Хуткімі тэмпамі вядуцца работы па нарыхтоўцы кармоў для грамадскага статка ў СВК “Калгас “Ніва”. Механізатары выкарыстоўваюць кожную хвіліну, каб не ўпусціць спрыяльныя тэрміны па ўборцы траў першага ўкосу. Наогул жа, ім неабходна скасіць усіх траў на 1300 га. На прадстаячую зімоўку жывёлы ў гаспадарцы плануюць нарыхтаваць 984 т сена, 17350 т — сенажу, у тым ліку па прагрэсіўных тэхналогіях — 5205 т.
Стараннасцю ў працы вызначаецца Сяргей Гушчын, які ў дзень прыезду супрацоўнікаў рэдакцыі ў гаспадарку ў мінулую пятніцу шчыраваў за в.Вішанька. На трактары МТЗ-1523 з прэс-падборшчыкам “Comprima” яму было неабходна ўбраць травы на 40 га за два дні. Механізатар упэўнены, што з даведзеным заданнем ён справіцца, даручаная яму тры гады таму новая тэхніка не падводзіць. За дзень Сяргей Васільевіч у стрэйч-плёнку нарыхтоўвае да 140 т сянажнай масы.