На ўрачыстую лінейку ў Мышкавіцкай СШ сабраліся вучні і настаўнікі ўстановы, а таксама бацькі і родныя рабят, сябры і, канешне ж, ганаровыя госці. Сярод іх — старшыня раённага Савета дэпутатаў Галіна Слабоднікава, дырэктар ААТ “Рассвет імя К.П.Арлоўскага” Аляксандр Багель, яго намеснік па ідэалагічнай рабоце Наталля Шапавалава, прадстаўнікі РАНС і РАУС.

Ганаровае права падняць Дзяржаўны флаг Рэспублікі Беларусь было прадастаўлена пераможцы рэспубліканскай алімпіяды па інтэлектуальнай уласнасці, творчых конкурсаў Марыі Радзеўскай і пераможцы ІІ этапа прадметных алімпіяд па рускай, беларускай і англійскай мовах і літаратуры, удзельніку тэлевізійнага праекта “Я ведаю” Аляксею Аляксееву.

Са святам Апошняга званка ад імя райвыканкама, раённага Савета дэпутатаў прысутных сардэчна павіншавала Галіна Слабоднікава. Яна адзначыла, што для выпускнікоў надышоў адказны і даволі няпросты этап станаўлення, час самастойных крокаў на жыццёвым шляху, дзе важна рэалізаваць свае таленты, праявіць настойлівасць у дасягненні пастаўленай мэты. Яна пажадала ім зрабіць правільны і асэнсаваны выбар будучай прафесіі, які дапаможа ў далейшым кожнаму напоўніць жыццё карыснымі справамі, мноствам цікавых задум і творчых планаў. А ўсім астатнім вучням з карысцю правесці школьныя канікулы, адпачыць і аздаравіцца і з новымі сіламі 1 верасня вярнуцца ў сцены роднай школы.

У 2018/2019 навучальным годзе дастойны ўклад у скарбонку дасягненняў устаноў адукацыі раёна ўнеслі вучні Мышкавіцкай СШ. У раённай алімпіядзе тры дыпломы (па англійскай мове, рускай мове і літаратуры, беларускай мове і літаратуры) заваяваў вучань 6 класа Аляксей Аляксееў, па два дыпломы — у Марыі Арлоўскай (9 клас), Яўгеніі Шчарбінінай, Ульяны Саньковай, Аляксандры Саньковай (5 клас).
На раённым конкурсе работ даследчага характару па вучэбных прадметах заваяваны дыпломы другой і трэцяй ступеней.

Уладзіслаў Каўрыга, Аляксандра Каваленка, Ілья Бяляўскі ўзнагароджаны дыпломамі ІІ ступені абласных спаборніцтваў па выкананні нарматываў дзяжаўнага фізкультурна-аздараўленчага комплексу Рэспублікі Беларусь і абласной Спарткіядзе школьнікаў-2019 па настольным тэнісе ў саставе зборнай каманды раёна.

На абласным конкурсе камп’ютарнай графікі Лізавета Рамнёнак заваявала дыплом І ступені ў завочным этапе і ІІІ — у вочным. На абласным этапе агляду-конкурсу “Здравствуй, мир” Валянцін Бародзіч узнагароджаны дыпломам ІІ ступені.

Дастойны ўклад у рэйтынг школы ўнеслі і настаўнікі. Так, К.М.Саковіч ўзнагароджана дыпломам І ступені ў конкурсе “Летні маршрут: малая ра­дзіма”, Г.Л.Юрчанка — дыплом ІІ ступені ў міжнародным творчым конкурсе “Адкрыты ўрок”, Н.А.Шчэрбіч — дыпломам ІІІ ступені ў раённым конкурсе на лепшую краязнаўчую экспедыцыю “Захаваем спадчыну роднага краю” і іншыя.

У якасці падарунка за дасягнутыя поспехі, а таксама для папулярызацыі здаровага ладу жыцця ад імя райвыканкама Галіна Слабоднікава ўручыла калектыву школы сертыфікат на набыццё спартыўнага абсталявання і інвентару.

Ад ААТ “Рассвет імя К.П.Арлоўскага” вялікая група рабят атрымала грашовыя прэміі за поспехі ў вучобе, спартыўныя і творчыя дасягненні, якія ўручыў яго дырэктар Аляксандр Багель.

Шчырыя словы ўдзячнасці адрасавала дырэктар школы Святлана Шчэрбіч сваім калегам за іх прафесіяналізм і цярпенне, рабятам — за выдатную вучобу, бацькам — за разуменне і падтрымку.

Цёплыя словы пажаданняў выпускнікам, а сцены роднай Мышкавіцкай школы пакідаюць сёлета 7 адзінаццацікласнікаў, прагучалі ад класнага кіраўніка Галіны Абросімавай.

Ганаровае права даць апошні школьны званок было прадастаўлена выпускніцы Мілене Галушка і першакласніку Раману Рамнёнку.

Сімвалам развітання з самай цудоўнай парой — школьным жыццём — для
адзінаццацікласнікаў сталі выпушчаныя ў блакітнае неба рознакаляровыя паветраныя шары…
Людміла СЯМЁНАВА.
Фота Максіма МІКЕШЫНА.