ААТ «Кіраўскае райаграпрамтэхзабеспячэнне» — пераможца на сяўбе азімых культур і ўздыме зябліва
Па выніках раённага спаборніцтва сярод сельгасарганізацый, фермерскіх гаспадарак, трактарыстаў-машыністаў за своечасовае і якаснае правядзенне вясенне-палявых работ, сяўбы азімых культур і ўздыму зябліва ў 2017 годзе пераможцам на сяўбе азімых культур і ўздыме зябліва выйшла ААТ «Кіраўскае райаграпрамтэхзабеспячэнне».
Трэба адзначыць, што РАПТЗ, яго падраздзяленні і асобныя працаўнікі штогод займаюць прызавыя месцы ў пэўных намінацыях раённых спаборніцтваў. А выходзіць у лік лідараў ім дапамагаюць стабільная і зладжаная работа ўсяго калектыву, надзейная падрыхтоўка глебаапрацоўчай і пасяўной тэхнікі, неабходных агрэгатаў да правядзення палявых работ, захаванне інтэнсіўных тэхналогій вырошчвання сельгаскультур, забяспечанасць гаруча-змазачнымі матэрыяламі, наяўнасць арганічных і мінеральных угнаенняў, якаснага і пратручанага насення, распрацаваныя ўмовы маральнага і матэрыяльнага заахвочвання, забеспячэнне добрых умоў працы і адпачынку.
Кожную палявую кампанію ў райаграпрамтэхзабеспячэнні праводзяць у комплексе, пры гэтым арганізавана, добрасумленна і ў аптымальныя тэрміны.
Падчас нашай размовы з галоўным аграномам Уладзімірам Дарафеем адчувалася яго задавальненне чарговым поспехам працаўнікоў прадпрыемства. Па тым, з якой упэўненасцю ён называў лічбы, пералічваў прозвішчы людзей, якія былі заняты на падрыхтоўцы глебы і сяўбе азімых культур, было бачна, што галоўны тэхнолаг палёў душой хварэе за даручаную справу, працуе з агеньчыкам, каб і ў далейшым дзейнасць калектыву РАПТЗ была эфектыўнай.
Як адзначыў Уладзімір Дарафей, сёлета своечасова была распачата работа па закладцы трывалага падмурку пад будучы ўраджай. Зяблівая апрацоўка глебы мае важнае значэнне: яна дазваляе зменшыць напружанасць падчас веснавых палявых работ, забяспечвае больш якасную перадпасяўную апрацоўку глебы і сяўбу сельгаскультур у лепшыя агратэхнічныя тэрміны. Пад азімы рапс у РАПТЗ адведзена 560 га, сурэпіцай засеялі 170 га. Асноўны ж клін — 1170 га — заняты збожжавымі культурамі, сярод якіх лідзіруюць пшаніца і трыцікале. Дарэчы, з усіх наяўных пасяўных плошчаў 60% апрацоўваюцца і засяваюцца ўвосень.
Да таго ж, у РАПТЗ плённа працуюць над эфектыўным выкарыстаннем сельгасугоддзяў: пастаянна распрацоўваюцца і ўводзяцца ў севазварот невыкарыстоўваемыя раней участкі. Асабліва гэта датычыцца безгаспадарных надзелаў у сельскіх населеных пунктах.
У чым жа сакрэт таго, што прадпрыемства пастаянна знаходзіцца ў ліку лідараў? Як адзначыў Уладзімір Дарафей, у стаўленні кожнага працаўніка да справы, а таксама ў высокай вытворчай дысцыпліне: усе, хто быў заняты ў восеньскай палявой кампаніі, як, дарэчы, і падчас правядзення іншых работ, — ставяцца да выканання вызначанай перад імі мэты па-гаспадарску. Нікога не трэба падганяць, а пры неабходнасці механізатары затрымліваюцца на полі.
Хвалявацца за якасць работ не было падстаў, бо даўно правераны на справе перадавікі калектыву Уладзімір Комар (яго стараннасць і працавітасць адзначана медалём «За працоўныя заслугі»), а таксама Аляксандр Сідарэнка, Уладзімір Сакалоўскі, Уладзімір Шэлянгоўскі, Сяргей Чудапал і іншыя.
Адным словам, пачынаючы ад кіраўніцтва, спецыялістаў і заканчваючы радавымі выканаўцамі, усе працуюць у агульным ланцугу, зладжана і мэтанакіравана. Калектыву па сілах рэалізоўваць самыя смелыя планы, а, значыць, і атрымліваць далейшыя працоўныя перамогі.
Таццяна БАРАДЗІНА.