Пазаўчора ў рэдакцыю зайшла кіраўчанка Галіна Іваніцкая і расказала аб тым, як яе падтрымліваюць людзі маральна і матэрыяльна пасля здарыўшайся бяды: у яе доме днямі здарыўся пажар. Гаспадыня, якая на той момант была ў сына ў г.Гомелі, засталася без адзення, абутку. У адначассе агонь знішчыў усё нажытае. Сталая жанчына (у бягучым годзе яна адзначыла свой 80-гадовы юбілей) не пераставала называць прозвішчы кіраўчан, у тым ліку і суседзяў, асабліва Кушнераў, якія давалі ёй грошы, адзенне, неабходныя рэчы.

Нездарма кажуць, што адзін у полі не воін, асабліва калі напаткала бяда. І кожнае добрае слова, учынак вельмі патрэбныя ў дадзеным выпадку. Здаецца, жыццё закончылася, а рукі не падымаюцца за штосьці брацца. Толькі блізкія і староннія людзі, якія ўсё душой перажываюць разам з чалавекам, які перанёс гора, здольныя ўсяліць веру ў лепшыя перамены. І гэта прыбавіла жанчыне сіл і жадання аднаўляць пашкоджаны агнём дом.
Начальнік раёна электрасетак Рыгор Алдашкін выдзеліў электраманцёраў для замены старой электраправодкі. У раённым цэнтры сацыяльнага абслугоўвання насельніцтва прадставілі неабходныя рэчы. Былі тэлефонныя званкі з канкрэтнымі прапановамі і з райвыканкама, прадстаўніцтва Белдзяржстраху па Кіраўскім раёне і іншыя.
А больш за ўсё Г.К.Іваніцкая ўдзячная Аляксею Каранкевічу, які жыве непадалёку па зав.Пушкінскаму. Праходзячы міма яе дома, юнак заўважыў дым, які выбіваўся з-пад даху. Не губляючы ні хвіліны, Аляксей кінуўся да бліжэйшага дома, перапрыгнуў цераз агароджу і пастукаў у дзверы да Ярашэвічаў. Гаспадары адразу ж патэлефанавалі ў раённы аддзел па надзвычайных сітуацыях.
А далей ужо выратавальнікі пад кіраўніцтвам Максіма Антоненкі і Юрыя Біганскага змагаліся з агнём. Дзякуючы зла-джаным дзеянням, уменню і высокаму прафесіяналізму Яўгена Саўчанкі, Сяргея Архіпенкі, Сяргея Бабіча, Аляксандра Булачкіна дом, нягледзячы на пашкоджанні, удалося ўсё ж зберагчы.
Жанчына расказала, як яна разам з маці жыла ў гады вайны, як затым бацькі адбудоўвалі згарэўшы дом, як пазней разам з мужам узводзілі свой дом у райцэнтры, як з дзецьмі добраўпарадкоўвалі прыдамавую тэрыторыю. Усё гэта імгненна прайшло перад вачамі пасля таго, як суседзі патэлефанавалі ёй і паведамілі страшную вестку аб пажары. У тэрміновым парадку Іваніцкія выехалі ў Кіраўск, тут ім і расказалі, як усё адбылося.
Таццяна БАРАДЗІНА.