Кіраўчане далучыліся да рэспубліканскай інфармацыйна-асветніцкай акцыі “Дарогамі мужнасці і стойкасці: раўненне на герояў”. У яе рамках каля магілы Героя Савецкага Саюза, Героя Сацыялістычнай Працы Кірыла Пракопавіча Арлоўскага адбыўся мітынг. Удзел у ім прынялі кіраўнікі і прадстаўнікі працоўных калектываў, моладзь, вучні школ. Яны аддалі даніну памяці слаўнаму земляку, прыгадалі яго жыццёвы шлях і баявыя подзвігі.

У лютым 1943 года атрад пад камандаваннем Арлоўскага здзейсніў атаку на канвой Генеральнага камісара Вільгельма Кубэ. У выніку спецаперацыі былі знішчаны высокапастаўленыя гітлераўскія чыноўнікі. Атрад страт не панёс, аднак сам Кірыл Пракопавіч быў цяжка паранены. 20 верасня таго ж года яму было прысвоена званне Героя Савецкага Саюза з уручэннем ордэна Леніна і медаля “Залатая Зорка”. Пасля вайны Арлоўскі, былы дыверсант і разведчык, кіраваў калгасам “Рассвет”, які ў выніку стаў першым у Савецкім Саюзе калгасам-міліянерам.
Вялікая Айчынная вайна напісала найбольш сумную старонку ў гісторыі беларусаў. Падчас мітынгу ўспомнілі пра 25 савецкіх воінаў, а таксама партызан, астанкі якіх пахаваны ў брацкай магіле, што знаходзіцца побач з месцам упакаення К.П.Арлоўскага. Яны загінулі ў чэрвені 1944 года – у баях за свабоду Кіраўшчыны ад фашызму: тэрыторыя раёна была поўнасцю вызвалена ад нямецка-фашысцкіх захопнікаў 28 чэрвеня 1944 года ў выніку правядзення Беларускай наступальнай аперацыі “Баграціён” войскамі 1-га і 2-га Беларускіх франтоў.
За кожным прозвішчам на магільнай пліце брацкай магілы – жыццё – з радасцямі і засмучэннем, каханнем і растаннем, цяжкасцямі і перамогамі…
Памяць героя-земляка Арлоўскага і загінуўшых воінаў-вызваліцеляў ушанавалі мінутай маўчання.
Намеснік старшыні райвыканкама Таццяна Бяляўская падагульніла: “Толькі людзі-легенды, людзі, усім сэрцам адданыя Радзіме, сваёй зямлі, сваёй сям’і, могуць здзяйсняць подзвігі. Прычым яны не задумваюцца аб тым, што стануць у выніку героямі, а проста
робяць сваю справу – сумленна і бескарысліва.
6 нашых землякоў – Героі Савецкага Саюза,
8 – узнагароджаны ордэнам Леніна, 31 – ордэнам Чырвонага Сцяга, 212 – ордэнам Чырвонай Зоркі, 97 – ордэнам Славы, 687 – баявымі медалямі. За кожнай гэтай узнагародай – вялікія справы, вялікія подзвігі – як працоўныя, так і баявыя”.
Яўгенія БЯЛЬКО.
Фота аўтара.