У Кастрычніцкіх падзеях 1917-га года прымалі ўдзел і прадстаўнікі Кіраўшчыны.
Адзін з іх – ураджэнец в.Падрэчча Ісідор Фёдаравіч Пятруша. У 1909 годзе ён быў прызваны ў армію, накіраваны на Балтыйскі флот служыць матросам на знакамітым крэйсеры “Аўрора”. Актыўна вёў рэвалюцыйную прапаганду, падтрымліваў сувязь з бальшавікамі Петраграда, прымаў удзел у падрыхтоўцы і правядзенні Кастрычніцкай рэвалюцыі. Быў абраны старшынёй судовага рэвалюцыйнага камітэта.

Вясной 1918 года Ісідор Пятруша вярнуўся ў родную вёску, дзе ўступіў у партызанскі атрад, які вёў барацьбу супраць нямецкіх і польскіх інтэрвентаў. У кастрычніку 1919 года каля в.Гута адбыўся бой партызан з польскімі войскамі. І.Ф.Пятруша быў смяротна паранены і па дарозе ў шпіталь памёр. Пахавалі яго на могілках в.Падрэчча, у 1967 годзе астанкі былі перазахаваны ў в.Стаўпішчы, на магіле ўстанавілі абеліск.
Канстанцін Аляксеевіч Кат­лінскі нарадзіўся ў в.Вішанька ў 1896 годзе. У 1914 годзе на фронце быў узнагароджаны Георгіеўскім крыжам. У 1916 годзе служыў тэлеграфістам у г.Свеаборг. Кастрычнік 1917 года стаў лёсавызначальным для яго, як, дарэчы, і ўсёй краіны. Канстанцін Катлінскі прымаў удзел у штурме Зімняга Палаца. Потым быў адпраўлены на Паўднёвы фронт, ваяваў пад Камышынам і Царыцыным.
Дэмабілізаваўся ў 1921 го­дзе, працаваў тэлеграфістам у Рагачове, актыўна займаўся грамадскай дзейнасцю. Яго намаганнямі былі створаны аматарскія тэатральныя калектывы на лесазаводзе і кардоннай фабрыцы, а таксама перасоўны аматарскі тэатр, які існаваў 12 год. Калі ў 1936 го­дзе на яго аснове ўзнік прафсаюзны тэатр, К.А.Катлінскі стаў яго кіраўніком. У гады Вялікай Айчыннай вайны творчы калектыў пад яго кіраўніцтвам выступаў з канцэртамі перад савецкімі воінамі.
У 1897 годзе ў в.Цейка­ві­чы нарадзіўся Мікалай Вік­та­ра­віч Шчэрбіч. У 1914 годзе ён пачаў службу ў арміі. Падчас падзей кастрычніка 1917 года адстойваў рэвалюцыйны Петраград, прымаў удзел у баях супраць войск Калчака, Дзянікіна, Махно.
У Вялікую Айчынную вайну змагаўся з ворагам на фронце. У мірныя дні аднаўляў разбураную вайной гаспадарку.
Па матэрыялах кнігі “Памяць. Кіраўскі раён”.