Мнагаборцы Кіраўшчыны пацвердзілі высокі клас!
Спаборніцтвы па зімовым мнагаборстве “Здароўе” традыцыйна ўваходзяць у праграму круглагадовай спартакіяды школьнікаў. Пасля раённых адбораў найбольш спартыўных рабят у некалькіх дысцыплінах у Магілёве прайшоў абласны этап. Апошнія сезоны стабільна высокія рэзультаты дэманструе каманда нашага раёна, перыядычна ўваходзячы ў прызавую тройку. Не стала выключэннем і сёлетняя паездка ў горад на Дняпры.
У састаў зборнай ўвайшлі 14 рабят (па 7 хлопчыкаў і дзяўчынак) з сельскіх устаноў адукацыі. Найбольшае прадстаўніцтва належала вучням Паўлавіцкай СШ імя Р.А.Худалеева. За каманду раёна выступалі таксама спартсмены Барчыцкага, Дабаснянскага НПК ДС-СШ, Мышкавіцкай і Чыгірынскай школ.
У праграму спаборніцтваў уваходзілі стральба з пнеўматычнай вінтоўкі, скачкі ў даўжыню з месца, гімнастыка (хлопчыкі – падцягванне на перакладзіне, дзяўчынкі – згібаннеразгібанне рук ва ўпоры лежачы). Традыцыйна ў зімовае мнагаборства заўсёды ўваходзяць таксама лыжныя гонкі. Аднак у сувязі з адсутнасцю снегу яны былі заменены бегам на 1, 1,5 і 3 км у залежнасці ад узросту ўдзельнікаў.
Па суме набраных ачкоў ва ўсіх відах вызначаліся мацнейшыя ў камандным першынстве. У выніку кіраўчане занялі 2 месца, прапусціўшы наперад толькі каманду Бабруйскага раёна. Дапоўнілі тройку прызёраў спартсмены з Горацкага раёна.
Трое прадстаўнікоў Кіраўшчыны былі ўключаны ў састаў зборнай Магілёўскай вобласці для ўдзелу ў рэспубліканскім этапе, які прайшоў на Гродзеншчыне, у Навагрудку. Гонар каманды Прыдняпроўскага краю абаранялі Анастасія Котава з Паўлавіцкай СШ імя Р.А.Худалеева, Мікіта Судкоў з Барчыцкага НПК ДС-СШ і Мікалай Сінікін з Мышкавіцкай СШ. Галоўным прадстаўніком зборнай другі год запар быў выкладчык фізічнай культуры і здароўя Паўлавіцкай СШ імя Р.А.Худалеева Валерый Вароніч. Каманда паказала высокі ўзровень падрыхтаванасці і заняла ганаровае трэцяе месца, прапусціўшы наперад гаспадароў з Гродзеншчыны і зборную Віцебскай вобласці.
Выдатнага поспеху дабілася наша прадстаўніца ў асабістым заліку. Сярод спартсменаў сваёй узроставай катэгорыі Анастасія Котава заваявала 1 месца!
Аляксандр ХАХЛОЎ.
