На базе СШ №1 прашлі чарговыя спаборніцтвы ў межах раённай Спартакіяды школьнікаў. На гэты раз тут сабраліся аматары настольнага тэніса з устаноў адукацыі — усяго 8 каманд, у саставе якіх удзельнічалі па 3 хлопчыкі і дзяўчынкі 2004-2005 гадоў нараджэння. Аб тым, як праходзілі спаборніцтвы, расказаў галоўны спецыяліст аддзела па адукацыі, спорту і турызму райвыканкама Максім Хамічэнка:

— Барацьба паміж аматарамі малой ракеткі аказалася вельмі бескампраміснай, а вынікі паміж спартсменамі  — настолькі шчыльнымі, што пры вызначэнні месцаў суддзям часам спатрэбілася прымяняць каэфіцыент.

У камандным заліку з 23 ачкамі перамогу святкавалі гаспадары — тэнісісты СШ №1. Толькі адно ачко саступілі ім прадстаўнікі Мышкавіцкай СШ. Тройку прызёраў замкнулі школьнікі Жыліцкага УПК ДС-СШ, набраўшыя 19 ачкоў.

Сярод хлопчыкаў безагаворачную перамогу атрымаў вучань СШ №1 Аляксандр Крутаў, які перамог ва ўсіх 5 паядынках. Яшчэ чацвёра рабят атрымалі па 4 перамогі. У выніку прымянення каэфіцыента другое і трэцяе месцы адпаведна было прысуджана рабятам з Мышкавіцкай СШ Мікіце Шчэрбічу і Ільі Бяляўскаму. У “сантыметрах” ад прызавой тройкі апынуліся Дзмітрый Рубанаў з СШ №1 і Мікіта Бяляўскі з Мышкавіч.

А вось у дзяўчат сітуацыя склалася яшчэ больш заблытанай. Адразу шасцёра ўдзельніц-лідараў набралі па 4 перамогі. І ўсё ж канкурэнткі размясціліся ў наступным парадку: першае і другое месцы адпаведна занялі стрыечныя сёстры Дар’я і Карына Красныя, вучаніцы СШ №1, трэцяе месца прысуджана прадстаўніцы Жыліцкага УПК ДС-СШ Марыі Каральковай, на наступных месцах — Аляксандра Каваленка (Мышкавіцкая СШ), Аляксандра Куцянкова (Жыліцкі УПК ДС-СШ), Ганна Стаўрова (Дабаснянскі УПК ДС-СШ).

У сувязі з такімі шчыльнымі рэзультатамі суддзям аказалася даволі цяжка вызначыцца з аптымальным саставам зборнай раёна для ўдзелу ў абласным этапе. З гэтай мэтай у суботу будзе праведзены  вучэбна-трэніровачны збор, дзе і будуць названы кандыдаты ў зборную.