Экіпаж збожжаўборачнага камбайна КЗС-1218 у саставе Віктара Скрыпунова (справа) і Яўгена Панчэні

Механізатар Уладзімір Грамыка

Адна з самых важных і хвалюючых кампаній для земляробаў — жніво-2017 — стартавала! Чым аддзячаць хлебныя нівы сельскіх рупліўцаў, якія ўклалі ў сённяшнія налітыя каласы шмат сіл і намаганняў, у хуткім часе можна будзе ацаніць спаўна. Але збожжаўборачныя камбайны ўжо парушылі ціш палеткаў сваім непаўторным гулам…

Генеральную рэпетыцыю перад жнівом традыцыйна хлебаробы праводзяць на ўборцы азімага рапсу. Гэтая культура — першая, якая падыходзіць у гаспадарках для абмалоту. Пазаўчора першымі ў раёне распачалі ўборку рапсу працаўнікі СВК “Бераснёўскі”.
Амаль 70 га поля паміж Хамічамі і Віламі, дзе мы пабывалі ўчора, каб паназіраць за ходам работ, трыма камбайнамі было ўбрана за няпоўныя два дні. “Прыстрэлка” прайшла зла­джана і без аніякіх збояў: тэхніка загадзя даведзена да ладу, сфарміраваны механізаваны атрад, маюцца паліва і неабходныя агрэгаты.
Ужо за першы рабочы дзень камбайнеры намалацілі больш за 50 т насення. Лідарства захапіў вопытны механізатар Віктар Скрыпуноў, які адгрузіў больш за 20 т. Здаецца, толькі нядаўна ён шчыраваў на сяўбе, і вось ужо прыйшоў час убіраць вырашчанае. Працуе Віктар у пары з Яўгенам Панчэнем. Не менш шчыра ўзяліся за справу і іншыя, таксама ўмудроныя вопытам камбайнеры: Сяргей Скрыпуноў працуе ў пары з Аляксандрам Косткам, Уладзімір Грамыка — з Фёдарам Медзвядзёвым. У хуткім часе да іх падключыцца чацвёрты камбайн, які рыхтуецца вывесці ў поле Алег Грынфельд.
Цікава, што Яўген Панчэня і Фёдар Медзвядзёў, пакуль іх старшыя камбайнеры вядуць абмалот, перасядаючы час ад часу на трактары, хутка спраўляюцца адвозіць адгружанае насенне на збожжаток для далейшай апрацоўкі.
Рапсавую салому пасля абмалоту Міхаіл Іваноў і Вадзім Лугаўцоў хутка скатваюць у рулоны. Загружае “скруткі” на спецыяльную трактарную платформу Дзмітрый Мялешкін, а Аляксандр Габрусь дастаўляе іх да месцаў складзіравання. Салома пойдзе на подсціл жывёле і на ўкрыццё сіласных траншэй.
Сёння камбайны шчыруюць ужо каля Гуты, усяго рапсавыя палеткі ў гаспадарцы займаюць 255 га, якія плануецца ўбраць не марудзячы, каб з поўнай гатоўнасцю прыступіць да асноўнага жніва. Як адзначыў галоўны аграном “Бераснёўскага” Леанід Панчэня, віды на ўраджай сёлета радуюць, засталося своечасова пакласці вырашчанае ў засекі…
Аляксандр ХАХЛОЎ.
Фота аўтара.