Падчас правядзення лістападаўскага Адзінага дня інфармавання ў сустрэчы з калектывам райбальніцы, акрамя інфармацыйна-прапагандысцкай групы райвыканкама, прынялі ўдзел члены групы Магілёўскага аблвыканкама: намеснік начальніка Магілёўскага УУС Аляксандр Сяргееў і першы сакратар абласнога камітэта ГА “БРСМ” Павел Алекса.

Аляксандр Сяргееў прыбыў з прыемнай місіяй: ён уручыў Падзячны адрас кіраўніцтва УУС медсястры паліклінікі Алене Белаглазавай, сын якой Аляксандр паспяхова служыць у міліцыі — участковым інспектарам Кіраўскага РАУС. Як падкрэсліў госць, традыцыя ўшаноўваць бацькоў супрацоўнікаў у рэгіёнах, калі праходзяць Адзіныя дні інфармавання, трывала замацавалася ў іх упраўленні, а таксама адзначыў ролю сям’і ў выхаванні лепшых чалавечых якасцей. Так, Аляксандр Белаглазаў, закончыўшы Магілёўскі інстытут міліцыі МУС, добрасумленна і адказна нясе службу, зарэкамендаваў сябе са станоўчага боку, праяўляе настойлівасць, прынцыповасць, уважлівы да людзей, што, безумоўна, важна для ўчастковага інспектара. У тым, што сын вырас такім, вялікая заслуга маці Алены Цімафееўны. Яна 28 год працуе ў ЦРБ, і, па водгуках кіраўніцтва, вельмі адказны і прафесійны работнік.
У ходзе сустрэчы Аляксандр Сяргееў праінфармаваў прысутных пра аператыўнае становішча ў вобласці і нашым раёне, зрабіў акцэнт на важных напрамках прафілактычнай работы.
Затым былі разгледжаны тэмы Адзінага дня інфармавання. Асноўную з іх — “Забеспячэнне насельніцтва якасным і даступным жыллём — важны накірунак сацыяльнай палітыкі беларускай дзяржавы” асвятліла начальнік аддзела архітэктуры і будаўніцтва райвыканкама Галіна Басак. Яна падкрэсліла, што жыллё — гэта адна з базавых каштоўнасцей, якія забяспечваюць адчуванне эканамічнай стабільнасці і бяспекі, а таксама стымулююць да прадукцыйнай працы. Таму пытанне забеспячэння грамадзян якасным і даступным жыллём знаходзіцца на пастаянным кантролі ў кіраўніцтва нашай дзяржавы.
У Беларусі, працягвала Галіна Басак, жыллёвае будаўніцтва актыўна працягваецца, хаця і ў некалькі меншых аб’ёмах, чым планавалася. Гэта звязана з тым, што на змест, формы і механізмы рэалізацыі жыллёвай палітыкі непасрэдны ўплыў аказваюць макраэканамічныя ўмовы, якія складаюцца ў нашай краіне.
Была звернута асаблівая ўвага на пытанне жыллёвага будаўніцтва на Кіраўшчыне. Так, забяспечанасць жыллём у нашым раёне складае 42,6 м2/чал., па вобласці — 33,1м2/чал., па рэспубліцы — 26,3 м2/чал.
У 2011-2015 гадах у раёне ўведзена ў эксплуатацыю 32459 м2 жылля, у тым ліку: з дзяржпадтрымкай — 10787 м2, з іх па дзяржзаказу — 3752 м2; 256 кватэр агульнай плошчай 15500 м2; 1750 м2 для мнагадзетных сем’яў; 15869 м2 індывідуальных жылых дамоў (каля 49% ад агульнага ўводу ў эксплуатацыю); 718 м2 — за кошт бюджэтных сродкаў.
За кошт сродкаў насельніцтва ўведзена ў эксплуатацыю 13700 м2 (42,2% ад агульнага ўводу жылля).
На будаўніцтва жылля накіравана 99,5 млрд. руб., у тым ліку льготных крэдытаў — 81,5 млрд. руб.
У мінулай пяцігодцы быў пакладзены пачатак будаўніцтву па дзяржаўным заказе і фарміравання фонду жылых памяшканняў камерцыйнага выкарыстання.
У цяперашні час у горадзе вядзецца будаўніцтва 20-кватэрнага жылога дома па дзяржзаказу.
У апошнія гады назіраецца тэндэнцыя павышэння інтарэсу грамадзян да індывідуальнага жыллёвага будаўніцтва. Падбіраюцца тэрыторыі пад яго, фарміруецца пералік свабодных зямельных участкаў — інфармацыя аб гэтым размяшчаецца на сайце райвыканкама і стэндах. Дарэчы, у раёне няма чаргі на атрыманне зямельнага ўчастка пад індывідуальнае жыллёвае будаўніцтва.
Галіна Басак закранула іншыя аспекты тэмы, у прыватнасці, прадастаўлення дзяржаўнай падтрымкі.
Развіццё жыллёвага будаўніцтва ў нашай рэспубліцы ў 2016-2020 гадах, адзначыла дакладчык, будзе праходзіць у адпаведнасці з агульнай канцэпцыяй развіцця эканомікі краіны, якая прадугледжвае скарачэнне долі бюджэтнага фінансавання і пашырэнне выкарыстання пазабюджэтных крыніц.
У ходзе сустрэчы было абмеркавана пытанне “Датычыцца кожнага…” (да 1 снежня — Сусветнага дня барацьбы са СНІДам), а таксама барацьбы з наркаманіяй.
Намеснік начальніка аддзела адукацыі, спорту і турызму райвыканкама Наталля Маісеенка праінфармавала аб праводзімай рабоце па прафілактыцы сямейнага насілля, абароне правоў і законных інтарэсаў непаўналетніх.
Інфармацыйна-прапагандысцкія групы райвыканкама правялі сустрэчы ў іншых працоўных калектывах: пад кіраўніцтвам першага намесніка старшыні райвыканкама, начальніка райсельгасхарчу Аляксандра Адамава — у КСУП “Чырвоны баец”, намесніка старшыні райвыканкама Таццяны Бяляўскай — РАНС, намесніка старшыні райвыканкама Вячаслава Нявінскага — ААТ “ПМК-97 Вадбуд”, кіраўніка спраў райвыканкама Алены Сакадынец — раённым аддзяленні Дэпартамента аховы, старшыні райкама прафсаюза работнікаў АПК Віктара Ставера — МТФ “Пацава Слабада” РАПТЗ і інш. Падчас сустрэч іх удзельнікі мелі магчымасць задаць пытанні на хвалюючыя тэмы.
Наталля ХАДАКОВА.
Фота аўтара.