Асноўная работа дэпутата ўяўляе сабой, перш за ўсё, работу з людзьмі. Ён павінен добра ведаць праблемы жыхароў сваёй акругі, пастаянна з імі мець зносіны, раіцца. На аснове сваіх дэпутацкіх паўнамоцтваў вырашаць праблемы і задачы насельніцтва. Рыхтаваць і выносіць хвалюючыя людзей пытанні на разгляд сесій раённага Савета дэпутатаў. Галоўная задача дэпутата любога ўзроўню — абараняць інтарэсы людзей.
Дэпутацкі корпус Баравіцкага сельскага Савета 26 склікання — 15 дэпутатаў. На тэрыторыі сельсавета налічваецца 26 населеных пунктаў, з іх 1 аграгарадок.
Аб напрамках работы дэпутатаў расказвае старшыня Баравіцкага сельскага Савета дэпутатаў Алена Пашкевіч:

— Асноўная задача дэпутатаў — рашэнне штодзённых праблем грамадзян, якія пражываюць на тэрыторыі сельсавета і паляпшэнне ўмоў іх жыцця. Вельмі важнае ў выкананні  гэтых задач ўзаемадзеянне з насельніцтвам праз работу дэпутатаў у выбарчых акругах.
Нашы дэпутаты даносяць да жыхароў тыя рашэнні, якія прымаюцца раённым і сельскім Саветамі дэпутатаў. Яны актыўна працуюць у сваіх выбарчых акругах, жывуць праблемамі і клопатамі насельніцтва, сваім асабістым удзелам спрыяюць вырашэнню многіх пытанняў.
Адным з важных напрамкаў работы з’яўляецца добраўпарадкаванне населеных пунктаў, акультурванне тэрыторый па месцы жыхарства, месцы працы, а таксама навядзенне са-нітарнага парадку ў населеных пунктах, на могілках, міні-палігонах цвёрдых камунальных адходаў.
Напрыклад, жыхарка д.Шалаёўка Алена Лявоненка, дзеючы дэпутат па Шалаёўскай выбарчай акрузе, вядзе актыўную работу сярод насельніцтва ў напрамку добраўпарадкавання вёскі і могілак, штогод арганізуе ўборку помнікаў. Яна таксама цікавіцца праблемамі жыхароў, работай паштовай сувязі, магазіна. З’яўляецца членам назіральнай камісіі і грамадскага пункта аховы парадку.
У Баравіцкім сельсавеце актыўную работу па добраўпарадкаванні населеных пунктаў  праводзяць старасты. Хацелася б асабліва адзначыць работу Івана Дарафея з в.Гарадзец і Леаніда Шпакоўскага з в.Боркі. Іван Іванавіч актыўна працуе па арганізацыі субот-нікаў, ачысткі дарог ад снегу, уборкі тэрыторый каля памятнага знака ў в. Гарадзец, вядзе кантроль за асвятленнем вуліц. Леанід Мікалаевіч ажыццяўляе карпатлівы догляд за мемарыяльным комплексам ў в.Боркі, падтрымлівае там чысціню і парадак.
Адзін раз у месяц дэпутаты праводзяць асабістыя прыёмы грамадзян у выбарчых акругах, пасля чаго кіраўніцтва сельскага Савета інфармуецца аб узнятых грамадска-значных пытаннях.
Бывае так, калі людзі маюць патрэбу ў нейкай парадзе ці кансультацыі, іх пытанні вырашаюцца пры сустрэчы на вуліцы, падчас грамадскіх мерапрыемстваў. Проста часам людзям больш зручна падысці да дэпутата неафіцыйна, чым запісацца на прыём.
У нас усе дэпутаты — актыўныя і адказныя людзі. А самае галоўнае, неабыякавыя. Перажываючы за лёс раёна, свайго населенага пункта, з адказнасцю ставяцца да вырашэння праблем насельніцтва, а дэпутацкі корпус працуе зладжана, таму яму многае ўдаецца.
23 сакавіка адбудуцца выбары новага дэпутацкага корпусу. Хачу пажадаць усім, хто будзе змагацца за дэпутацкі мандат, даверу выбаршчыкаў і пераканаўчай перамогі. А выбаршчыкам — зрабіць правільны выбар!
Размаўляла Анастасія БЕГУНОВІЧ.