У аграгарадку Усход Магілёўскага раёна прайшлі спаборніцтвы па валейболе сярод дзяўчат 2002 года нараджэння ў праграме абласной спартакіяды сярод аграгарадкоў і сельскіх населеных пунктаў “Каласок”.

Удзел прынялі 10 каманд, якія былі падзелены на 3 падгрупы. У састаў зборнай каманды нашага раёна ўваходзілі толькі трое дзяўчат 2002 года нараджэння, астатнія — значна маладзейшыя. Тым не менш, у сваёй падгрупе падапечныя трэнера Сяргея Лазаковіча ўпэўнена адолелі каманды Мсціслаўскага і Бабруйскага раёнаў з лікам 2:0 і з першага месца выйшлі ў фінал. На жаль, тут больш вопытныя і старэйшыя апаненткі з Клічаўскага і Краснапольскага раёнаў былі крыху мацнейшымі. І ўсё ж, трэцяе месца юных кіраўчанак можна лічыць вельмі добрым вынікам.