У апошнія дні каляндарнай зімы ў сувязі з надыходам арктычнага паветра ў Беларусі пануюць моцныя маразы. Нягледзячы на тое, што тэмпературны фон на 7-13 градусаў ніжэйшы за кліматычную норму, марозны рэкорд пакуль не пабіты: у ноч на 1 лютага 1956 года ў Беларусі быў зафіксаваны мінус 41 градус. Па прагнозах сіноптыкаў, халоднае надвор’е захаваецца да канца лютага. 

Усе экстраныя службы раёна працуюць ва ўзмоцненым рэжыме. Дзякуючы добра нала­джанай рабоце на тэрыторыі нашага раёна ніякіх надзвычайных сітуацый не зарэгістравана. У той жа час меры перасцярогі не будуць залішнімі.
Неабходна быць пільнымі і асцярожнымі лю­дзям. Асноўная небяспека падчас маразоў — пераахаладжэнне арганізма і абмаражэнне. Яно, як правіла, суправаджаецца агульным пераахаладжэннем і часцей за ўсё закранае вушы, нос, пальцы рук і ног. Прычыны, якія спрыя­юць абмаражэнню, — цеснае і сырое адзенне і абутак, фізічная стома, голад, вымушанае доўгае нерухомае становішча, папярэдняя халадавая траўма, аслабленне арганізма ў выніку перанесеных захворванняў, у тым ліку хранічных — захворванні сасудаў ніжніх канечнасцей і сардэчна-сасудзістай сістэмы.
Што варта ўліч­ваць ва­дзіцелям гэтымі марознымі днямі? Найперш трэба задумацца, наколькі неабходна вам ехаць уласным транспартам, бо пры марозе звыш 25 С0 знос аўтамабіля вырастае ў дзе­сяць разоў у параўнанні з летнім сезонам. Калі ж іншага выхаду няма, то аўтамабіль трэба рыхтаваць да маразоў загадзя — праверыць акумулятар, сістэму запуску рухавіка, заліць сінтэтычнае ці паўсінтэтычнае масла, дадаць антыфрыз у вадкасць для сістэмы ахаладжэння.
Асаблівую ўвагу неабходна надаваць захаванню правілаў пажарнай бяспекі. Так, падчас моцных маразоў паліць печ неабходна не больш за паўтары гадзіны па два-тры разы ў дзень, каб пазбег­нуць яе перакалу.
Адна з самых распаўсюджаных праблем эксплуатацыі ацяпляльнага абсталявання ў халодную пару года — абледзяненне вонкавай часткі дымаходу, што можа прывесці да яго закупоркі. Неабходна своечасова праводзіць агляд дымаходаў і вентыляцыйных каналаў.
Фотакалаж
Максіма МІКЕШЫНА.
На здымках: машыніст кацельні ААТ «Кіраўск-лён» УКП «Жылкамгас» Максім Вароніч кантралюе працэс падачы цяпла ў жылыя дамы кіраўчан, а таксама размешчаныя побач установы і арганізацыі горада; утульна і камфортна выхаванцам ясляў-садка №4 горада, малышы з задавальненнем займаюцца і гуляюць у цёплых памяшканнях; кіраўчаніну Уладзіміру Іваніцкаму не страшныя ніякія маразы, упэўненасці яму надае дастатковы запас паліва, своечасова уцепленыя вокны і дзверы.