Жыллёва­камунальныя паслугі, добраўпарадкаванне і навядзенне парадку для кожнага з нас даўно сталі справай звыклай, і мы нават не задумваемся, якіх намаганняў каштуе наладзіць стабільную работу вялікай і шматпрофільнай жыллёва­камунальнай гаспадаркі. На тэрыторыі нашага раёна стараюцца  забяспечваць камфортныя ўмовы жыццядзейнасці насельніцтва работнікі УКП “Жылкамгас”.

Напярэдадні прафесійнага свята аб праводзімай рабоце, задачах і планах на перспектыву мы папрасілі расказаць в.а. дырэктара прадпрыемства Сяргея МАРЦЮЧЭНКУ:

 – На балансе нашага прадпрыемства 167 жылых дамоў агульнай плошчай амаль 137 тыс. м², у тым ліку 87 дамоў у сельскай мясцовасці, гарадская лазня. Акрамя гэтага – 24 кацельні, 1129 калодзежаў,
1 гарадскі палігон і 2 міні­палігоны бытавых адходаў. А яшчэ – цепласеткі, дарогі ў горадзе і сельскіх населеных пунктах, тратуары і ліхтары вулічнага асвятлення.

Забяспечваем спажыўцоў цяплом, збіраем і ўтылізуем бытавое смецце, займаемся добраўпарадкаваннем і навядзеннем парадку на зямлі, рамонтам жылфонду і інжынерных сетак, праводзім паверку вентканалаў, аказваем сантэхнічныя, электрамантажныя і  рытуальныя паслугі, прадастаўляем спецтэхніку. Запатрабавана гасцініца. І гэта далёка не поўны пералік нашых штодзённых спраў.

Сёння на прадпрыемстве працуе 180 чалавек. Не сакрэт, што ад прафесіяналізму і адказнасці гэтых людзей залежаць чысціня і добраўпарадкаванасць вуліц і двароў, утульнасць у дамах і кватэрах спажыўцоў нашых паслуг.

Летась у межах праграмы “Камфортнае жыллё і спрыяльнае асяроддзе” зрабілі капітальны рамонт 2­х дамоў па вул.Гагарына агульнай плошчай 5688 м²: часткова ўцяп­лілі фасады, адрамантавалі дах, замянілі вокны і дзверы ў месцах агульнага карыстання, пафарбавалі будынкі і інш. Сёлета рамонт жылфонду будзе працягнуты.

Хачу адзначыць, што пастаянна шукаем спосабы эканоміі сродкаў і рэсурсаў. Адзін з асноўных шляхоў – мадэрнізацыя аб’ектаў камунальнага прызначэння, замена састарэлага і стратнага абсталявання. Сярод найбольш значных можна назваць увядзенне ў строй кацельні “Цэнтральная”. Зараз яна працуе толькі на мясцовых відах паліва – шчапе. Газавыя катлы тут таксама маюцца: у выпадку надзвычайнай сітуацыі ці моцных маразоў яны будуць запушчаны, і падача цяпла нашым спажыўцам не прыпыніцца ні на хвіліну. Усе працэсы на кацельні аўтаматызаваныя.

Правялі частковую замену цеплавых сетак па вул.Гагарына, было пракладзена 2,5 км ПІ­трубы. Як вынік, зменшыліся цепластраты, у кватэрах кіраўчан падчас ацяпляльнага сезону стала больш цёпла. Будзем праводзіць далейшую замену састарэлых труб.

Для зручнасці і бяспекі кіраўчан, у тым ліку школьнікаў, якія вучацца ў СШ №1, завяршаем работы па ўладкаванні тратуара па вул.Пятрушы.

Мяркую, многія задаволены праведзенымі ў Кіраўску мерапрыемствамі падчас падрыхтоўкі да свята працаўнікоў вёскі “Дажынкі­2019”. Немалы ўклад у агульную справу ўклалі і мясцовыя камунальнікі.

З мэтай паляпшэння фінансавага стану прадпрыемства многія работы імкнемся выконваць уласнымі сіламі. Так, пабудавалі 2 станцыі абезжалезьвання – у Паўлавічах і Любонічах. Зараз сяльчане дадзеных населеных пунктаў маюць магчымасць карыстацца якаснай пітной вадой. Працуе ўласны цэх па вырабе матэрыялаў з драўніны.

Праз аукцыён набылі летась капітальны будынак плошчай каля 2000 м² для захоўвання шчапы, якую вырабляем з дапамогай спецыяльнай устаноўкі.

Асаблівы клопат камунальнікаў – шахтныя калодзежы. Праводзім іх рамонт, ачыстку, тампанаванне. Толькі летась “другое жыццё” далі больш за 100 крыніцам пітной вады ў сельскіх населеных пунктах.

Сярод станоўчых момантаў нашай дзейнасці ў 2019 годзе можна вызначыць значнае змяншэнне зваротаў грамадзян па пытаннях аказання жыллёва­камунальных паслуг. Мяркую, гэта паказчык таго, што сваю работу мы сталі выконваць больш якасна і аператыўна. Да чаго, шчыра кажучы, пастаянна імкнемся.

Займаліся летась і працягнем сёлета ямачны рамонт і рамонт асфальтабетоннага пакрыцця вуліц. Не сакрэт, што з кожным годам гэты від работ патрабуе ўсё большых укладанняў. 

Спадзяюся, жыхары і госці нашага горада ўжо хутка ацэняць зробленыя нашымі работнікамі па азеляненні кветкавыя кампазіцыі і клумбы. Расаду кветак мы вырошчваем у цяп­ліцах прадпрыемства. Пасля зімы правядзем абследаванне маладых дрэў у дэндрапарку і па вул.Гагарына, на месцы загінуўшых высадзім новыя.

Неабходна папрацаваць над абнаўленнем машына­трактарнага парку, зараз у нас 32 машыны і 20 трактароў. Маецца неабходнасць у набыцці 2 МАЗаў, іншай спецтэхнікі. Набірае папулярнасць, у тым ліку і ў нашай вобласці, устаноўка ў прыватным сектары асобных для кожнага домаўладання кантэйнераў для збору смецця. Такі спосаб аказання паслугі будзе больш зручным і для грамадзян, і для нашай службы.

За ўсімі лічбамі, справамі і дасягненнямі стаяць людзі. Адказных работнікаў, якія прафесійна спраўляюцца са сваімі абавязкамі, у нас шмат. З нагоды прафесійнага свята падчас урачыстага мерапремства плануем адзначыць шэраг нашых працаўнікоў, якія ў мінулым годзе дасягнулі найбольш высокіх паказчыкаў. Так, Ганаровай граматай УКП “Жылкамгас” будуць адзначаны электраманцёр Сцяпан Гарадко, начальнік участка Яўген Вароніч, рабочыя па комплексным абслугоўванні будынкаў і збудаванняў Алена Кісялёва, Галіна Гукава і Іван Тарэлка, вадзіцель Аляксандр Яскевіч, машыніст кацельні Віктар Габрусь, спецыяліст па кадрах Антаніна Кушнярова, газаэлектразваршчык Мікалай Пархамовіч, трактарыст Васіль Шарстабаеў і намеснік галоўнага бухгалтара Алена Арцёмава. 

Нямала ў нашага калектыву планаў і задум на год бягучы. Іх увасабленне ў жыццё, канешне ж, залежыць ад многіх фактараў. Мы, у сваю чаргу, прыкладзем усе намаганні, каб ажыццявіць задуманае.

Людміла СЯМЁНАВА.

Фота аўтара.