Таццяна Гаўрыленка працуе музычным выхавальнікам у дзіцячых яслях-садку “Вясёлка” аг.Мышкавічы з 1985 года. 

У свой час закончыла Кіраўскую музычную школу па класу акардэона, а потым — Гродзенскае педагагічнае вучылішча, аддзяленне музычнага выхавання. Пачынала свой працоўны шлях яшчэ ў старым будынку Мышкавіцкага садка. А потым, пасля дэкрэтнага водпуску, прыйшла ўжо ў новы, прыгожы, дыхтоўны будынак, узведзены тут па праекту эстонскага архітэктара Тоомаса Рэйна.
Таццяна Іванаўна праводзіць музычныя заняткі з дзецьмі ад малодшай групы да старшай, прывівае ім любоў да музыкі, спеваў, вучыць самавыражацца, імправізаваць.
Яе выхаванцы часта выступаюць на мясцовай сцэне, раённых мерапрыемствах, і іх нумары заўсёды яркія і разнастайныя.
Таццяна Іванаўна адзначыла, што ва ўсіх творчых пачынаннях ёй дапамагаюць калегі па рабоце, кіраўніцтва ўстановы адукацыі, таму і поспехі важкія.