Мы прадстаўляем увазе чытачоў сапраўдную гордасць Кіраўшчыны — залатых медалістаў 2017 года! Гэтыя дзяўчаты на працягу адзінаццаці гадоў настойліва набывалі веды,  рэалізоўвалі свае таленты, неардынарныя здольнасці і магчымасці, дасягалі поспехаў і вышынь.

Веалета Бяляўская, гімназія г.Кіраўска.

Зарэкамендавала сябе як адораная вучаніца, якая валодае лагічным мысленнем, творчым падыходам да вырашэння задач. Сацыяльна дарослая, адказная за свае дзеянні, самастойная ў прыняцці рашэнняў, праўдзівая, прынцыповая, здольная адстойваць свае погляды і перакананні.
Неаднаразова станавілася пераможцай другога этапу рэспубліканскіх алімпіяд па беларускай мове і літаратуры, рускай мове і літаратуры. Пераможца рэспубліканскага адкрытага конкурсу дзіцячага малюнка “АрхНавацыя-2014” у намінацыі “Архітэктурнае макетаванне”.
Актыўна займаецца спортам, з’яўляецца членам маладзёжнай зборнай Рэспублікі Беларусь па валейболе, бронзавым прызёрам мала­дзёжнага Чэмпіянату Еўропы, уладальнікам трох залатых медалёў за ўдзел у міжнародных турнірах, мае званне майстра спорту па валейболе.

Дарына Юхноўская, Паўлавіцкая СШ имя Р.А.Худалеева

Вучаніца высокіх інтэлектуальных здольнасцей. Выхаваная, тактоўная, сціплая, праўдзівая са старэйшымі і равеснікамі. Валодае лінгвістычнымі здольнасцямі, прызёр раённых алімпіяд па англійскай мове.
Актыўная ўдзельніца і неаднаразовая пераможца і прызёр раённых, абласных і рэспубліканскіх спартыўных спаборніцтваў зімовага і летняга мнагаборства “Здароўе”. Прызёр раённых, абласных і рэспубліканскіх творчых конкурсаў і праектаў: “Раса нябёсаў на зямлі тутэйшай”, “Збяры Беларусь у сваім сэрцы”, “Магілёўская скарбонка” і іншых.
Вызначальнымі рысамі характару Дарыны з’яўляюцца адказнасць, пачуццё таварыскасці, дакладнасць і ахайнасць у справах.
Шмат чытае, можа падтрымаць гутарку на любую тэму.