Кіраўскія юныя футбалісткі — другія на Магілёўшчыне
Футбольныя традыцыі Кіраўшчыны, замацаваныя дастойнымі рэзультатамі на розных узроўнях, вядомыя даўно. Апошнім часам не перастае расці папулярнасць да гульні №1і ў прадстаўніц цудоўнай паловы чалавецтва. Юныя футбалісткі раёна толькі назапашваюць вопыт выступленняў, і, тым не менш, ёсць ужо неблагія рэзультаты.
У Магілёве прайшло маладзёжнае першынство, у якім акрамя каманд з абласнога цэнтра і Бабруйска, прыняла ўдзел і зборная нашага раёна, якая складалася з выхаванак спартыўнага класа ДЮСШ. Падапечныя трэнераў Валерыя Галомзіка і Максіма Хамічэнкі ўпэўнена разабраліся з апаненткамі з Бабруйска (8:2), а таксама перайгралі каманду Магілёў-2 (4:0). Крыху нашым дзяўчынкам не хапіла вопыту ў гульні з камандай Магілёў-1, якой уступілі з мінімальным лікам 2:3. У выніку кіраўчанкі занялі 2 месца. Па выніках першынства для ўдзелу ў рэспубліканскіх спаборніцтвах будзе складзена зборная Магілёўскай вобласці, куды ўключаць і некалькі ігракоў з Кіраўска.
