Чалавек сваёй справы
Медаль “За працоўныя заслугі” Аляксандр Жылінскі атрымаў за дасягненне высокіх вытворчых паказчыкаў, значны асабісты ўклад у развіццё сельскагаспадарчай галіны.
У сельскай гаспадарцы Аляксандр Валянцінавіч працуе 32 гады, 29 з іх – у “Рассвеце”. У тым ліку быў на пасадзе галоўнага агранома, а апошнія 7 год ён – першы намеснік дырэктара сельгаставарыства.
Аляксандр Жылінскі сапраўды чалавек справы. Нешматслоўны, сур’ёзны, дасканала ведае тэхналогіі ў раслінаводстве і патрабуе іх выканання. Усе віды і этапы палявых работ – пад яго кантролем.
Немалаважная роля яго, як спецыяліста высокага класа, у тым, што праца ў сельгаставарыстве ладзіцца, на рахунку рассветаўцаў – высокія паказчыкі. У тым ліку і на мінулым жніве. Ураджай збожжавых і зернебабоввых культур склаў 22 тыс. тон пры ўраджайнасці 57,9 ц/га, гэта адпаведна 121% і 108,4% да ўзроўню мінулага года. Гэта сапраўдны поспех, дасягнуты паляводамі гаспадаркі.
Добра ўрадзіў рапс: атрымалі 4510 тон (138,4% да паказчыка 2021 года) пры ўраджайнасці 48,5 ц/га. Дарэчы, у “Рассвеце” сёлета ўвайшоў у строй цэх па перапрацоўцы рапсу і маслічных культур.
Пры ўдзеле Аляксандра Жылінскага ў адкрытым акцыянерным таварыстве значна ўзрасла прадукцыйнасць працы за кошт выкарыстання сучаснай высокапрадукцыйнай энергазберагальнай тэхнікі і тэхналогій. Укараняюцца новыя перспектыўныя сарты сельскагаспадарчых культур, інтэнсіўная тэхналогія іх апрацоўкі.
На працягу многіх год гаспадарка з’яўлялася прызёрам рэспубліканскіх, абласных і раённых спаборніцтваў па вытворчасці цукровых буракоў, рапсу, кармоў.
За шматгадовую добрасумленную працу, высокія вытворчыя паказчыкі Аляксандр Жылінскі ўзнагароджваўся Ганаровымі граматамі Міністэрства сельскай гаспадаркі Рэспублікі Беларусь, камітэта па сельскай гаспадарцы і харчаванні Магілёўскага аблвыканкама, Кіраўскага раённага выканаўчага камітэта, заахвочаны падзякамі ААТ “Рассвет імя К.П.Арлоўскага”.
Работы на палях гаспадаркі працягваюцца, і першы намеснік кіраўніка – заўжды на сваім адказным пасту…
Як адзначыў Аляксандр Валянцінавіч, ён вельмі ганарыцца высокай дзяржаўнай ўзнагародай і лічыць, што гэта стымул да новых працоўных дасягненняў.