Уклад меліяратараў у справу павелічэння аб’ёмаў урадлівых земляў і павышэння эфектыўнасці сельскагаспадарчай галіны неацэнны.
Днямі мы пабывалі ў ААТ “ПМК-97 Вадгас” і пацікавіліся, з якімі працоўнымі дасягненнямі падыходзіць калектыў да прафесійнага свята, на выкананні якіх задач акцэнтуе асаблівую ўвагу.

Сёння ў арганізацыі працуе 85 чалавек, асноўны касцяк — гэта вопытныя, дасведчаныя ў сферы меліярацыі кадры. За студзень — красавік выкананы аб’ём работ у дзеючых цэнах на суму 2 млрд. 528 млн. руб., што складае 119% да плана.
Як адзначыла галоўны інжынер Ганна Ходасава, характарызуючы асноўныя віды работ, выконваючы дзяржзаказ па праграме меліярацыі земляў, за 4 месяцы бягучага года работнікі “Вадгаса” асвоілі 1 млрд. 399 млн. руб., што складае 143% да плана, а за красавік было выканана меліярацыйных работ на суму 474 млн. руб., практычна ў 4 разы больш адпаведнага ўзроўню мінулага года.
У межах рэалізацыі аграме-ліярацыйных мерапрыемстваў рыхтавалі зямельныя плошчы ў СВК “Калгас “Свярдлова” — усяго тут 88 га. Тут жа займаліся рамонтам меліярацыйнай сістэмы “Белая”.
Меліяратары займаюцца таксама падрыхтоўкай земляў да ўвядзення ў севазварот у СВК “Бераснёўскі”: з запланаваных 142 га даведзены да ладу і засеяны сельгасарганізацыяй 60 га.
Праводзіцца рэканструкцыя меліярацыйнай сістэмы “Кострычка” РАПТЗ, якую плануецца здаць у эксплуатацыю ў жніўні. А ўжо ў чэрвені мяркуюць увесці ў строй дзеючых другі комплекс меліярацыйнай сістэмы “Дабрыца” — участак “Асаўнік” у СВК “Добасна-агра”, да канца ліпеня — першы комплекс.
Да жніўня будзе практычна асвоена гадавая рэгіянальная праграма меліярацыі. Далей запланавана правядзенне аграмеліярацыйных работ у СВК “Рассвет” імя К.П.Арлоўскага ў працэсе падрыхтоўкі да абласных “Дажынак”.
Ганна Ходасава падкрэсліла ў размове, што сітуацыя ў калектыве, узровень арганізацыі работ і, адпаведна, канчатковыя рэзультаты змяніліся ў лепшы бок з прыходам у пачатку мінулага года новага кіраўніка.
Працягваючы экскурсію па “Вадгасе”, мы сустрэліся з яго дырэктарам Аляксандрам Вербінавым. Ён спыніўся на іншых напрамках дзейнасці меліяратараў: яны выступаюць падрадчыкамі на работах па рэканструкцыі МТФ у СВК “Добасна-агра”. Уведзены ў строй асноўны пускавы комплекс — хлеў і даільна-малочны блок, распачата будаўніцтва другога хлява.
На субпадрадзе выкананы шэраг работ у ходзе ўзвядзення МТФ “Лёўкавічы” ў КСУП “Жылічы”.
Кіраўнік арганізацыі не без гонару канстатаваў, што ў мінулым годзе істотна папоўніўся іх тэхнічны парк: пры садзеянні ДВА “”Белмеліявадгас” атрымалі па лізінгу шмат новых адзінак тэхнікі. Сёлета ім вы-дзелена касілка, чакаюць планіроўшчык доўгабазавы, карчавальнік.
І самі вадгасаўцы не сядзяць склаўшы рукі, аднаўляюць старую тэхніку. На сённяшні дзень тут маюцца 4 экскаватары, поўны шлейф машын для глебаапрацоўкі, 3 бульдозеры, сродкі малой механізацыі, набытыя за ўласныя грошы. Надзейнае тэхнічнае забеспячэнне неабходна, каб выконваць запланаваныя работы аператыўна, з меншымі затратамі, падкрэсліў Аляксандр Вербінаў.
Вадгасаўцы стараюцца адшукаць і дадатковыя аб’ёмы работ. Усе намаганні калектыву накіраваны на тое, каб забяспечыць выкананне паказчыка эфектыўнасці дзейнасці — запланаванай выручкі на аднаго сярэдняспісачнага работніка. Тады ў арганізацыі будзе магчымасць далей развівацца.
Аляксандр Вербінаў адзначыў, што многія праблемныя пытанні ўдаецца вырашаць з дапамогай мясцовай улады, пры яе падтрымцы дасягнута стабільнасць у рабоце.
Яе ўмацоўваюць сваёй зладжанай, руплівай працай лепшыя работнікі. Усю сваю працоўную біяграфію прысвяцілі арганізацыі вадзіцель Аляксандр Бараноўскі, інжынер па кадастры Таццяна Горбаль. Ды і галоўны інжынер Ганна Ходасава працуе тут з 1985 года, ужо 12 гадоў — на гэтай паса-дзе. Працяглы час шчыруюць тут намеснік дырэктара па механізацыі Аляксандр Кірычэнка, загадчык склада Ніна Якімчанка і многія іншыя.
Раўняюцца на вопытных работнікаў маладыя спецыялісты. Так, летась пасля заканчэння БСГА ўліліся ў працоўны калектыў муж і жонка Аляксандр Казека і Святлана Салавей: ён працуе майстрам, яна — эканамістам. Сваю справу выконваюць добрасумленна, адказна, кіраўніцтва задаволена маладым папаўненнем і спадзяецца, што калектыў будзе для яго родным многія гады.
Застаецца пажадаць меліяратарам паспяховага выканання намечаных арыенціраў!
Наталля ХАДАКОВА.
Фота Максіма МІКЕШЫНА.