Бачыць прыгожае ў звычайным

Абаяльная, з мілай ветлівай усмешкай, жыццелюбівая — гэтыя словы без перабольшвання можна адрасаваць  кіраўчанцы Тамары Ліпоўскай. Усё сваё жыццё яна імкнецца зрабіць свет вакол сябе прыгожым і маляўнічым. І ў яе гэта цудоўна атрымліваецца: жанчына шые, вяжа, з падручных матэрыялаў пляце розныя прыгожыя рэчы, займаецца развядзеннем кветак. 

Шмат гадоў Тамара Аляксееўна прысвяціла навучанню дзяцей, выкладаючы ў Доме творчасці. Яна заўсёды імкнулася прывіць рабятам уменне бачыць прыгожае ў звычайным, развіць у іх любоў да навакольнага асяроддзя, прыроды.
Пэўны час жанчына працавала ў гандлёвай кропцы па продажы кветак і сувенірнай прадукцыі. І тут Тамара Ліпоўская цудоўна прымяняла на практыцы сваё прыроджанае ўменне адчуваць спалучэнне колераў: створаныя ёю кветкавыя кампазіцыі заўсёды радавалі пакупнікоў непаўторнай прыгажосцю і індывідуальнасцю.
І зараз, калі жанчына ўжо на заслужаным адпачынку, яна не можа сядзець без справы: кожны яе дзень пачынаецца з новых ідэй і творчых задум. Усе яе вырабы — рукатворныя цуды. Дзякуючы свайму таленту яна цудоўна спалучае ў адно прыгожае цэлае розныя матэрыялы: тканіну, сухацветы, паперу, пацеркі і многае іншае.
У апошні час Тамара Аляксееўна захапілася пляценнем вырабаў з газетнай і часопіснай паперы. Здаецца, звычайныя і ўжо непатрэбныя рэчы, а якія цудоўныя з іх атрымліваюцца кошыкі, вазы, падстаўкі для алоўкаў, невялікія паліцы і інш.! Яны радуюць сваёй прыгажосцю і непаўторнасцю не толькі майстрыху, але і ўсіх, хто атрымлівае гэтыя сувеніры ад яе ў падарунак.
Ніводная хвіліна на працягу дня ў Тамары Ліпоўскай не праходзіць дарэмна: у яе доме заўсёды чысціня і ўтульнасць, пахне выпечкай, а тэрыторыя вакол пабудоў з ранняй вясны да позняй восені прываблівае погляды прахожых мноствам маляўнічых і незвычайных кветак. Частыя госці ў доме Ліпоўскіх — іх дзеці і любіміца ўнучка, якіх яны заўсёды чакаюць з нецярпеннем і радасцю.
Людміла ЛУКАНОВІЧ.
Фота
Максіма МІКЕШЫНА.