За мір, стабільнасць і працвітанне!

Арганізавана, актыўна, пры высокай яўцы выбар-шчыкаў прайшлі ў нашым раёне выбары Прэзідэнта Рэспублікі Беларусь. Жыхары раёна прадэманстравалі сваю актыўную грамадзянскую пазіцыю, палітычную свядомасць, адказнасць за будучыню краіны.
Па водгуках выбаршчыкаў, яны аддалі свае галасы за мір, стабільнасць, упэўненасць у заўтрашнім дні, далейшае працвітанне роднай Беларусі.
Сонечнае надвор’е, паўсюдна — святочная атмасфера: такім быў мінулы нядзельны дзень. На ўчасткі для галасавання прыходзілі цэлымі сем’ямі. Іграла музыка, працаваў гандаль, выступалі ўдзельнікі мастацкай самадзейнасці, у тым ліку і на адкрытых пляцоўках.
Журналісты раённай газеты накіраваліся на ўчасткі для галасавання з самага пачатку іх работы. У гэты час тут з’явіліся і першыя выбаршчыкі.
На Кіраўскім участку для галасавання №3, размешчаным у гімназіі горада, назіраўся дзелавы рытм работы. Сюды прыбылі міжнародныя назіральнікі, прадстаўнікі місіі АБСЕ, якія ўважліва сачылі за правядзеннем галасавання.
На гэтым участку прыняў удзел у выбарах Прэзідэнта Рэспублікі Беларусь старшыня райвыканкама Аляксандр Бутараў, які прыйшоў сюды з жонкай і малодшым сынам.
Пасля таго, як кіраўнік раёна прагаласаваў, мы папрасілі яго падзяліцца сваімі ўражаннямі:
— Выбары Кіраўніка дзяржавы — вельмі важная палітычная падзея. Гэта разумеюць выбаршчыкі нашага раёна, аб чым пераканала і іх актыўнасць у перыяд датэрміновага галасавання — прагаласавала больш 46% грамадзян, унесеных у спісы выбаршчыкаў: відавочна, што людзі неабыякавыя да лёсу краіны, адчуваюць сваю адказнасць за яго.
Прагаласаваўшы сёння, я зрабіў свой выбар за нашу родную Беларусь.
Самае вялікае дасягненне за дваццаць гадоў развіцця нашай незалежнай суверэннай дзяржавы — тое, што яе народ жыве ў міры і спакоі. Мы сёння самадастатковыя, у нас чысціня і парадак, нашы людзі сацыяльна абароненыя. Для мяне гэта вельмі важна і як для кіраўніка раёна, і проста жыхара сваёй краіны, і галавы сям’і — я спакойны за сваіх траіх сыноў, за іх будучыню. І ўпэўнены, што мой сённяшні выбар будзе спрыяць далейшаму развіццю нашай краіны ў напрамку ўмацавання стабільнасці і працвітання.
Аляксандр Бутараў па нашай просьбе даў ацэнку рабоце па падрыхтоўцы ў раёне ўчасткаў для галасавання па выбарах Прэзідэнта Рэспублікі Беларусь, рабоце ўчастковых камісій. Ён адзначыў, што напярэдадні датэрміновага галасавання і падчас яго ён пабываў практычна на ўсіх участках, сур’ёзных заўваг не было: яны адпавядалі тэхнічным патрабаванням, належным чынам умацаваны, укамплектаваны. Участковыя камісіі ў належныя тэрміны прыступілі да сваёй работы. Усё ажыццяўлялася ў адпаведнасці з выбарчым заканадаўствам.
Добра вядомая цана міру ў нашай краіне ветэрану Вялікай Айчыннай вайны Рыгору Іванавічу Куцілкіну. Ён прыйшоў на Кіраўскі участак для галасавання №1, размешчаны ў раённым Доме культуры, каб, па яго словах, аддаць свой голас за далейшую мірную будучыню Беларусі. Наша рэспубліка і, у прыватнасці, Кіраўшчына стала для расіяніна другой Радзімай.
Як адзначыў старшыня ўчастковай камісіі Віктар Ставер, агульная колькасць выбаршчыкаў, унесеных у спісы для галасавання на ўчастку, — 2538 чалавек, з іх 1143 прынялі ўдзел у датэрміновым галасаванні.
Якраз, калі журналісты прысутнічалі на ўчастку, сюды прыйшлі двое хлопцаў, якія ўпершыню прымалі ўдзел у выбарах, — Аляксандр Лізуноў і Павел Аўдзеенка. Віктар Ставер павіншаваў іх са знамянальнай падзеяй у жыцці, уручыў маляўнічыя паштоўкі “Час выбіраць” за подпісам старшыні Цэнтрвыбаркама Лідзіі Ярмошынай, а таксама кнігу-хроніку “Памяць. Кіраўскі раён”.
А рабяты адзначылі, што, галасуючы, адчувалі сваю адказнасць за будучыню краіны, таму іх падыход да гэтай важнай справы быў свядомым і ўзважаным.
Увогуле, трэба сказаць, моладзь падчас выбарчай кампаніі вылучалася значнай актыўнасцю, і гэта сімвалічна ў Год моладзі. Адной з трох арганізацый, якія праводзілі 11 кастрычніка экзітполы — апытанне грамадзян на выхадзе з участкаў для галасавання, стала Маладзёжная лабараторыя сацыялагічных даследаванняў рэспубліканскага саюза грамадскіх аб’яднанняў “Беларускі камітэт маладзёжных арганізацый”. У сувязі з гэтым экзітполы арганізавалі і прадстаўнікі раённай арганізацыі БРСМ.
Спакойная, добразычлівая і разам з тым дзелавая атмасфера панавала на ўчастках для галасавання ў сельскай мясцовасці.
На Мышкавіцкім участку для галасавання №7, які размясціўся ў мясцовым Доме культуры, ужо з раніцы назіралася высокая актыўнасць выбаршчыкаў. Першым аддаў свой голас на выбарах Прэзідэнта краіны пенсіянер М.І.Мірановіч.
Выдатны настрой быў у Мікалая Белакурскага, перадавога трактарыста-машыніста “Рассвета”. Пасля таго, як ён прагаласаваў, мы папрасілі Мікалая Іванавіча падзяліцца думкамі, што значыць для яго гэты дзень:
— Сёння, як і ўсе жыхары нашай краіны, я зрабіў свой выбар: галасаваў за мірнае жыццё. А каб Беларусь працвітала і далей, буду ўносіць свой дастойны ўклад у агульную скарбонку, працаваць добрасумленна і адказна.
Па словах старшыні ўчастковай камісіі Таццяны Астроўскай, жыхары аграгарадка актыўна галасавалі датэрмінова. 10 юнакоў і дзяўчат прынялі ўдзел у галасаванні ўпершыню.
Музыкай сустракалі выбаршчыкаў на Барсукоўскім участку для галасавання №15, які знаходзіўся ў мясцовым СДК. Колькасць зрабіўшых свой выбар загадзя склала тут 189 чалавек з агульных 331. І ў нядзелю мясцовыя жыхары ўжо з ранку актыўна ішлі ў Дом культуры, каб выказаць сваё волевыяўленне.
У ліку першых была маладая сям’я Бушмаў: яшчэ нядаўна Алена і Вячаслаў жылі ў Бабруйску, а ўжо сёння яны — сельскія жыхары. І ніколькі не шкадуюць аб прынятым рашэнні: у СВК “Калгас “Ніва” маладую сям’ю прынялі ветліва. Галава сям’і працуе дыспетчарам, завочна вучыцца на апошнім курсе на эканамічным аддзяленні БСГА. Алена таксама закончыла гэтую навучальную ўстанову (там жа маладыя і пазнаёміліся), яна — бухгалтар. У сям’і падрастае дачушка Ксенія.
Добры настрой быў у мужа і жонкі Падрадчыкавых, на выбары Прэзідэнта краіны яны прышлі з кветкамі, якія ўпрыгожваюць іх добраўпарадкаваную сядзібу. Дарэчы, Валянціна Аляксееўна і Канстанцін Платонавіч у бягучым годзе адзначаць 50-годдзе сумеснага жыцця. Як падкрэсліла стараста вёскі Ніна Гушчына, гэта сям’я з’яўляецца прыкладам для іншых: муж і жонка старанна працавалі ў гаспадарцы, ён — у рамонтнай майстэрні, яна — даглядчыцай на ферме, сумленна выхоўвалі дзяцей, а зараз шчыруюць па хатняй гаспадарцы.
У спакойнай атмасферы праходзілі выбары на Стаўпіцкім участку для галасавання №11, які знаходзіўся ў мясцовым СДК.
Пры размове з сяльчанамі адчувалася, што ва ўсіх быў выдатны настрой, усе прыходзілі на выбары з ужо сфарміраваўшымся меркаваннем, за каго аддадуць свой голас. Па словах пенсіянеркі Н.М.Смалоўскай, якая ўсё жыццё адпрацавала ветурачом, яна задаволена клопатам, які дзяржава праяўляе да пенсіянераў і жадае, каб так было і надалей. Аляксей Дзякаў сёлета ўпершыню ўдзельнічаў у выбарах, ён — за мірнае жыццё ў роднай працвітаючай Беларусі.
На закрыты ўчастак для галасавання №5, размешчаны ў санаторыі імя К.П.Арлоўскага адпачываючыя ў гэты перыяд ішлі з самай раніцы. Калі сюды наведаліся карэспандэнты “раёнкі”, свой грамадзянскі абавязак выконвалі сёстры Галіна Маўчун і Валянціна Навуменка з Магілёва. Жанчыны выказалі сваё задавальненне ўмовамі лячэння і пражывання ў санаторыі. Як яны адзначылі, абедзве прагаласавалі за кандыдата, у якім упэўнены і якому давяраюць будучыню сваіх дзяцей.
Усюды ўчастковыя камісіі паклапаціліся, каб не быў абыдзены ўвагай кожны выбаршчык. Было створана безбар’ернае асяроддзе для сляпых і слабабачачых людзей, якое дазваляла ім самастойна прагаласаваць.
Для тых выбаршчыкаў, якія па стане здароўя ці па іншых важкіх прычынах не змаглі ў дзень выбараў прыйсці ў памяшканні для галасавання, яно было арганізавана па месцы іх знаходжання. Так, супрацоўнікі рэдакцыі прысутнічалі падчас выезду прадстаўнікоў участковай камісіі Кіраўскага ўчастка для галасавання №1 да ветэрана Вялікай Айчыннай вайны Зінаіды Кузьмінічны Акушэвіч.
На ўчастках для галасавання ў раёне працавалі ўнутраныя і міжнародныя назіральнікі.
Выбары Кіраўніка дзяржавы распачынаюць новы этап у гісторыі нашай краіны, творцамі якога сталі мы ўсе, хто прыняў удзел у галасаванні на карысць міру і працвітання Беларусі. Кожны выбаршчык можа з упэўненасцю сказаць: мой голас быў пачуты!
Наталля ХАДАКОВА.
Таццяна БАРАДЗІНА.
Фота
Максіма МІКЕШЫНА
і аўтараў.