Колькасць грамадзян, якія займаюцца рамесніцтвам з кожным годам толькі павялічваецца. Гэты від дзейнасці дазваляе з дапамогай свайго хоббі не толькі зарабляць грошы, але і афіцыйна прымаць удзел у фінансаванні дзяржрасходаў і такім чынам не плаціць збор згодна Дэкрэта №3 “Аб папярэджанні сацыяльнага ўтрыманства”.

Падрабязней аб занятасці рамесніцкай дзейнасцю і аказанні падтрымкі для яе развіцця, расказала рэдактару інтэрнет-рэсурса рэдакцыі «Кіраўца» загадчык сектара занятасці ўпраўлення па працы, занятасці і сацыяльнай абароне райвыканкама Людміла ПІМОШЫНА:

Рамеснай прызнаецца дзейнасць, якая не з’яўляецца прадпрымальніцкай, па вырабе і рэалізацыі тавараў, выкананні работ, аказанні паслуг з прымяненнем ручной працы і інструмента, у тым ліку электрычнага, якая ажыццяўляецца самастойна, без прыцягнення іншых фізічных асоб па працоўных або грамадзянска-прававых дагаворах, накіраваная на задавальненне бытавых патрэб грамадзян. Да яе адносяцца: кавальская справа (за выключэннем дзейнасцi па вырабе камінных рашотак, лесвіц, платоў), ручное вязанне, карункапляценне, макрамэ, ручная вышыўка, выраб свечак, роспіс па дрэве, тканіне, шкле і кераміцы, выраб, завострыванне і рамонт сельскагаспадарчага і садова-агароднага інструменту і яго частак, выраб прадметаў і іх частак для асабістых (бытавых) патрэб грамадзян (гаспадарчага посуду і кухоннага інвентару з гліны, дрэва і іншых драўляных матэрыялаў, вырабаў з саломы, дзікарослых раслін, сінтэтычнай стужкі, за выключэннем мэблі, драўляных бочак, чанаў, кадак і іншых бандарных вырабаў і іншае.  Поўны пералік відаў рамеснай дзейнасці можна знайсці ва Указе Прэзідэнта Рэспублікі Беларусь №225.

Рамеснікі маюць права адначасова (з захаваннем устаноўленых заканадаўствам умоў) ажыццяўляць дзейнасць у якасці індывідуальнага прадпрымальніка, быць удзельнікам сельскагаспадарчага таварыства, работаць па найме і іншае. Да таго ж, для заняткаў рамеснай дзейнасцю можна выкарыстоўваць жылое памяшканне, якое будзе служыць майстэрняй. Пры гэтым, павінны быць захаваны санітарныя, тэхнічныя і прыродаахоўныя патрабаванні, а таксама правілы пажарнай бяспекі.

Беспрацоўным грамадзянам, якія стаяць на ўліку ў сектары занятасці, для арганізацыі самазанятасці аказваецца дзяржаўная фінансавая падтрымка. Пражываючым у горадзе — у памеры 11-кратнай велічыні бюджэту пражытачнага мінімуму ў сярэднім на душу насельніцтва, дзейнічаючага на дату заключэння органамі па працы, занятасці і сацыяльнай абароне райвыканкама з беспрацоўным дагавора аб прадастаўленні субсідыі, у сельскай мясцовасці — у памеры 15-кратнай велічыні. 

Рамесны збор складае 1 базавую велічыню ў год (дзейнічае на момант яго выплаты). Гэты памер прымяняецца ў незалежнасці ад колькасці відаў рамесніцтва, якімі займаецца чалавек. Збор выплачваецца да пачатку рамеснай дзейнасці. Так, напрыклад, рамеснікі, якія выплацілі збор за 2017 год і жадаюць працягнуць сваю рамесную дзейнасць у 2018 годзе, павінны заплаціць збор не пазней 28 снежня 2017 года.

Рамеснікі, якія ажыццяўляюць сваю дзейнасць, пры ўмове аплаты адпаведнага збору ў падатковай інспекцыі, не прызнаюцца плацельшчыкамі збору на фінансаванне дзяржаўных расходаў у адпаведнасці з Дэкрэтам №3.

У мінулым годзе ўпраўленнем па працы, занятасці і сацыяльнай абароне райвыканкама выдадзена 2 судсідыі для арганізацыі грамадзянамі рамеснай дзейнасці.