Вольга ГАРШКОВА, старшыня раённага аддзялення ГА “Беларускі фонд міру”:
— Адна з галоўных і, на маю думку, злабадзённых тэм, якія ўзняў Прэзідэнт падчас выступлення з Пасланнем, — гэта пытанне вайны і міру. Сёння на планеце склалася няпростая сітуацыя: трывожны свет вакол нас з сур’ёзнымі пагрозамі для сусветнага супольніцтва.
Найвышэйшая каштоўнасць для нашай незалежнай Беларусі — мір у дамах яе грамадзян. Мы сёння можам ганарыцца, што ў роднай дзяржаве няма вайны, і беларускія салдаты не ўдзельнічаюць у баявых дзеяннях за тэрыторыю нашай краіны.Таму справядліва пад­крэсліў Кіраўнік дзяржавы, што агульная задача для ўсіх нас — берагчы гэты мір і, самае галоўнае, — разумець цану гэтаму міру.
Беларускі фонд міру ў гэтай сувязі выступае рэальнай сілай. Наша краіна — адзіная, якая захавала такую вялікую структуру, дзейнасць якой прыкметная, патрэбная і атрымала высокую адзнаку з боку кіраўніцтва дзяржавы. За гады сваёй дзейнасці грамадская арганізацыя набыла заслужаны аўтарытэт як унутры краіны, так і за яе межамі, наладжваючы канструктыўны дыялог паміж народамі. Фонд здольны змагацца за інтарэсы міру ў няпростай сучаснай рэальнасці, быць верным саратнікам дзяржавы ў рашэнні сацыяльных і эканамічных праблем.
Ніхто больш шчыра і яскрава не скажа пра мір і не праявіць жаданне ў ім жыць, як дзеці. Летась у краіне і ў тым ліку ў нашым раёне праходзіў конкурс дзіцячых сачыненняў “Мір вачамі дзяцей”. На іх аснове потым быў выдадзены том з аднайменнай назвай, дзе сабраны лепшыя работы рабят. Калі чытаеш асобныя радкі, міжволі наварочваюцца слёзы. Хлопчыкі і дзяўчынкі тонка разумеюць, наколькі каштоўны і крохкі мір, горача перажываюць, гледзячы па тэлебачанні рэпартажы з гарачых кропак, дзе гінуць дзеці, застаюцца без бацькоў, становяцца інвалідамі.
Вось таму мы і павінны ўсе разам прыкласці намаганні, каб захаваць мір на планеце. І Беларускі фонд міру будзе і надалей верна служыць на карысць сваёй Айчыны, удзельнічаць у рэалізацыі міратворчых ініцыятыў.

Віктар СТАВЕР, старшыня райкама прафсаюза работнікаў АПК:
— Асабіста мяне ў выступленні Прэзідэнта пры звароце са штогадовым Пасланнем да беларускага народа і Нацыянальнага сходу закранулі словы Аляксандра Рыгоравіча Лукашэнкі аб тым, што мы свой поспех, у адрозненні ад іншых краін, багатых на прыродня рэсурсы, — ствараем толькі сваёй працай і інтэлектам свайго народа.
Кіраўнік дзяржавы адзначыў, што жыць і развівацца ў існуючай сістэме каардынат немагчыма без чалавечага патэнцыялу — важнейшай каштоўнасці ў бягучым стагоддзі. Беларусь павінна стаць камфортнай для свайго народа, усіх, хто хоча спакойна працаваць, зарабляць і гадаваць дзяцей. А для гэтага неабходна прыкласці ўсе намаганні для выканання задач, якія раней паставіў Прэзідэнт краіны: па ўтрыманні цэн, росце заработнай платы і забеспячэнні занятасці.
Не сакрэт, што менавіта ў сельскагаспадарчай галіне заробкі напрамую залежаць ад прадукцыйнасці працы. Як лідар прафсаюзаў АПК раёна, лічу гэта правільным. Калі чалавек старанна працуе, добрасумленна выконвае свае абавязкі і даручаную справу, ён павінен атрымліваць дастойную зарплату. Нездарма Кіраўнік дзяржавы ў сваім Пасланні адзначыў, што павінны быць задзейнічаны ўсе магчымыя механізмы для стварэння ў рэальным сектары ўмоў, у якіх здольны і працавіты чалавек знойдзе сабе прымяненне.
Перад аграрыямі краіны стаяць важныя задачы: нарасціць вытворчасць малака і мяса, павысіць якасць атрымліваемай прадукцыі, бо без гэтага немагчыма знайсці новыя рынкі збыту беларускай сельгаспрадукцыі.
Лічу, што ўсё гэта ўвасобіць у жыццё — у нашых сілах. Каб добра жыць, трэба старанна і шмат праца­ваць.
У якой краіне мы будзем жыць заўтра — залежыць ад кожнага з нас.
У нашым раёне ёсць самае галоўнае — цудоўныя людзі, адказныя кадры, многія з якіх удастоены высокіх дзяржаўных узнагарод, і ўсе разам мы здолеем справіцца з любымі пастаўленымі задачамі.