У век лічбавых тэхналогій камп’ютарная граматнасць становіцца для чалавека проста неабходнасцю. Бо няма нічога прасцей, чым, уключыўшы камп’ютар даведацца пра апошнія навіны, паглядзець расклад паяздоў або рэжым работы патрэбных устаноў. А колькі цікавага можна спазнаць на сайтах пра здароўе і сакрэты кулінарыі!
Агульнапрынятае паняцце аб тым, што камп’ютар і глабальная сетка — гэта справа моладзі, карэнным чынам няправільнае. Сёння вельмі часта на форумах, у сацыяльных сетках і нават онлайн-гульнях можна сустрэць людзей сталага ўзросту, якія разбіраюцца ва ўсіх тэхнічных нюансах не горш за маладых.
У мінулую пятніцу на базе раённага цэнтра сацыяльнага абслугоўвання насельніцтва прайшоў першы ў нашым раёне конкурс камп’ютарнай граматнасці сярод грамадзян пажылога ўзросту. Удзельнікамі конкурсу стаў прадстаўнік нашага раёна і шэрагу рэгіёнаў Магілёўскай вобласці.
Загадчыца аддзялення тэрміновага сацыяльнага абслугоўвання цэнтра Таццяна Дашкевіч паведаміла, што ідэя адкрыць камп’ютарны клас у іх узнікла даўно. Увасобіць мару ў жыццё ўдалося ў лістападзе гэтага года, тады і было закуплена 2 камп’ютара, 3 прынтэры, камп’ютарныя сталы і крэслы.Камп’ютарны клас — гэта неабходнасць, заўважыла яна. Людзі сталага ўзросту мараць ісці ў нагу з часам, не адстаючы ад моладзі. Яны хочуць мець зносіны з сябрамі, сваякамі і аднакласнікамі праз сацыяльныя сеткі, ведаць сусветныя навіны і быць у курсе ўсіх падзей, рэгістравацца на сайтах дзяржаўных паслуг.
Як адзначыла начальнік упраўлення сацыяльнай дапамогі і сацыяльнага абслугоўвання камітэта па працы, занятасці і сацыяльнай абароне Магілёўскага аблвыканкама Ірына Казялецкая, лічбавыя тэхналогіі падуладныя ўсім ўзростам. Аднак  далёка не ўсе бабулі і дзядулі могуць адважыцца сесці за парты.
— Вы такія малайцы! Выйшаўшы на заслужаны адпачынак, вы працягвае весці актыўны лад жыцця, удзельнічаеце ў разнастайных мерапрыемствах, крочыце ў нагу з часам. Паверце, калі раней вы радаваліся дасягненням і поспехам вашых дзяцей, то зараз яны таксама могуць ганарыцца вамі і вашым актыўным ладам жыцця, цікавасцю да камп’ютарных тэхналогій. Людзі, якія перасталі баяцца камп’ютара, пачынаюць адчуваць сябе паўнапраўнымі членамі сучаснага інфармацыйнага грамадства, —  звярнулася да ўсіх прысутных Ірына Казялецкая.
Удзельнікам конкурсу было прапанавана выканаць розныя заданні: па рабоце з тэкставымі дакументамі ў праграме Microsoft Word, з калькулятарам, табліцамі, флэшкай і інтэрнэтам.

У намінацыі “Містэр Оnline” вылучыўся прадстаўнік нашага раёна Мікалай Яфімавіч Логвін. Раіса Васільеўна Падалінская з Магілёўскага раённага цэнтра сацыяльнага абслугоўвання насельніцтва атрымала дыплом у намінацыі “Лідар камп’ютарнага вылічэння”. Лепшай у рабоце Microsoft Windows была прызнана прадстаўніца з Бабруйскага раёна Ніна Фамінічна Сатанчук. Прадстаўнік Чэрыкаўскага раёна Таццяна Мікалаеўна Елістратава была прызнана лепшай у маляванні на камп’ютары. Валянціна Георгіеўна Коган з Асіповіцкага тэрытарыяльнага цэнтра сацыяльнага абслугоўвання насельніцтва стала лепшым рэдактарам тэксту.
Усім удзельнікам былі ўручаны дыпломы і падарункі ад спонсараў: Магілёўскага фонду міласэрнасці і здароўя, Кіраўскіх раённых арганізацый РГА «Белая Русь» і “Беларускі фонд міру”.
Старшыня раённай арганізацыі ГА «Беларускі фонд міру» Вольга Гаршкова падзялілася сваімі ўражаннямі ад конкурсу:
— Вы ўсе знаходзіцеся ва ўзросце, калі хочацца рабіць нешта новае і на гэта ёсць час. Выдатна, што камп’ютарнай граматнасці сталі навучаць пакаленне з багатым жыццёвым вопытам.
Запал станоўчых эмоцый пасля заканчэння мерапрыемства атрымалі ўсе: як члены журы, так і самі ўдзельнікі.
Кіраўніком па гуртковай рабоце аддзялення дзённага знаходжання для інвалідаў Аленай Хітранковай быў праведзены майстар-клас па афармленні навагодніх паштовак. А работнікамі цэнтра былі выкананы знаёмыя ўсім песні, прысутныя пад дружныя апладысменты падпявалі.
Хочацца адзначыць, што пажылыя людзі ў нашым раёне ахвотна наведваюць камп’ютарны клас і асвойваюць тэхніку. Навучыцца працаваць на камп’ютары не так цяжка, як здаецца на першы погляд. Самым складаным з’яўляецца перамагчы забабоны, звязаныя з сучаснымі тэхналогіямі. Галоўнае — жаданне. І ўсё атрымаецца!
Раённым цэнтрам сацыяльнага абслугоўвання насельніцтва плануецца зрабіць такі конкурс абласным і прыцягнуць у наш раён як мага больш удзельнікаў. Конкурс камп’ютарнай граматнасці сярод грамадзян пажылога ўзросту мяркуюць праводзіць штогод.
Анастасія БЕГУНОВІЧ.
Фота
Максіма МІКЕШЫНА.
На здымках: працуе журы конкурсу; удзельнікі конкурсу камп’ютарнай граматнасці сярод грамадзян пажылога ўзросту — пераможцы ў розных намінацыях; майстар-клас па афармленні навагодніх паштовак для ўсіх жадаючых праводзіць Алена Хітранкова.