Прафілактыка п’янства, алкагалізму, негатыўных з’яў у сем’ях, дзе выхоўваюцца дзеці, з’яўляецца важным накірункам дзейнасці адказных службаў. Гэтым пытанням надаецца вялікая ўвага, наладжана сістэма работы па кожным з дадзеных аспектаў. У зоне асаблівай увагі — дзеці, якія знаходзяцца ў складанай жыццёвай сітуацыі. 

Згодна комплексу арганізацыйных і практычных мер па выкананні патрабаванняў Дэкрэта №18 у раёне створана і дзейнічае міжведамасная сістэма выяўлення рабят, якія знаходзяцца ў сацыяльна небяспечным стане. У цяперашні час у раённым банку дадзеных на такім уліку знаходзяцца 79 непаўнагадовых, якія выхоў-ваюцца ў 50 сем’ях, з іх 19 — поўныя, у 31 — выхаваннем дзіцяці займаецца адзін з бацькоў.
У межах правядзення прафілактычна-папераджальнай работы на базе сацыяльна-педагагічнага цэнтра адбылося чарговае пасяджэнне савета грамадскага пункта і аховы правапарадку горада. На ім былі разгледжаны персанальныя справы бацькоў, чые сем’і прызнаны знаходзячыміся ў сацыяльна небяспечным стане, а таксама асобы, якія злоўжываюць алкаголем, вядуць асацыяльны лад жыцця. Многія з выкліканых трапляюць на савет не ўпершыню, а прапанаваную ім дапамогу і падтрымку не скарыстоўваюць, працягваючы весці звыклы лад жыцця. З кожным чалавекам, які быў запрошаны на пасяджэнне, зноў вялася растлумачальная работа, высвятляліся ўсе жыццёвыя нюансы на дадзены момант, магчымасць выпраўлення сітуацыі.
Першай з выкліканых на савет няма яшчэ і 20 гадоў, аднак быў у яе жыцці перыяд, калі жанчына злоўжывала алкаголем, зусім не займалася выхаваннем свайго дзіцяці, за што і знаходзілася пад пільным наглядам адказных службаў. Праведзеная з ёй прафілактычная работа дала свой плён: жанчына пазбавілася ад алкагольнай залежнасці, ёй дапамаглі працаўладкавацца і аформіць дзіцяці ў дашкольную ўстанову. Жыццё нібы наладзілася, аднак якім яно будзе далей — залежыць толькі ад яе самой.
Другая жанчына прама з парога заявіла прысутным на пасяджэнні, што не п’е гарэлку ўжо амаль тры месяцы. Але на самой справе аказалася, што гэтае сцвярджэнне зусім далёкае ад праўды. Спецыялісты сацыяльна-педагагічнага цэнтра сцвярджалі, што падчас наведвання гэтай сям’і вельмі часта застаюць гаспадыню ў зусім непрывабным выглядзе і нецвярозым стане. У жанчыны двое непаўналетніх дзяцей, аднак на самой справе складана ўявіць, як можна належным чынам даглядаць малышоў, калі на першым плане сяброўства з «зялёным зміем». Праз суд бязладную маці абмежавалі ў дзеяздольнасці для таго, каб грошы, якія выплачвае дзяржава на ўтрыманне дзяцей, не траціліся ёю на выпіўку. Акрамя таго, камісіяй савета было прынята рашэнне аб накіраванні жанчыны ў наркалагічны дыспансер для праходжання лячэння ад алкагольнай залежнасці. У далейшым яна будзе абавязана штомесячна наведвацца на прыём да ўрача-нарколага. Жанчыну папярэдзілі, што калі яна не выправіць сваіх паводзін, то мае ўсе шанцы апынуцца ў ЛПП.
Хочацца спадзявацца, што горамаці адумаецца, і яе малашы не папоўняць рады рабят, якія з-за п’янства родных людзей трапляюць у дзіцячыя дамы і сацыяльныя прытулкі.
Людміла СЯМЁНАВА.
Фота аўтара.