Кіраўчане — у ліку лепшых цяжкаатлетаў вобласці

У Магілёве прайшла абласная спартакіяда па цяжкай атлетыцы сярод выхаванцаў дзіцяча-юнацкіх спартыўных школ 2002-2004 гадоў нараджэння.

Удзел у спаборніцтвах прынялі прадстаўнікі з 7 раёнаў Магілёўшчыны. Удалым можна лічыць выступленне юных цяжкаатлетаў Кіраўскай ДЮСШ. Усе заяўленыя пяцёра нашых штангістаў, якія займаюцца пад кіраўніцтвам трэнераў Кірыла Іваніцкага і Андрэя Асташова, дастойна прадставілі раён і занялі высокія месцы. У скарбонцы кіраўчан адразу тры “бронзы”, здабытыя ў цяжкай канкурэнтнай барацьбе. Так, на трэцюю прыступку п’едэстала ўзняліся Уладзіслаў Міхалап (вагавая катэгорыя да 42 кг) з СШ №1, Арцём Чорны (в.к. да 45 кг) з Любоніч і яго аднасяльчанка Паліна Лазаковіч (в.к. да 53 кг). Крыху не пашчасціла яшчэ дваім нашым хлопцам. У вагавай катэгорыі да 38 кг Мікіта Гунаеў з СШ №1 спыніўся ў кроку ад п’едэстала: ён — чацвёрты. А ў барацьбе з сапернікамі вагой да 56 кг Станіслаў Еўдакімаў з Любоніцкай СШ паказаў пяты вынік.
І ўсё ж падстаў да засмучэння ні ў каго няма. Плануецца, што ўсе пяцёра нашых штангістаў у лістападзе будуць прадстаўляць Магілёўскую вобласць на рэспубліканскіх спаборніцтвах сярод спецыялізаваных спартыўных устаноў (ДЮСШ). Так што зараз нашы рабяты інтэнсіўна трэніруюцца.
Валерый РАЗУМЕЙКА, намеснік дырэктара ДЮСШ.