Якім павінен быць дэпутат? (Бліц-апытанне жыхароў Кіраўшчыны)
Менш чым праз месяц выбаршчыкам Кіраўшчыны трэба будзе вырашыць, хто будзе прадстаўляць іх інтарэсы ў абласным, раённым, сельскіх Саветах дэпутатаў дваццаць восьмага склікання. І ўжо цяпер насельніцтва раёна актыўна абмяркоўвае пытанні, звязаныя з выбарчай кампаніяй.
Якім павінен быць дэпутат мясцовага Савета дэпутатаў – з гэтым пытаннем карэспандэнты “раёнкі” звярнуліся да жыхароў раёна.
Мікалай ПАД’ЯЛОЎСКІ, ветэран працы, узнагароджаны медалём “За працоўныя заслугі”.
— Кожная выбарчая кампанія — гэта значная падзея ў жыцці нашага народа. Выбары — гэта, у першую чаргу, удзел кожнага з нас у палітычным жыцці краіны, а таму ўсім нам неабходна ставіцца да гэтага мерапрыемства з поўнай доляй разумення, выканаць свой грамадзянскі абавязак.
Адпаведна, вялікая адказнасць кладзецца і на тых, хто стане народным абраннікам — дэпутатам раённага, мясцовых Саветаў дэпутатаў. Менавіта да іх прыдуць людзі са сваімі пытаннямі і прапановамі. І ў гэтай сувязі дэпутату патрэбна быць адкрытым, камунікабельным чалавекам. Ён павінен знайсці агульную мову з выбаршчыкамі, умець выслухаць, унікнуць у сутнасць узнімаемай праблемы. Людзі, безумоўна, усе розныя — і па характарах і па светаўяўленні. Некаторыя не ў поўнай меры разумеюць пэўныя аспекты праводзімай дзяржаўнай палітыкі, рэформ, новаўвядзенняў і г.д. І вось тут задача дэпутата — данесці гэта да людзей, растлумачыць.
Дэпутат павінен абавязкова ўдзельнічаць у вырашэнні пытанняў, узнімаемых падчас сесій райсавета і іх умець перанесці на сваю выбарчую акругу, дапамагчы сваім выбаршчыкам.
Народным абраннікам трэба памятаць, што сутнасць слова “дэпутат” заключаецца не ў выдадзеных ім адпаведных пасведчаннях, а ў актыўным удзеле ў грамадскім жыцці, у самых розных сферах жыццядзейнасці.
Галіна РУСЕЦКАЯ, дырэктар СШ №2 г.Кіраўска імя К.П.Арлоўскага:
— Дэпутаты — сувязное звяно паміж грамадзянамі і органамі ўлады. Таму яны павінны рэгулярна кантактаваць са сваімі выбаршчыкамі, шукаць ініцыятывы «знізу» і падымаць іх на адпаведны ўзровень. Людзі прыходзяць да свайго дэпутата з праблемамі, часам болем, і ўдзел і спачуванне тут немалаважныя. Нават калі сітуацыя складаная і імгненна яе немагчыма вырашыць, трэба растлумачыць, чаму гэта так, а не карміць людзей пустымі абяцаннямі. Вельмі важна, каб дэпутат не толькі ініцыяваў, але і кантраляваў вырашэнне праблем, якія закранаюць інтарэсы простых жыхароў, расказваў ім аб зменах у заканадаўстве.
На маю думку, дэпутат павінен валодаць наступнымі асобаснымі якасцямі: уменнем суперажываць, адчуваць патрэбы грамадства, разумець іх. А наяўнасць інтэлекту, мабільнасці, умення арганізаваць рабочы працэс дапаможа яму гэтыя якасці рэалізаваць, авалодаць неабходнымі ведамі і ўменнямі для ўвасаблення задуманага.
Як кіраўнік, лічу, што важныя якасці дэпутата – сумленнасць і ўпэўненасць у сабе і сваіх сілах. Таксама важна стаўленне дэпутата да людзей. Ён абавязаны паважаць сваіх выбаршчыкаў, умець прыслухоўвацца да іх, ведаць надзённыя праблемы народа і шчыра імкнуцца іх вырашыць. Гэтыя патрабаванні – адпаведнасць узроўню ускладзенай адказнасці.
Алег БОЙКА, выкладчык эканамічных дысцыплін Жыліцкага сельгаскаледжа:
— Дэпутат мясцовага Савета дэпутатаў павінен валодаць лепшымі чалавечымі якасцямі, арганізатарскім талентам, быць паспяховым у сваёй прафесіі. Яго вызначае гатоўнасць актыўна супрацоўнічаць з мясцовымі распарадчымі і выканаўчымі органамі, развіваць самакіраванне — толькі сумесная дзейнасць прыносіць станоўчы вынік.
Лічу, што ўзрост дэпутата і яго сацыяльны статус не мае ніякага значэння. Галоўнае, каб ён ведаў праблемы, якія хвалююць выбаршчыкаў, літаральна жыў імі і шчыра жадаў іх вырашыць. Таксама няважна, з якой сферы ён прыйдзе: калі чалавек граматны, адукаваны і мае найлепшыя маральныя якасці, то, без сумнення, ён прынясе грамадству толькі карысць.
Хачу адзначыць, што кіраўская моладзь праяўляе высокую палітычную актыўнасць падчас выбарчай кампаніі. Вялікая колькасць рабят з радоў ГА “БРСМ” уваходзяць у састаў участковых выбарчых камісій, знаходзяцца ў ліку назіральнікаў, у тым ліку і я. Упэўнены, што выбары на Кіраўшчыне і ўвогуле краіне пройдуць на высокім узроўні: у нас сучаснае выбарчае заканадаўства, аб’ектыўныя назіральнікі, актыўна ўключаны ў работу грамадскія аб’яднанні.