18 верасня велазаезд у межах раённай акцыі “За любімую Беларусь!” быў наладжаны ў а/г Паўлавічы. Удзел у ім прынялі вучні і настаўнікі Паўлавіцкай СШ імя Р.А.Худалеева.

Старт велапрабегу быў дадзены ля мясцовага сельскага Дома культуры. Старшыня Паўлавіцкага сельскага Савета дэпутатаў Марына Стафеева павітала прысутных і падзякавала ім за неабыякавасць і актыўную грамадзянскую пазіцыю – за мір, стабільнасць і працвітанне роднай краіны – пажадала ім добрага шляху.

Калону ўпрыгожылі нацыянальныя флагі, рознакаляровыя паветраныя шары. Праехаўшы па вуліцах аграгарадка, удзельнікі акцыі спыніліся ля брацкай магілы, дзе пахаваны загінуўшыя падчас Вялікай Айчыннай вайны воіны. Да скульптурнай кампазіцыі жанчыны, якая прыхілілася да лаўровага вянка, і брацкай магілы ўсклалі кветкі. Ушанавалі памяць загінуўшых мінутай маўчання.

Тут жа адбылася ўрачыстая перадача эстафеты велаакцыі “За любімую Беларусь!” прадстаўнікам а/г Барсукі.

Юны аматар здаровага ладу жыцця Радзівон Раманоўскі, вучань 10 класа Паўлавіцкай СШ імя Р.А.Худалеева, адзначыў што з пачуццём гонару прыняў удзел у веласіпеднай акцыі. Ён любіць свой аграгарадок і сваю Радзіму за мір і спакой, стабільнасць і ўпэўненасць у заўтрашнім дні.

Фота Максіма МІКЕШЫНА.  

________________________

Яркім святам аграгарадка Скрыпліца стала правядзенне на яго тэрыторыі ў мінулую суботу велазаезда ў межах раённай акцыі “За любімую Беларусь!”. Удзел у мерапрыемстве прынялі школьнікі і моладзь, а таксама пажылыя сяльчане, якія вырашылі такім чынам выказаць сваю грамадзянскую пазіцыю за мір і стабільнасць у Беларусі.

Ля мясцовага Дома культуры ўдзельнікаў велазаезду вітала дырэктар установы культуры Галіна Пімошына. Двухколавыя сябры велааматараў былі ўпрыгожаны беларускай сімволікай, рознакаляровымі флажкамі і паветранымі шарыкамі, а ўзначаліў калону выкладчык Барчыцкага НПК ДС-СШ Пётр Сямёнаў з Дзяржаўным флагам Рэспублікі Беларусь.

Са словамі ўдзячнасці за любоў да сваёй малой радзімы, за неабыякавасць да захавання спакою і згоды ў нашай краіне да ўдзельнікаў велазаезду звярнулася старшыня Скрыпліцага сельскага Савета дэпутатаў Жанна Рышкевіч. Яна адзначыла, што толькі разам, аб’яднаўшыся, мы здольныя супрацьстаяць розным негатыўным праявам, якія могуць стаць пагрозай для незалежнасці Беларусі. Беларусы – мірныя людзі і жадаюць быць гаспадарамі на сваёй зямлі. Вось дзеля гэтага і трэба быць разам!

Затым, па-святочнаму ўпрыгожаная калона рушыла па вуліцах аграгарадка. Пажылыя мясцовыя жыхары каля сваіх дамоў віталі ўдзельнікаў велазаезду. На мясцовых могілках, дзе сёлета быў устаноўлены помнік ахвярам палітычных рэпрэсій 30-х гадоў ХХ стагоддзя і загінуўшым у гады Вялікай Айчыннай вайны землякам, былі ўскладзены кветкі, а памяць загінуўшых ушанавана мінутай маўчання.

Эстафету велазаезду ў межах раённай акцыі “За любімую Беларусь!” жыхары Скрыпліцы перадалі аг.Барчыцы.

Людміла СЯМЁНАВА.

Фота аўтара.