13 сакавіка ў межах акцыі “Мы — грамадзяне Беларусі!” у Цэнтры вольнага часу адбылося раённае ўрачыстае мерапрыемства. У зале сабраліся вучні з гімназіі горада, СШ №1, Мышкавіцкай, Паўлавіцкай, Скрыпліцкай, Дабаснянскай, Чыгірынскай і Баравіцкай сярэдніх школ. Сярод тых, каму выпала ганаровае права ў гэты дзень з рук старшыні райвыканкама Аляксандра Бутарава (на здымку) атрымаць самы важны дакумент у жыцці — выдатнікі вучобы, актыўныя ўдзельнікі конкурсаў і алімпіяд, спартыўных спаборніцтваў, актывісты школьнага і грамадскага жыцця. 

П авіншаваць юнакоў і дзяўчат са знамянальняй падзеяй — атрыманнем пашпарта — таксама прыйшлі член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько, старшыня раённага Савета дэпутатаў Надзея Каранкевіч, намеснік старшыні райвыканкама Галіна Слабоднікава, ветэраны вайны і працы, кіраўнікі раённых структур, грамадскіх аб’яднанняў, прадстаўнікі арганізацый і ўстаноў раёна, бацькі.
З прывітальным словам да прысутных у зале звярнуўся старшыня райвыканкама Аляксандр Бутараў, які, у прыватнасці, адзначыў, што прыняцце Канстытуцыі — адна з важнейшых падзей у гісторыі беларускага народа. Менавіта Асноўны Закон нашай краіны, прыняты 15 сакавіка 1994 года, паслужыў пачаткам пазітыўных працэсаў станаўлення і ўмацавання інстытутаў дзяржаўнай улады. Канстытуцыя стварыла ўмовы для дынамічнага развіцця эканамічнага, сацыяльнага і культурнага патэнцыялу. Краіна атрымала надзейны прававы фундамент, аснову грамадзянскага міру, згоды і адзінства. Абапіраючыся на палажэнні Асноўнага Закона, у нашай краіне ствараюцца дастойныя ўмовы для рэалізацыі творчага патэнцыялу асобы, забеспячэння дабрабыту кожнага чалавека. Сёння з упэўненасцю можна сказаць, што Канстытуцыя паказала сваю жыццёвую сілу, Беларусь упэўнена рухаецца наперад, развіваючы эканоміку і сацыяльную сферу, умацоўваючы сваю міжнародную пазіцыю.
Віншуючы моладзь з важнай падзеяй — атрыманнем пашпарта — кіраўнік раёна пажадаў юнакам і дзяўчатам быць заўсёды ініцыятыўнымі, актыўнымі і адказнымі. “Вы — будучыня Беларусі, менавіта ваша дастойная працоўная дзейнасць стане ў далейшым гарантам развіцця і працвітання нашай краіны”, — адзначыў Аляксандр Бутараў.

Шчырыя словы віншаванняў выказала рабятам член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько: “Гэты дзень адкрывае перад вамі новыя шляхі ў дарослае жыццё: з’яўляюцца новыя правы і новыя абавязкі. Сёння старэйшае пакаленне людзей глядзіць на вас з надзеяй, бо ў тым ліку і ад вас залежыць, як будзе развівацца наша краіна, якія будуць умовы жыцця ў яе народа. Жадаю вам з гонарам несці званне грамадзяніна Беларусі!”
Аляксандр Бутараў уручыў рабятам пашпарты грамадзяніна Рэспублікі Беларусь. Акрамя таго, кожны малады чалавек атрымаў у падарунак выданне Канстытуцыі Рэспублікі Беларусь і кнігу “Я — грамадзянін Рэспублікі Беларусь!”, у якой сабрана інфармацыя аб асноўных заканадаўчых актах, а таксама іншыя пазнавальныя матэрыялы.
Потым рабяты далі клятву сваімі вучобай, працай і дастойнымі справамі ўмацоўваць аўтарытэт і дабрыбыт Беларусі, быць дастойнымі памяці дзедаў і прадзедаў, якія аддалі свае жыцці за гонар і незалежнасць нашай дарагой Радзімы. Юнакі і дзяўчаты паабяцалі стаць сапраўднымі гаспадарамі беларускай зямлі і садзейнічаць яе працвітанню.
Словы ўдзячнасці кіраўніцтву раёна і ганаровым гасцям ад імя школьнікаў выказала вучаніца гімназіі горада Яна Куляўцова. Яна адзначыла, што быць грамадзянінам Рэспублікі Беларусь — гэта вялікі гонар і адказнасць як перад грамадствам, так і перад самім сабой. “З гэтага дня мы становімся паўнапраўнымі грамадзянамі нашай краіны і будзем імкнуцца да таго, каб разам са старэйшым пакаленнем прымнажаць багацце роднага краю”, — адзначыла вучаніца.
Ад імя бацькоў словы віншаванняў у адрас рабят выказала Таццяна Гушчына. Яна пажадала рабятам праз усё сваё жыццё пранесці любоў да кіраўскай зямлі, добрымі справамі і дасягненнямі праслаўляць сваю малую радзіму і родную краіну.
На ўрачыстым мера-прыемстве гучалі песні пра родную, прыгожую Беларусь. Свае музычныя віншаванні падарылі прысутным работнікі раённага Дома культуры, Цэнтра вольнага часу і аддзела кінавідэамерапрыемстваў.
Людміла СЯМЁНАВА.
Фота
Максіма МІКЕШЫНА.