Любімай спартыўнай гульні большасці юнакоў і нават пэўнай часткі дзяўчат асаблівая рэклама не патрабуецца. Юныя футбалісты рознага ўзросту гатовы ганяць мяч па полі, здаецца, суткі напралёт. Спаборніцтвы па футболе сярод дзяцей и падлеткаў “Скураны мяч” — гэта якраз той турнір, які дае магчымасць дзіцячым футбольным камандам прадэманстраваць сваё майстэрства, а, магчыма, у будучым дасягнуць бліскучых вышынь на спартыўных пляцоўках.
Пасля перапынку ў некалькі год “Скураны мяч” зноў завітаў на стадыён нашага райцэнтра. Удзел у спаборніцтвах прынялі каманды юных футбалістаў СШ №1, гімназіі і Чыгірынскай СШ. Рабяты змагаліся за лідарства ў дзвюх узроставых катэгорыях: малодшай падгрупе (10 — 12 год) і старэйшай (13 — 14 год).
Пасля дэталёвага падвядзення вынікаў турніру былі вызначаны ўладальнікі Кубка раённых спаборніцтваў “Скураны мяч — 2013”: імі сталі рабяты з Чыгірынскай СШ. Ім былі ўручаны заслужаныя ўзнагароды: Кубак і дыпломы арганізатараў спаборніцтваў: аддзелаў адукацыі, фізкультуры, спорту і турызму райвыканкама, раённага фізкультурна-спартыўнага клуба.
Наогул, па ўмовах футбольных спаборніцтваў “Скураны мяч” у састаў каманды не ўключаюцца рабяты, якія займаюцца футболам у спецыялізаваных спартыўных установах. Гэтае правіла было ўстаноўлена ў самым пачатку гісторыі “Скуранога мяча”, якая ўзяла свой адлік яшчэ з часін існавання Савецкага Саюза. Летам 1964 года ў газеце “Пионерская правда” быў апублікаваны заклік: “Рабяты! Стварайце ў дварах і школах футбольныя каманды. Пачынайце па ўсёй нашай неабсяжнай краіне арганізаваныя спаборніцтвы!”. Ідэя наладжваць гэтыя буйнейшыя масавыя ўсесаюзныя спаборніцтвы па футболе сярод дзіцячых аматарскіх каманд належыць савецкаму варатару Л.І.Яшыну. Ужо ў першым розыгрышы турніру за перамогу змагаліся каля 170 тысяч каманд, амаль тры мільёны юных футбалістаў з усяго Савецкага Саюза. Дарэчы, першым чэмпіёнам “Скуранога мяча” стала каманда “Чайка” з Мінска. З гэтага моманту турнір рэгулярна наладжваўся ў розных кутках былога Савецкага Саюза, а потым — у нашай рэспубліцы, стаў трамплінам у вялікі футбол для такіх спартсменаў, як Фёдар Чаранкоў, Алег Блахін, Ігар Калыванаў, Сяргей Радзівонаў, Алег Раманцаў, Андрэй Шаўчэнка, Валерый Карпін, Алан Дзагоеў.
Магчыма, рэгулярнае правядзенне ў нашым раёне спаборніцтваў “Скураны мяч” таксама адкрые дарогу ў вялікі спорт будучым зоркам футбола. У любым выпадку гэтыя спаборніцтвы садзейнічаюць далейшаму ўдасканаленню фізкультурна-аздараўленчай і спартыўнай работы з падрастаючым пакаленнем, прывіваюць рабятам любоў да рэгулярных заняткаў фізічнай культурай і спортам, умацоўваюць іх здароўе, са-дзейнічаюць плённай арганізацыі вольнага часу і прафілактыцы правапарушэнняў.
Яўгенія БЯЛЬКО.