Сто гадоў шукай другой красы,

А тым больш, што свет зусім не вузкі.

Дык калі ты не бязродны сын,

Гавары са мной па-беларуску

(Я.Янішчыц).

“Размаўляй са мной па-беларуску!”. Пад такім дэвізам 21 лютага прайшоў Міжнародны дзень роднай мовы ў Мышкавіцкай СШ.

Настаўнікі і вучні прынялі ўдзел у акцыі “Размаўляй са мной па-беларуску”.  Перш за ўсё, на перапынках размаўлялі на роднай мове. У бібліятэцы ў гэты дзень прапаноўваліся кнігі для чытання ТОЛЬКІ на беларускай мове (акрамя, зразумела, праграмных твораў).

Настаўнікамі беларускай мовы і літаратуры быў праведзены шэраг мерапрыемстваў: інтэрактыўная гульня “Размаўляем па-беларуску” для вучняў 8-9 класаў, віктарына “Ад прадзедаў спакон вякоў” для вучняў 5-6 класаў. А дзесяцікласнікі далучыліся да рэспубліканскай акцыі і напісалі дыктоўку па твору М.Гарэцкага “Літоўскі хутарок”.

Настаўнікі выказалі вучням пажаданне размаўляць на роднай мове не толькі падчас правядзення мерапрыемстваў у школе і з гонарам усведамляць, што ўсе мы – дзеці самай лепшай краіны на свеце – Беларусі!

Любоў МАРКЕВІЧ, настаўнік беларускай мовы і літаратуры Мышкавіцкай СШ.