Цэнтральная райбальніца нядаўна атрымала выдатны і такі неабходны для больш якаснага медыцынскага абслугоўвання падарунак: са сродкаў раённага бюджэту быў набыты новы аўтамабіль хуткай медыцынскай дапамогі “ГАЗель-Бізнес”.

Аляксандр Філановіч — адзін з вадзіцеляў, якія хутка дастаўляюць медработнікаў на вызавы на новай “ГАЗелі”

Гэта адна з лепшых мадыфікацый маркі, выпускаемай Горкаўскім аўтазаводам, які знаходзіцца ў Ніжнім Ноўгарадзе. Аўтамабіль адрозніваецца павышанай надзейнасцю камплектуючых.

Як адзначыла намеснік галоўнага ўрача райбальніцы па медыцынскай часці Жанна Афонькіна, новая спецмашына мае не толькі прывабны знешні выгляд. Галоўнае, — яна вельмі зручная для работы. У кабіне акрамя месца для вадзіцеля прадугледжана яшчэ два крэ­слы для медработнікаў. Плюс два — у салоне. Машына хутка і “мякка” рухаецца, што дазваляе ў самыя кароткія тэрміны даставіць фельчараў на выклік у любую кропку раёна або выехаць пры неабходнасці і за яго межы.

Рады спецыялізаванай аўтамашыне медыкі выязной брыгады: старшы фельчар Алена Шпілеўская, фельчары Таццяна Акушэвіч і Галіна Дубовік

Па сучасным слове абсталяваны спецыялізаваны салон аўтамашыны. Усё прадумана з тым, каб было зручна праца­ваць фельчарам выязной брыгады і камфортна транспартуемаму пацыенту. Розныя функцыі прадугледжаны ў насілак, якія істотна адрозніваюцца ад звыклых. Яны так механізаваны, што значна палягчае работу персаналу. У камплекце машыны два кіслародныя балоны, што дазваляе выкарыстоўваць пры неабходнасці кіслародную маску для перавозімага пацыента. Маецца прыстасаванне для капельніцы падчас аказання дапамогі. Ёсць магчымасць у медработнікаў на месцы памыць рукі.

“Абноўку” даручылі самым вопытным вадзіцелям райбальніцы. Паколькі машына знаходзіцца на дзяжурстве круглыя суткі, за ёй замацаваны чацвёра рулявых. Гэта Генадзь Мурачоў, Васіль Турловіч, Уладзімір Манько і Аляксандр Філановіч. Фельчары мяняюцца згодна графіка.
Дарэчы, гэта ўжо не першы каштоўны падарунак бальніцы ад райвыканкама. Напрыканцы мінулага года ў рэанімацыйным аддзяленні ўстановы аховы здароўя з’явіліся два новыя апараты: для выкарыстання наркозу і штучнай вентыляцыі лёгкіх, дзякуючы якім істотна палепшылася абслугоўванне пацыентаў. Ну, а з дапамогай новай “хуткай”, якая стала трэцяй па ліку выязджаючых на вызавы, безумоўна, будзе выратавана не адно жыццё!

Аляксандр ХАХЛОЎ.