рыхтуецца фізраствор — удзельнікі конкурсу падрабязна расказвалі пра ўсе “хітрасці” сваёй далікатнай прафесіі і па хвілінах распісвалі кожны крок. Яны нават удакладнялі, калі трэба апранаць чорны, а калі белы халат. І хаця строгае журы за любую памылку зніжала балы, агульныя вынікі ведаў, прадэманстраваныя канкурсантамі, аказаліся высокімі. Спецыялістаў са стажам, а большасць удзельнікаў — не навічкі ў сваёй прафесіі, цяжка было заспець знянацку “каверзнымі” пытаннямі.
Падвядзенне вынікаў праходзіла ўрачыста. Начальнік аддзела па ўзнаўленні ДУСВП «Магілёўскае дзяржплемпрадпрыемства» Ганна Савіна адзначыла высокі ўзровень ведаў канкурсантаў і падкрэсліла, што вытворчаць малака і мяса не ў апошнюю чаргу залежаць менавіта ад тэхнікаў-асемянатараў, а гэта значыць, што ў гэтай прафесіі павінны быць людзі, адданыя ёй цалкам.
Іван Грышчанка павіншаваў усіх з добрымі вынікамі і аб’явіў пераможцаў.
Па выніках конкурсу — колькасці набраных балаў за правільныя адказы па тэорыі, дэманстрацыю практычных навыкаў і вынікі работы за мінулы год пераможцам быў прызнаны Сяргей Стральцоў з СВК “Рассвет” імя К.П.Арлоўскага. Дарэчы, Сяргей на працягу некалькіх гадоў у конкурсе тэхнікаў-асемянатараў заўсёды ўваходзіць у тройку лідараў, гэта сведчыць аб адказнасці і стараннасці маладога спецыяліста, трывалых ведах і адданасці сваёй справе. Другое месца прысуджана Юліі Пархімчык з КСУП “Чырвоны баец”, трэцяе — Любові Гузарэвіч з КСУП “Жылічы”. Усе пераможцы былі ўзнагароджаны граматамі ДУСВП «Магілёўскае дзяржплемпрадпрыемства» і каштоўнымі падарункамі. Акрамя таго, падарункі ад райкама прафсаюза работнікаў АПК атрымалі ўсе ўдзельнікі мерапрыемства. Яшчэ адной адметнасцю прайшоўшага конкурсу стала тое, што згодна прадэманстраваных ведаў тэхнікам-асемянатарам былі прысвоены адпаведныя катэгорыі класнасці.
Падзякай кіраўніцтва ДУСПП «Магілёўскае дзяржплемпрадпрыемства» за шматгадовую добрасумленную працу, высокія вытворчыя паказчыкі па ўзнаўленні грамадскага статка была адзначана Галіна Шкрабава.
Зараз Сяргей Стральцоў і Юлія Пархімчык рыхтуюцца да ўдзелу ў абласным конкурсе тэхнікаў-асемянатараў, на якім ім давядзецца абараняць гонар нашага раёна.
Людміла СЯМЁНАВА.
Фота аўтара.