Прыемная навіна прыйшла ў раён: у адпаведнасці з Указам Прэзідэнта Рэспублікі Беларусь ад 10 кастрычніка 2017 года №373 за шматгадовую плённую працу, узорнае выкананне службовых абавязкаў, значны ўклад у сельскую гаспадарку медаля «За працоўныя заслугі» ў ліку іншых прадстаўнікоў рэспублікі ўдастоены адразу чацвёра нашых землякоў — работнікаў аграпрамысловага комплексу: намеснiк дырэктара па фiнансах i бухгалтарскім улiку ААТ «Кiраўскае райаграпрамтэхзабеспячэнне» Марыя Акушэвiч, трактарыст-машынiст КСУП «Барчыцы-агра» Генадзь Волас, вадзіцель КСУП «Жылічы» Валерый Кісялёў і начальнік цэха жывёлагадоўлі КСУП «Чырвоны баец» Мікалай Пятруша. 

Марыя Аляксандраўна Акушэвiч у калектыве ААТ «Кiраўскае рай-
аграпрамтэхзабеспячэнне» працуе 46 гадоў, 20 з якіх — намеснiкам дырэктара па фiнансах i бухгалтарскім улiку.
Калегі ведаюць яе як адказнага, граматнага, патрабавальнага кiраўнiка, які на належным узроўнi валодае заканадаўчымi i нарматыўнымi дакументамi, матэрыяламi па фiнансава-эканамiчнай дзейнасцi таварыства.
Дзякуючы яе ўкладу за пяць апошніх гадоў забяспечана павелічэнне эканамічных паказчыкаў.

Генадзь Аляксандравіч Волас 23 гады шчыруе трактарыстам-машынiстам КСУП «Барчыцы-
агра», і за гэты час зарэкамендаваў сябе добрасумленным, працавітым, старанным работнікам. Ён на высокім узроўні выконвае агратэхнічныя і тэхналагічныя патрабаванні, якiя прад’яўляюцца да правя­дзення сельгасработ.
На працягу многiх гадоў з’яўляецца прызёрам раённых, абласных спаборнiцтваў на cяўбе збожжавых i зернебабовых культур, станавіўся лаўрэатам Рэспубліканскага фестывалю-кірмашу працаўнікоў вескі «Дажынкі».

Валерый Рыгоравіч Кісялёў амаль 30 гадоў прысвяціў працы вадзіцелем КСУП «Жылічы». Чулы і добразычлівы таварыш, заўсёды гатовы прыйсці на дапамогу калегам па рабоце, падзяліцца вопытам з моладдзю. Валерый Рыгоравіч неаднаразова прызнаваўся пераможцам раённага спаборніцтва на жніве сярод вадзіцеляў. 

Мікалай Іларыёнавіч Пятруша 50 гадоў працуе ў галіне жывёлагадоўлі. 32 гады таму ўзначаліў цэх жывёлагадоўлі КСУП «Чырвоны баец», добрасумленна кіруе яго калектывам і сёння.
Арганiзатарскiя здольнасці Мікалая Іларыёнавіча дазволілі павысіць эфектыўнасць працы. Калектыў жывёлаводаў дасягае высокіх вытворчых паказчыкаў, з’яўляецца прызёрам раённых, абласных спаборніцтваў па надоі і вытворчасці малака.

Віншуем нашых землякоў з высокай дзяржаўнай узнагародай!