Прафесіяналы малочнай галіны з ААТ “Рассвет імя К.П.Арлоўскага”
Святлана Гамершмідт
Алена Арцюкоўская
У г.Мінску, у Палацы культуры прафсаюзаў 10 лістапада адбылося рэспубліканскае мерапрыемства па ўшанаванні і ўзнагароджванні лепшых жывёлаводаў з рэгіёнаў краіны — усяго 250 чалавек.
Наш раён на ўрачыстасцях прадстаўлялі аператар па дарошчванні БРЖ ААТ “Рассвет імя К.П.Арлоўскага” Святлана Гамершмідт і аператар машыннага даення КСУП “Ніва-Барсукі” Алена Арцюкоўская.
Лепшыя прафесіяналы малочнай галіны былі вылучаны па выніках акцыі “Наш жывёлавод”, ініцыяванай Беларускім прафсаюзам работнікаў АПК у 2015 годзе. За два гады прадстаўнікі прафсаюза наведалі практычна ўсе фермы, сустракаліся з працаўнікамі, даведваліся пра іх дасягненні і планы. Вынікі падводзіліся па кожным раёне, вобласці.
Вітаючы прысутных, старшыня Беларускага прафсаюза работнікаў АПК Мікалай Лабушаў адзначыў, што чалавечы фактар быў і застаецца асновай жывёлагадоўчай галіны. Як бы ні абнаўлялі комплексы, ні паляпшалі генетыку, рукі чалавека — галоўнае, на чым трымаецца малочная вытворчасць.
Усяго прадстаўнікі прафсаюза падчас акцыі “Наш жывёлавод” сустрэліся з больш чым
2 тысячамі работнікаў жывёлагадоўлі, якія заслугоўваюць узнагароды за сваю нялёгкую працу. Далей акцыю плануецца пашырыць, зрабіць яе больш маштабнай і
маляўнічай.
У сваім прывітальным слове першы намеснік міністра сельскай гаспадаркі і харчавання Леанід Марыніч падкрэсліў, што жывёлаводы не толькі з адданасцю і разуменнем ставяцца да сваёй работы, праводзячы на ёй асноўны час, але і забяспечваюць захаванне дамашняга ачага.
На свяце лепшых жывёлаводаў узнагароджвалі Міністэрства сельскай гаспадаркі і харчавання, Федэрацыя прафсаюзаў Беларусі, Беларускі прафсаюз работнікаў АПК. Даярак з вялікім працоўным стажам і мнагадзетных мам адзначыў Беларускі саюз жанчын, маладых жывёлаводаў — ГА “БРСМ”. Віноўнікі ўрачыстасці таксама атрымалі ўзнагароды ад Беларускага аграпрамысловага саюза, Навукова-практычнага цэнтра Нацыянальнай акадэміі навук па жывёлагадоўлі.
Карэспандэнт “Кіраўца” папрасіў нашых жывёлаводаў, прымаўшых удзел у мерапрыемстве, падзяліцца ўражаннямі.
Святлана Гамершмідт і Алена Арцюкоўская, якія прысвяцілі сваёй справе шмат гадоў працоўнага жыцця, адзначылі, што ім ганарова было знаходзіцца сярод лепшых прадстаўнікоў жывёлагадоўчай галіны краіны, прыемна прымаць віншаванні, шчырыя пажаданні, падарункі. Іх задаволіла, што праца простых людзей удастоена такой пашаны. Але, разам з тым, як падкрэслілі жанчыны, працуюць яны не дзеля ўзнагарод. У першую чаргу, стараюцца прафесійна выконваць сваю справу, каб быў высокі рэзультат і карысць для гаспадаркі. І тут вельмі важна любіць сваю работу, ставіцца да яе з душой.