У Кіраўску выбралі лепшую мнагадзетную сям’ю года
У Цэнтры вольнага часу прайшоў конкурс “Мнагадзетная сям’я года”. Ён праводзіцца ў межах выканання праграмы “Сям’я і дзяцінства” да комплексу мерапрыемстваў па рэалізацыі ў раёне Дзяржаўнай праграмы “Здароўе народа і дэмаграфічная бяспека Рэспублікі Беларусь” на 2016-2020 гады. Мэты мерапрыемства – умацаванне духоўна-маральных асноў сям’і, адраджэнне і прапаганда сямейных каштоўнасцей і традыцый.
Гэты конкурс звычайна выклікае ў журы, балельшчыкаў, усіх, хто прыйшоў падтрымаць удзельнікаў, масу шчырых эмоцый, пазітыву і суперажыванняў за кожнага канкурсанта, бо яны — рознаўзроставага ўзроўню, у тым ліку і самыя маленькія члены сем’яў, якія, па меры магчымасцей, ад усёй душы дапамагаюць мамам і татам, старэйшым брацікам і сястрычкам спаборнічаць за званне самай паспяховай сям’і.
У сёлетнім конкурсе прымала ўдзел пяць мнагадзетных сем’яў з розных куткоў раёна: Русанавых з г.Кіраўска, Філімонавых і Сакабіцкіх з аг.Мышкавічы, Садоўскіх з в.Чыгірынка, Вараб’ёвых з аг.Баравіца.
Усіх прысутных вітала намеснік старшыні райвыканкама Таццяна Бяляўская, якая адзначыла, што сям’я — гэта самае каштоўнае ў жыцці кожнага з нас. Гэта блізкія і родныя людзі, тыя, каго мы любім, пра каго клапоцімся, з каго бярэм прыклад, каму жадаем дабрыні і шчасця. Першыя крокі дзяцей, іх усмешкі, першыя поспехі — гэта адметныя моманты ў жыцці сем’яў. Вялікая праца і высокая адказнасць на тых бацьках, якія вядуць сваіх дзяцей па жыцці, дапамагаюць знайсці сваё месца, прызванне.
Таццяна Бяляўская падкрэсліла, што нашай дзяржавай аказваецца істотная падтрымка сем’ям і, у першую чаргу, мнагадзетным. На Кіраўшчыне такіх сем’яў нямала. У іх найбольш востра адчуваецца пачуццё калектывізму, жаданне дасягнуць лепшага, камандны дух, што немалаважна і для конкурсу “Лепшая мнагадзетная сям’я года”.
Першы этап “Візітная картка” дазволіў больш даведацца пра кожную сям’ю.
…На сцэну выйшлі Максім і Анастасія Русанавы з вялізнымі рукзакамі за плячамі, а з імі — старэйшы сын Арцём. Некаторыя падумалі: магчыма, астатнія дзеці не рашыліся паказацца на публіцы? Але праз хвіліны гледачы пераканаліся, што паняцце “не рашыліся” — гэта не для сям’і Русанавых. Яўгенію і Дарыну бацькі дасталі з… рукзакоў, прычым дочкі былі ў самым вясёлым настроі: ім не прывыкаць да турысцкага жыцця, бо з малых гадоў суправаджаюць бацькоў на турзлётах, “вылазках” на прыроду. Мама і тата працуюць настаўнікамі ў СШ №1: яна — па фізвыхаванні, ён — па працоўным навучанні. Дзе сур’ёзна, дзе жартоўна расказалі малодшыя Русанавы аб любові таты да падарожжаў, мамы — да спорту (дарэчы, Анастасія выступала на спаборніцтвах міжнароднага ўзроўню па лёгкай атлетыцы ), аб іншых сваіх прыхільнасцях. А тата Максім яшчэ і праспяваў пад гітару. Сваім выступленнем сям’я працвердзіла свае ж словы: “Мы — непаўторныя!”.
Клапатлівымі і ўважлівымі да жонкі і мамы Вольгі паказалі сябе ў інсцэніроўцы з сямейнага жыцця яе муж Артур і дзеці Ілья, Арцём і Соф’я Філімонавы. Маўляў, пакуль мамуля адпачывае, зробім усе справы, прыгатуем вячэру! Трэба адзначыць, Ілья тут спаўна прадэманстраваў свае артыстычныя здольнасці, нездарма наведвае тэатральны гурток.
“Наша шчасце — гэта нашы дзеці!” — адзначылі бацькі, а ўсе разам выканалі песню, у якой былі словы, вынесеныя ў загаловак гэтага матэрыялу.
Дружнай, згуртаванай паказала сябе сям’я Садоўскіх: тата Леанід, мама Наталля, дзеці Дар’я, Арцём і Андрэй — ва ўсіх справах яны — разам, дапамагаюць
адзін другому, і адпачынак умеюць наладжваць. Дарэчы, галава сям’і — перадавы механізатар СГФ “Чыгірынка”, партрэт якога неаднаразова быў на старонках раённай газеты “Кіравец”. Як і галава сям’і Сакабіцкіх — Дзяніс — лепшы вадзіцель ААТ “Рассвет імя К.П.Арлоўскага”. З гонарам гаварылі дзеці пра татавы ўзнагароды — дыпломы і Ганаровыя граматы, пра свае поспехі і захапленні. Жонка Кацярына, дзеці Уладзіслава, Серафіма, Ягор дапаўнялі адзін другога.
Сям’я Аляксандра і Аксаны Вараб’ёвых з Баравіцы выступала на конкурсе з малодшымі сынамі Максімам і Яраславам, бабуляй Таццянай, старэйшы Саша ў гэты дзень прымаў удзел у абласных спаборніцтвах па плаванні. Пра сямейныя каштоўнасці яны расказалі з дапамогай цікавага фотаальбома.
Па водгуках сем’яў, усе таты — майстравыя, працавітыя, любая хатняя справа ім па плячы, мамы — клапатлівыя, сапраўдныя гаспадыні і дарадчыцы, а дзеці — таленавітыя, маюць шмат захапленняў, а таксама яны — надзейныя памочнікі бацькам, у тым ліку і па догляду малодшых брацікаў і сястрычак, якіх вельмі любяць.
Дадатковыя звесткі пра жыццёбыццё сем’яў гледачы атрымалі з невялікіх відэаролікаў пад агульнай назвай “Утульны дом”.
Калі адгучалі апладысменты і авацыі, адрасаваныя ўсім удзельнікам, распачаліся наступныя этапы конкурсу. Зразумела, не абышлося без кулінарнага “Сямейны пірог”. Усе парадавалі сваімі кулінарнымі шэдэўрамі, прадставілі іх, нават падзяліліся рэцэптамі.
Наступны этап насіў рамесніцкі характар: трэба было прадэманстраваць створанае загадзя сямейнае дрэва. Гэтую і іншыя творчыя работы сем’яў усе ўбачылі ў фае Цэнтра вольнага часу, высока ацанілі здольнасці ўдзельнікаў. Уражваючым сваім афармленнем і маштабамі было сямейнае дрэва Русанавых. Яны і перамаглі ў гэтай намінацыі. А таксама сталі пераможцамі па выніках конкурсу. На другім месцы — Філімонавы, на трэцім — Сакабіцкія. У намінацыях “Самая дружная сям’я” вылучыліся Садоўскія, “Сямейны пірог” — Вараб’ёвы.
Удзельнікі атрымалі дыпломы адпаведных ступеней, каштоўныя падарункі, заахвочвальныя прызы.
У зале панавалі пры ўзняты, святочны настрой і самыя пазітыўныя эмоцыі.
Сям’і Русанавых прадстаіць адстойваць гонар Кіраўскага раёна на абласным конкурсе “Мнагадзетная сям’я года”. Няхай ім спадарожнічае поспех!
Наталля ХАДАКОВА.
Фота
Максіма МІКЕШЫНА.