На мінулым тыдні на базе Скрыпліцкага сельсавета прайшло выязное пасяджэнне прэзідыўма раённага Савета дэпутатаў і раённага выканаўчага камітэта па тэме: аб рабоце Скрыпліцкага сельскага выканаўчага камітэта па забеспячэнні сацыяльна-эканамічнага развіцця рэгіёна. Удзел у ім прынялі старшыня раённага Савета дэпутатаў Надзея Каранкевіч, першы намеснік старшыні райвыканкама, начальнік упраўлення сельскай гаспадаркі і харчавання райвыканкама Аляксандр Осіпаў, член прэзідыўма абласнога Савета дэпутатаў, намеснік старшыні камітэта па працы, занятасці і сацыяльнай абароне Магілёўскага аблвыканкама Уладзімір Шапялевіч, галоўны ўрач райбальніцы, член Савета Рэспублікі Нацыянальнага сходу Рэспублікі Беларусь Алена Круцько, а таксама кіраўнікі сельскагаспадарчых арганізацый раёна, работнікі райсельгасхарчу, старшыні сельвыканкамаў, кіраўнікі шэрагу раённых службаў, устаноў і арганізацый.
У дзельнікі выязнога пасяджэння наведалі шэраг аб’ектаў сацыяльнай сферы, увачавідкі пераканаліся, што зроблена па добраўпарадкаванні тэрыторый, а потым абмеркавалі вынікі ўбачанага, акрэслілі задачы, якія неабходна вырашыць, абапіраючыся на органы тэрытарыяльнага грамадскага самакіравання. Менавіта яны знаходзяцца найбліжэй да насельніцтва, добра ведаюць праблемы і запатрабаванні сяльчан.
Першым пунктам прыпынку ўдзельнікаў пасяджэння, які дарэчы даставіў іх позірку сапраўднае задавальненне, стала асабістае падвор’е сям’і Пятра і Вольгі Шашанкаў з в.Капусціна. Паўсюдна — чысціня і парадак, мноства кветак і дэкаратыўных садовых фігур звяроў і птушак, прыгожая альтанка. Усё гэта характарызуе пражываючых тут людзей, як сапраўдных гаспадароў і творцаў, людзей неабыякавых і працавітых. Калі б кожны з такой любоўю ставіўся да эстэтычнага афармлення месца пражывання, наша краіна была б яшчэ больш прыгожай і ўтульнай.
Пытанні арганізацыі вытворчасці разглядаліся на прыкладзе МТФ СВК “Ніва” ў в.Капусціна. Гэты аб’ект быў пабудаваны ў 2009 г. па Указу Прэзідэнта Рэспублікі Беларусь №332. Праектная магутнасць — 690 галоў БРЖ. Утрымліваецца жывёла ў 2 кароўніках безпрывязнага ўтрымання, у комплексе — таксама даільна-малочны блок, радзільнае аддзяленне з цэхам сухастойных кароў. Ёсць і свая лабараторыя, дзе праводзяцца даследванні малака на тлушч, антыбіётыкі, саматыку.
Радзільнае аддзяленне падзелена на секцыі, дзе жывёла ўтрымліваецца ў залежнасці ад яе фізіялагічнага стану. У родавай секцыі карова з цяляці знаходзіцца 1 дзень, пасля пераводзіцца ў пасляродавую секцыю, а цяляці — у індывідуальны домік, дзе маладняк утрымліваецца да 20-дзённага ўзросту і выпайваецца малаком. Дарэчы, для даення кароў малозіўнага перыяду выкарыстоўваецца асобная мініўстаноўка.
Кармленне арганізавана з дапамогай кормараздатчыка згодна тэхналагічных груп жывёлы, дыферынцыравана, з улікам стадыі лактацыі, сутачнага надою і фізіялагічнага стану каровы. У бягучым годзе жывёлаводы Капусцінскай МТФ плануюць атрымаць ад кожнай каровы па 5100 л малака.
Як адзначыў начальнік райсельгасхарчу Аляксандр Осіпаў, па запатрабаванні Кіраўніка дзяржавы да 2015 г. на ўсіх падобных фермах (а на Магілёўшчыне іх 21) павінны выйсці на праектную магутнасць у 7000 л малака на карову. У нашым раёне Капусцінская МТФ павінна стаць базавай па ўсіх параметрах.
На сённяшні дзень раён, маючы 80-% эфектыўнасць вытворчасці малака, знаходзіцца ў вобласці ў ліку лідараў.
Падчас наведвання а/г Барчыцы начальнік райсельгасхарчу яшчэ раз нагадаў, што Прэзідэнтам краіны пастаўлена задача ў кожнай гаспадарцы пабудаваць ці рэканструяваць па адной малочнатаварнай ферме за ўласныя сродкі. У нашым раёне вызначана будаўніцтва васьмі такіх ферм і адной дадаткова — у СГФ “Чыгірынка”.
Аб тым, што зроблена ў гэтым накірунку ў СВК “Калгас “Беларусь” удзельнікі выязнога пасяджэння пераканаліся падчас наведвання будаўнічага аб’екта фермы. Адзін з хлявоў быў уведзены ў строй яшчэ ў снежні мінулага года, у другім — ужо гатовы каркас. Больш чым на 95% гатоўнасці мае малочны блок. Разлічана ферма на 635 галоў БРЖ.
Як адзначыў старшыня СВК “Калгас Беларусь” Уладзімір Ядчанка, у гаспадарцы ўжо маецца неабходная колькасць жывёлы, каб запоўніць пабудаваны хлеў. У самы бліжэйшы час павінна паступіць новае халадзільнае абсталяванне. Прадугледзелі ў гаспадарцы і забеспячэнне будуючагася аб’екта кваліфікаванымі кадрамі, многія з іх павышаюць свае прафесійныя навыкі на іншых фермах гаспадаркі.
Адзін з важнейшых сацыяльных аспектаў жыцця насельніцтва — гандлёвае абслугоўванне. На тэрыторыі Скрыпліцкага сельсавета яно ажыццяўляецца чатырма стацыянарнымі магазінамі: у аграгарадках Скрыпліца і Барчыцы, вёсках Капусціна і Хвайніца. Восем населеных пунктаў абслугоўваюцца 2-3 разы на тыдзень чатырма перасоўнымі аўталаўкамі.
Для якаснага аблугоўвання сяльчан створаны неабходныя ўмовы. Пры адсутнасці тавара на прылаўках магазіна ёсць магчымасць зрабіць заяўку і атрымаць любы тавар: ад мэблі і будаўнічых матэрыялаў да бытавой тэхнікі. Акрамя таго, магазіны займаюцца нарыхтоўчай дзейнасцю: закупам у насельніцтва лішкаў сельскагаспадарчай і дзікарослай прадукцыі, а таксама другаснай сыравіны.
Новае аблічча з уводам аграгарадкоў Барчыцы і Скрыпліца набылі тут аб’екты сацыяльна-культурнай сферы. Каб падтрымліваць іх у належным стане, быць са-праўднымі гаспадарамі на сваёй зямлі, неабходна беражліва ставіцца да зробленага. Менавіта аб гэтым ішла размова падчас наведвання Барчыцкага НПК “ДССШ”, ФАПа, Скрыпліцкага сацыяльнага пункта і пункта аховы правапарадку, аддзялення паштовай сувязі.
Падчас наведвання гэтых аб’ектаў, а затым і ў ходзе плянарнага пасяджэння абмяркоўваліся пытанні навядзення парадку на зямлі і добраўпарадкавання тэрыторый Скрыпліцкага сельсавета, паляпшэння ўмоў жыцця і працы сяльчан, а таксама аб тым, што дабівацца гэтага патрэбна агульнымі намаганнямі.
Адным з прыярытэтных напрамкаў работы сельвыканкама, адзначыла яго старшыня Жанна Рышкевіч, з’яўляецца работа па навядзенні парадку на зямлі. На тэрыторыі сельсавета маюцца 20,46 га невыкарыстоўваемых ўчасткаў. Існуюць некаторыя праблемы з перадачай гэтых земляў мясцовым сельгаспрадпрыемствам: большасць з іх заняты садамі, зараслі кустоўем, а таксама размешчаны паміж вуліцамі вёсак. Для перадачы падрыхтаваны каля 7 гектараў пустуючых участкаў.
Увогуле, як адзначыла старшыня раённага Савета дэпутатаў Надзея Каранкевіч, неабходна прапаноўваць людзям участкі для будаўніцтва жылых дамоў і вядзення асабістых падсобных гаспадарак у населеных пунктах, а не ў палях севазвароту, што дазволіць палепшыць выкарыстанне земляў.
У мінулым годзе было праведзена паўторнае аб-следванне населеных пунктаў сельсавета па выяўленні пустуючых дамоў. У выніку было выяўлена 51 такое домаўладанне, гаспадарам былі накіраваны паведамленні, на 38 з іх паступілі заявы аб намеры выкарыстання жылога памяшкання ці яго зносе ўласнымі сіламі.
Праблемным застаецца пытанне і з дамамі пашкоджанымі ў выніку пажараў. Такіх на тэрыторыі сельсавета 8: 4 — у Хвайніцы, 3 — у Барчыцах, 1 — у Забуднянскіх Хутарах. Палова не мае ўласнікаў, што ўскадняе пытанні з іх зносам.
На кантролі сельсавета і дэмантаж 56 фундаментаў, якія застаюцца пасля зносу дамоў, 20 з іх плануецца знесці з дапамогай СВК “Калгас “Беларусь” і “Калгас “Ніва”.
Ва УКП “Жылкамгас” у межах выканання Указа Прэзідэнта Рэспублікі Беларусь ад 12 студзеня 2007 года №21 “Аб павышэнні ролі органаў мясцовага кіравання і самакіравання па вырашэнні пытанняў жыццезабеспячэння насельніцтва” пастаўлены на ўлік 144 калодзежы, размешчаныя на тэрыторыі Скрыпліцкага сельсавета. Тэрміновага рамонту патрабуюць 5 з іх, 3 падлягаюць тампаніраванню.
Вострай праблемай для сельвыканкама з’яўляецца наяўнасць аварыйных дрэў, якія трэба спілаваць. Летась 17 такіх дрэў былі ўбраны з могілак у в.Глыбокавічы, 5 — у в.Хвайніца. Усяго ж неабходна спілаваць 12 дрэў у межах населеных пунктаў сельсавета і 78 — на могілках.
Варта адзначыць належную ўвагу, якая надаецца сельвыканкамам навядзенню і добраўпарадкаванню тэрыторыі могілак, брацкіх пахаванняў воінаў і партызан: 10 з наяўных 14 могілак агаро-джаны, прадугледжаны пляцоўкі для часовага складзіравання смецця. Летась праведзены рамонт і афарбоўка могілак в.Капусціна, Хвайніца і Буда. Сёлета плануецца адрамантаваць агароджу на могілках а/г Барчыцы і в.Вязаўка.
Некаторую занепакоенасць выклікае павелічэнне колькасці зарэгістраваных злачынстваў: калі летась на тэрыторыі сельсавета было ўчынена 5 правапарушэнняў, то сёлета — 11. Да адміністрацыйнай адказнасці прыцягнута 27 жыхароў сельсавета, у асноўным за знаходжанне ў грамадскіх месцах у стане алкагольнага ап’янення (15 грамадзян).
Яшчэ адзін важнейшы накірунак работы сельвыканкама — падтрымка асабістых падсобных гаспадарак. Па стане на 1 студзеня 2013 г. на падворках грамадзян утрымлівалася 222 галавы КРС, 661 — свіней, 76 — коней, а таксама коз і хатняй птушкі. Сельгасарганізацыямі, размешчанымі на тэрыторыі сельсавета, аказваецца дапамога грамадзянам у апрацоўцы глебы, размоле збожжа, для выпасу жывёлы прадастаўляюцца пашы.
Пры падвя-дзенні вынікаў выязнога пася-джэння, якое адбылося ў Барчыцкім СДК, рабоце Скрыпліцкага сельскага выканаўчага камітэта была дадзена станоўчая адзнака. А ўвогуле, як адзначыў Аляксандр Осіпаў, выязныя пасяджэнні, гэта і магчымасць на месцы пазнаёміцца з сітуацыяй, і добры стымул для паляпшэння спраў.
Людміла СЯМЁНАВА.
Фота Максіма МІКЕШЫНА.