Завяршыўся чарговы этап Кубка свету па веласпорце, які праходзіў у амерыканскім Лос-Анджэлесе. Удзел у ім прымаў былы выхаванец Кіраўскай ДЮСШ Раман Цішкоў, якога на сённяшні дзень называюць галоўным мнагаборцам Беларусі.

Задача перад Раманам стаяла няпростая: як мага лепей выступіць у омніўме — мнагаборстве, якой складаецца адразу з чатырох розных гонак, якія пры гэтым усе праходзяць у адзін дзень. Што і казаць, вынослівасць патрэбна жалезная…

Першая гонка — скрэтч — задалася ў Рамана не зусім так, як хацелася б. Фінішаваў наш паўпрэд з 11-м рэзультатам. Затое ў тэмпа-гонцы змог паправіць справы вельмі істотна. Раман выйграў 10 (!) спрынтаў і заняў другое месца. Па-майстэрску прадстаўнік Кіраўшчыны правёў і гонку з выбываннем, замкнуўшы тройку прызёраў. Перад заключнай групавой гонкай Раман Цішкоў ушчыльную наблізіўся да лідараў, уступаючы 8 ачкоў ідучаму на першым месцы паляку і ўсяго толькі 4 — шведу, які размясціўся на трэцяй пазіцыі. Здавалася, адыграць такую мізэрную перавагу не складзе цяжкасцей. Але крыўдны і нечаканы завал падчас апошняй гонкі дня, у які, на жаль, трапіў і Раман, адсунуў беларуса на 8-е месца. Здавалася б, і зусім дастойнае, але ж была магчымасць выступіць лепей…

На наступны дзень адбылася самая, бадай, відовішчная, але і самая экстрымальная гонка, парная — 30-кіламятровы мэдысан з 12-цю прамежкавымі фінішамі. Раман Цішкоў выступаў у пары з земляком-беларусам, пераможцам скрэтча на гэтым жа этапе Кубка свету Яўгенам Каральком. Нашы хлопцы праявілі сябе на высокім узроўні, заняўшы  высокае 5-е месца.

Зараз у агульным заліку Кубка свету ў омніуме Раман займае 17-е месца. Бліжэшыя старты — на Чэмпіянаце свету, да якіх наш велагоншчык актыўна рыхтуецца.

Аляксандр ХАХЛОЎ.